Ẹvẹ Whọ Sai Ro Wo Uzuazọ Nọ O Rrọ Obaro Tha Na?

OGHẸRẸ uzuazọ nọ Ọghẹnẹ ọ gwọlọ kẹ omai ma bi yeri na ha. O hae jọ ere, enẹ yọ akpọ na ọ vọ avọ ahwo nọ a wo adhẹẹ kẹ udu-esuo Ọghẹnẹ, enẹ yọ ahwo a bi ru lele ekpọvio riẹ je wo erere no ai ze, yọ ahwo a hae te rọ aro kele Ọghẹnẹ dhesẹ uyoyou kẹ ohwohwo. Ọghẹnẹ ọ gwọlọ nọ ahwo-akpọ a rẹ wereva kugbe ohwohwo nọ a bi yẹ emọ na, wuhrẹ eware ekpokpọ na, je ru otọakpọ na kpobi zihe ruọ aparadase.

ỌGHẸNẸ Ọ YA EYAA NỌ O TI RU OTỌAKPỌ NA FIHỌ EPANỌ Ọ GWỌLỌ

• “O bi ru emo serihọ evaọ otọakpọ na soso.”​—Olezi 46:9.

• “Oke nọ a fihọ na u te te . . . [re a] raha enọ e be raha otọakpọ na.”​—Eviavia 11:18.

• “Ohwo ọvo nọ ọ be rria ẹkwotọ na nọ ọ te ta nọ, ‘Mẹ be mọ’ ọ te jariẹ hẹ.” ​—Aizaya 33:24.

• “Ahwo mẹ nọ mẹ salọ a te reawere iruo abọ rai vọvọ.”​—Aizaya 65:22.

Ẹvẹ eruẹaruẹ nana i ti ro rugba? Ọghẹnẹ ọ rọ Ọmọ riẹ, Jesu ro mu no re ọ jọ Ovie emamọ egọmeti riẹ nọ u ti su no obọ odhiwu ziọ otọakpọ obonẹ. Ebaibol na o se egọmeti nana Uvie Ọghẹnẹ. (Daniẹl 2:44) Ebaibol na ọ ta kpahe Jesu nọ: “Ọghẹnẹ ọ te kẹe agbara-uvie . . . , ọ te jọ Ovie nọ o ti su.”​—Luk 1:32, 33.

Nọ Jesu ọ jọ otọakpọ, o ru iruo igbunu buobu. Eware nọ o ru na i dhesẹ nọ ọ te jọ emamọ osu nọ o ti ru akpọ woma kẹ ahwo-akpọ kpobi.

JESU Ọ RỌ IRUO IGBUNU RIẸ DHESẸ EWARE IWOMA NỌ O TI RU KẸ AHWO-AKPỌ

• O siwi oghoghẹrẹ eyao kpobi, yọ onana u dhesẹ nọ evaọ obaro, o ti si oghẹrẹ ẹyao kpobi no otọ.​—Matiu 9:35.

• O ru nọ ẹkporo ọgaga o ro serihọ, yọ onana u dhesẹ nọ ọ te thọ ahwo no okpẹtu nọ a rọ obọ so ho evaọ obaro.​—Mak 4:36-39.

• Ọ ko idu ahwo buobu, yọ onana u dhesẹ nọ o ti ru eware nọ ahwo a ginẹ gwọlọ evaọ uzuazọ kẹ ae evaọ obaro.​—Mak 6:41-44.

• O zihe ame ruọ udi evaọ ehaa orọo jọ, yọ onana u dhesẹ nọ o ti fiobọhọ kẹ ahwo reawere uzuazọ.​—Jọn 2:7-11.

Ẹvẹ whọ sai ro wo uzuazọ nọ Ọghẹnẹ ọ ya eyaa nọ ọ te rọ kẹ ahwo nọ a you rie evaọ obaro na? U wo “edhere” jọ nọ u fo nọ who re lele. Ebaibol na o dhesẹ nọ “edhere [na] o bi su kpohọ uzuazọ,” yọ “umutho ahwo a bi duku ei.”​—Matiu 7:14.

