Uduotahawọ nọ U No “Unu Emọ Efofa” Ze
Evaọ amara Akpegbivẹ ọrọ ukpe 2009, Okọto Ukpehru obọ Russia u bruoziẹ nọ a ro fi awhaha họ iruẹru Isẹri Jihova evaọ obọ Taganrog, Russia, u te je ru nọ a ro mi Ọgwa Uvie Isẹri Jihova jẹ fodẹ ebe 34 mai jọ inọ e rẹ raha udu ahwo nọ a rẹ rọ wọso egọmeti. Ma fi eme oziẹ nana gbe ifoto Isẹri nọ oziẹ nana o kpomahọ, te emaha na fihọ Evie evuẹ Isẹri Jihova.
Nọ emerae jọ e vrẹ no, uviuwou Isẹri Jihova jọ nọ o rrọ obọ Queensland, Australia nọ a se kpahe oziẹ na a te vi ẹkpẹti jọ se uwou ogha obọ Russia gbe ileta nọ a kere inọ: “Inievo Eghaghae, ẹrọwọ inievo mai obọ Russia gbe odawọ nọ u te rai u duobọte emọ mai nọ a re se Cody gbe Larissa udu gaga. A ru ekade je kere ileta, ma te fi enana gbe ekẹ efa họ evaọ ẹkpẹti nọ ma bi vi se emaha nọ e rrọ obọ Taganrog, be rọ jọ ae riẹ inọ emaha efa e rrọ obonẹ nọ e be gọ Jihova avọ ẹrọwọ je bi roro kpahe ae. A vi uyere gbe uyoyou rai se ai.”
Nọ eware na i te emaha nọ e rrọ obọ Taganrog obọ, a te vi ileta uyere nọ a drọ iwoho fihọ se uviuwou nọ o rrọ obọ Australia na. Uduotahawọ nọ u no “unu emọ efofa” ze na u duobọte oniọvo jọ nọ o bi ru iruo evaọ uwou ogha Russia te epanọ o ro kere ileta se Cody avọ Larissa inọ: “U re yoma kẹhẹ nọ a tẹ kẹ emaha gbe ekpako uye evaọ oware nọ a ru hu. Inievo mai obọ Taganrog a ru oware ovo thọ họ, rekọ a mi rai Ọgwa Uvie rai. Onana o da rai gaga. O rẹ jọ oware uduotahawọ kẹ ae nọ a tẹ riẹ nọ amọfa a bi roro kpahe ae evaọ abọ ọfa akpọ na. Wha kobiruo rọkẹ uyoyou gbe ẹzi ọghoruo rai.”—Ol. 8:2.
Mai Isẹri Jihova evaọ akpọ na so-so ma gine wo okugbe, yọ uyoyou nọ ma wo kẹ ohwohwo u bi fi obọ họ k’omai thihakọ edawọ gbe ebẹbẹ. Nọ ibruoziẹ jọ a be jọ obọ ekọto ta nọ ebe Isẹri Jihova e rẹ wha egrẹ na, yọ emọ mai a bi dhesẹ ọdawẹ kẹ ohwohwo, a be nọ họ sọ ejọ i no erẹwho efa ze hayo ovioma rai u wo ohẹriẹ, a tẹ be rọ ere dhesẹ eme Jesu họ uzẹme nọ ọ ta nọ: “Fiki onana ahwo kpobi a jẹ riẹ nọ whai ilele mẹ re whai ohwo o te you ohwo.”—Jọn 13:35.
[Uwoho nọ e rrọ ẹwẹ-obe avọ 32]
Emọ obọ Australia (nọ e rrọ obọze na) a vi eware se emọ obọ Russia (nọ e rrọ ẹkpẹlobọ na)