Whọ Sai Wo Evawere Makọ Enẹna
KẸLE na ohwo ọvo ọ te gbẹ mọ họ, yọ ohwo ọvo ọ te gbẹ who hayo whu gbe he. Whọ sae jọ usu ahwo nọ a te rria akpọ yena! Rekọ obọnana, ebẹbẹ nọ i bi te ahwo-akpọ i bu wo umuo ho. Kọ eme ọ rẹ sai fiobọhọ kẹ owhẹ wo evawere makọ enẹna? Ebaibol na ọ kẹ ekpọvio nọ e rẹ sai fiobọhọ kẹ owhẹ wo evawere enẹna evaọ uzuazọ. Joma ta kpahe ebẹbẹ jọ nọ i bi te omai gbe epanọ Ebaibol na ọ sai ro fiobọhọ kẹ omai thihakọ.
EPANỌ MA SAI RO WO EDẸRO
Ohrẹ nọ Ebaibol na ọ kẹ: “Jọ edhere uzuazọ rai o kare uyoyou ugho, jọ onọ wha wo o da owhai ẹro.”—Ahwo Hibru 13:5.
Nẹnẹ na, eware nọ ahwo a bi ku gbe eware nọ a be zẹ i bu wo umuo ho, yọ a gwọlọ nọ ma re wo eware na kpobi. Rekọ Ebaibol na ọ ta nọ ‘onọ ma wo o da omai ẹro.’ Ẹvẹ ma sai ro fi ohrẹ nana họ iruo?
Whaha “uyoyou ugho.” Fiki “uyoyou ugho,” ahwo a bi ru eware nọ i re fi uzuazọ rai gbe orọ uviuwou rai họ ọza, je gbabọkẹ egbẹnyusu rai gbe izi Ọghẹnẹ. (1 Timoti 6:10) Ebẹbẹ nọ ahwo a bi fi omarai họ fiki ugho e rro kẹhẹ! Makọ epanọ ohwo o le ugho te kẹhẹ, Ebaibol na ọ ta nọ, “ohwo nọ o you ekwakwa efe,” ugho o rẹ dae ẹro ho.—Ọtausiuwoma Na 5:10.
Ahwo a wuzou vi ekwakwa eyero akpọ. Uzẹme riẹ họ, ekwakwa eyero akpọ i wo iruo kẹ omai. Rekọ ekwakwa nọ ma wo e rẹ sai you omai hi, ukpoye ahwo a rẹ sai you omai. “Emamọ ogbẹnyusu” o re fiobọhọ kẹ omai wo edẹro gbe evawere evaọ uzuazọ.—Itẹ 17:17.
MA SAI WO EVAWERE ENẸNA NỌ MA TE BI RU LELE EHRẸ EBAIBOL
EPANỌ WHỌ SAI RO THIHAKỌ ẸYAO
Ohrẹ nọ Ebaibol na ọ kẹ: “Udu nọ oghọghọ o rrọ yọ emamọ umu.”—Itẹ 17:22.
Wọhọ “emamọ umu,” oghọghọ o rẹ sai fiobọhọ kẹ omai thihakọ nọ ma tẹ be mọ. Rekọ ẹvẹ eva e sae rọ were ohwo dede nọ ọ be mọ?
Wo edẹro. Nọ ohwo ọ tẹ be hai roro kpahe ebẹbẹ riẹ ẹsikpobi, “edẹ uzuazọ riẹ kpobi” e rẹ jọ yoyoma. (Itẹ 15:15) Ebaibol na ọ ta nọ o mai woma re ma “hai dhesẹ nọ [ma] wo edẹro.” (Ahwo Kọlọsi 3:15) Jọ emeware esese dede e hae kẹ owhẹ evawere. Ọre nọ o bi kie diwi, omofou ọyẹyẹrẹ, gbe emiehwẹ nọ a re lele ohwo ta yọ eware nọ e rẹ sasa ohwo oma.
Hai fiobọhọ kẹ amọfa. O tẹ make rọnọ oma mai o ga tere he, ma rẹ sai ru eware iwoma kẹ amọfa ghele keme “ẹkẹ evawere e mae rrọ vi emio.” (Iruẹru Ikọ 20:35) Nọ amọfa a te yere omai fiki eware nọ ma ru kẹ ae, eva e rẹ were omai, yọ ma re gbe roro kpahe ebẹbẹ mai tere he. Ma re wo evawere evaọ uzuazọ nọ ma tẹ be hae daoma fiobọhọ kẹ amọfa.
EPANỌ A SAE RỌ BỌ ORỌO GA
Ohrẹ nọ Ebaibol na ọ kẹ: “Re wha ruẹsi vuhu eware nọ e mae roja.”—Ahwo Filipai 1:10.
Nọ ọzae-avọ-aye a gbẹ be raha oke kugbe ohwohwo tere he, a re wo ebẹbẹ evaọ orọo rai. Fikiere u wuzou gaga re ọzae-avọ-aye a rri orọo rai ghaghae—orọo rai o rẹ jọ usu eware nọ e mai wuzou evaọ uzuazọ rai.
Wha hai ru eware kugbe. O gwọlọ nọ ọzae-avọ-aye a re ru eware kugbe. Ebaibol na ọ ta nọ: “Imava i woma vi omọvo.” (Ọtausiuwoma Na 4:9) Wha rẹ sai there emu kugbe, zaharo kugbe, gbiku kugbe je kpohọ ore kugbe.
Dhesẹ nọ who you ọzae hayo aye ra. Ebaibol na ọ tuduhọ ezae-avọ-eyae awọ re a you ohwohwo jẹ rọ adhẹe kẹ ohwohwo. (Ahwo Ẹfisọs 5:28, 33) Ehwẹ nọ a rẹ hwẹ kẹ ohwohwo, ẹgbalọ hayo omokẹ nọ a rẹ kẹ ohwohwo e rẹ sae lẹliẹ orọo ga. Yọ u fo nọ owezẹ ọzae-avọ-aye o rẹ jọ rọkẹ aimava na ọvo.—Ahwo Hibru 13:4.