EPANỌ WHỌ SAI RO DUKU EDHERE UZUAZỌ NA

Eme họ edhere nọ o bi su kpohọ uzuazọ na? Ọghẹnẹ ọ ta nọ: “Mẹ Jihova, mẹ họ Ọghẹnẹ ra, Ọnọ o bi wuhrẹ owhẹ re who wo erere kẹ omara, Ọnọ o bi su owhẹ evaọ edhere nọ u fo nọ whọ rẹ nya.” (Aizaya 48:17) Who te bi ru lele ehrẹ Ọghẹnẹ evaọ uzuazọ ra, o wọhọ ẹsenọ whọ be nya evaọ edhere na, yọ oghẹrẹ uzuazọ nana o mai woma kpaobọ.

Jesu ọ ta nọ: “Mẹ họ edhere na gbe uzẹme na gbe uzuazọ na.” (Jọn 14:6) Re ma sai si kẹle Ọghẹnẹ je wo emamọ uzuazọ na tobọ, o gwọlọ nọ ma re ru lele iwuhrẹ Jesu jẹ rọ aro kele oriruo riẹ.

Ẹvẹ whọ sai ro duku edhere uzuazọ na? Egagọ nọ e rrọ akpọ na e rrọ buobu, rekọ Jesu ọ vẹvẹ omai unu nọ: “Orọnikọ ohwo kpobi nọ o bi se omẹ nọ, ‘Olori, Olori,’ ọ te ruọ Uvie obọ odhiwu hu, rekọ ọnọ o bi ru oreva Ọsẹ mẹ nọ ọ rrọ obọ idhiwu na ọvo.” (Matiu 7:21) Jesu ọ tẹ jẹ ta re nọ: “Ibi rai wha re ro vuhu ai.” (Matiu 7:16) Ebaibol na ọ sai fiobọhọ kẹ owhẹ vuhu ohẹriẹ nọ o rrọ egagọ uzẹme gbe egagọ erue.​—Jọn 17:17.

Ẹvẹ whọ sai ro lele edhere uzuazọ na? O gwọlọ nọ whọ rẹ riẹ ohwo nọ ọ kẹ omai uzuazọ na. Ono ọye? Didi odẹ riẹ? Oghẹrẹ vẹ ọ rrọ? Eme o bi ru kẹ omai? Eme ọ gwọlọ nọ ma ru?a

Orọnikọ Ọghẹnẹ ọ ma ahwo-akpọ re a ru iruo, re emu, zaharo, je yẹ emọ ọvo ho. Ma sae riẹ ọnọ ọ ma omai na ziezi jẹ jọ egbẹnyusu riẹ. Ma sai dhesẹ nọ ma you rie nọ ma te bi ru oreva riẹ ẹsikpobi. Jesu ọ ta nọ: “Re a wo uzuazọ ebẹdẹ bẹdẹ, o gwọlọ nọ a rẹ riẹ owhẹ, Ọghẹnẹ uzẹme ọvo na.”​—Jọn 17:3.

OWARE ỌSOSUỌ NỌ U FO NỌ WHO RE RU

Re whọ sai ru eva were Ọghẹnẹ, o gwọlọ nọ who re ru inwene jọ evaọ uzuazọ ra. Dede na, o sae jọ bẹbẹ re ohwo o ru inwene. Rekọ riẹ nọ who ti wo irere buobu nọ who te ru inwene evaọ uzuazọ ra. O te were Isẹri Jihova re a wuhrẹ Ebaibol na kugbe owhẹ evaọ oke gbe oria nọ u kiehọ owhẹ oma. Onana u ti fiobọhọ kẹ owhẹ kiyo enọ nọ whọ gwọlọ nọ. Whọ tẹ gwọlọ kere se omai, iviena kpohọ oria itanẹte mai www.jw.org.