Ẹruore Vẹ Ọ Rrọ Rọkẹ Ahwo Nọ A Whu no?

Uwhu u bi kpomahọ omai kpobi nẹnẹ. Rekọ onọ na họ, ma te whu no yọ u re no? Kọ ahwo nọ a whu no a thọrọ ẹro no? Kọ ẹruore jọ ọ riẹ rọkẹ ahwo nọ a whu no?

OWARE NỌ EBAIBOL NA Ọ TA:

AHWO NỌ A WHU NO A RẸ THỌRỌ ỌGHẸNẸ ẸRO HO

“Enọ e rrọ iki ekareghẹhọ kpobi . . . a vẹ te nya via.”​—Jọn 5:28, 29.

Ọghẹnẹ ọ be kareghẹhọ ahwo nọ a whu no, yọ ọ te kpare ae zihe ziọ uzuazọ kẹle na.

A TE KPARE AHWO NỌ A WHU NO ZIHE ZIỌ UZUAZỌ EVAỌ OTỌAKPỌ NA

“Ẹkparomatha enọ i kiẹrẹe gbe enọ i kiẹrẹe he ọ te jọ.”​—Iruẹru Ikọ 24:15.

Ọghẹnẹ ọ te kpare ima ahwo buobu gbidi gbidi zihe ziọ uzuazọ evaọ otọakpọ na. Ahwo nana a te rria bẹdẹ bẹdẹ evaọ akpọ nọ udhedhẹ o te dafia.

ẸRUORE ẸKPAROMATHA NA U TI RUGBA

“[Ọghẹnẹ] o re kele unu isi na; o re se aikpobi odẹ.”​—Olezi 147:4.

Nọ orọnọ Ọghẹnẹ ọ rẹ sai se edẹ isi na kpobi na, u muẹro nọ ọ rẹ sae kareghẹhọ edẹ ahwo kpobi nọ ọ te kpare ze lọlọhọ.