Ẹyọrọ Eriwo Owowa ọrọ Kọmputa

¹ Pọl ukọ na ọ tuduhọ Ileleikristi evaọ ikpe-udhusoi ọsosuọ awọ inọ a kuvẹ re iroro rai i reghe he, keme ‘oke nọ u kiọkọ o rẹ kpẹkpẹe.’ (1 Kọr. 7:29) Nọ urere uyerakpọ nana o be kẹle na, ẹvẹ o kpata te k’omai re ma ‘kake gwọlọ Uvie na gbe ẹrẹreokie Ọghẹnẹ’ jẹ ‘dẹ uvẹ oke na’! Oke o re ghaghae.—Mat. 6:33; Ẹf. 5:15, 16.

² A jiri eriariẹ eware-ikuo no nnọ u re ru eware vẹrẹ gaga. Wọhọ oriruo, ẹkwoma ẹnẹ opoto kọmputa jọ ọvo, evuẹ nọ ohwo ọ rẹ ruẹ evaọ Itanẹte na ibadidi. Oware nọ kọmputa ọ rẹ sai ru evaọ emaharo gheghe, o rẹ sae rehọ euwa hayo eka buobu otẹrọnọ a rehọ edhere ọfa ru ei. A tẹ rehọ kọmputa ruiruo ziezi, u re fi obọ họ gaga.

³ Kọ O Sai Ghine Ru Ohwo Wo Oke Viere?: Evaọ abọdekọ riẹ, eware itieye na i re te ohwo obọ ababọ họ—e rẹ rehọ ugho gbe oke. O rẹ sae rehọ euwa buobu re a wuhrẹ epanọ a rẹ rọ rehọ kọmputa ruiruo. Ofariẹ, ohwo nọ kọmputa ọ kọ ruọ uzou no ọ sae raha oke nọ ọ hai ro ru eware efa nọ i w’uzou rọ keria aro kọmputa na ọvo. O gbahọ inọ ma wo eriwo owowa, kareghẹhọ ehri-uzi nọ o rrọ ohrẹ Pọl ukọ na inọ ma nya ‘wọhọ ahwo iwareghẹ, dẹ uvẹ oke na kẹ oma mai.’—Rri 1 Ahwo Kọrint 7:31.

⁴ Ahwo jọ nọ a wo emamọ iroro a ru ekwakwa kọmputa no enọ a re kere eware nọ i kpomahọ ukoko fihọ. Uzẹme, epanọ ohwo ọ rẹ rehọ kọmputa obọ riẹ ruiruo yọ ẹme obọ riẹ. Dede na, a re kere eware nọ i kpomahọ ukoko nọ a ru efọmo kẹ fihọ kọmputa ha, keme emaha gbe amọfa nọ a wo udu nọ a rẹ rọ rue rae he a sai rovie ai. Eware ukoko kpobi—enọ i kpomahọ ugho, ekade ọ Iruo Owhowho-Uvie Ukoko, gbe eware efa—e rẹ jọ efọmo nọ Ukoko u ru kẹ ae na, yọ a re fi evuẹ nọ e rrọ efọmo nana họ kọmputa ha. Evaọ edhere nana, a gbẹ nwani rovie eware ukoko na jọ via kẹ ahwo kpobi hi.

⁵ Esẹro orimuo a re rri otọ mu ziezi evaọ ẹghale eme evaọ Isukulu Odibọgba Esuo-Ọghẹnẹ na gbe omaa Ewuhrẹ Odibọgba na. U re woma re a roro kpahe ẹme nọ a bi ti ru evaọ abọ ewuhrẹ na. Wọhọ oriruo, evaọ isukulu na, orọnikọ ẹme kpobi a rẹ nwane kẹ ọmọ-uwuhrẹ kpobi ru hu. A re roro kpahe ẹjiroro ẹme na, epanọ ohwo na ọ riẹ te, gbe oghẹrẹ nọ ẹme na ọ rrọ. A rẹ nya siọ iroro-ejẹ nana ba kẹ kọmputa ha.

⁶ Oniọvo nọ a kẹ ẹme evaọ iwuhrẹ ukoko ọ rẹ rẹroso ẹme nọ ohwo jọ ọ ruẹrẹhọ no ho, maero ohwo jọ nọ ọ riẹ hẹ, fikinọ a fi ẹme na họ evie-evuẹ kọmputa nọ ọ rẹ sai rovie kpohọ gbe nnọ u ti ru eware vẹrẹ kẹe ọ tẹ tọlọ ẹme na no etẹe ze. Ileleikristi nọ e kpako a re dhesẹ oma ẹkwoma eme nọ a si no Ebaibol ze hayo abọjọ iwuhrẹ nọ a rẹ ruẹrẹhọ a ve fi ai họ evie-evuẹ kọmputa re amọfa a jọ etẹe rehọ ae ro ru ẹme he. Dede na, kọmputa avọ Watchtower Library ọrọ Ukoko nọ a fihọ CD-ROM na e rẹ sai fi obọ họ gaga kẹ oniọvo ru ekiakiẹ vẹrẹ evaọ oke nana nọ a be jọ wo uvẹ tere he na.

⁷ Kpahe ekwakwa kọmputa nọ ohwo jọ o ru nọ inievo a re kpeze se ohwohwo re a fihọ ọvuọ kọmputa rai, gbe kọmputa hayo edhere ọfa nọ a rẹ rọ ruẹrẹhọ jẹ ghale eme eva Ewuhrẹ Odibọgba gbe Isukulu Odibọgba Esuo-Ọghẹnẹ na, o rẹ mai woma re inievo na ọvo a ruẹrẹ eme rai họ, avọ eroro kpahe oware nọ o rẹ kẹ inievo ukoko rai erere. (1 Tim. 4:13, 15) Uvumọ ohwo ọ rẹ rehọ inievo na thueki hi.

⁸ Kọ ẹvẹ kpahe ikereakere nọ e rrọ oria Uwou-Eroro gbe oria nọ a be jọ Uwuhrẹ Obe Ukoko wuhrẹ nọ a rẹ rehọ kọmputa kere via? Whaọ, o rẹ mai woma re inievo na ọvo a kpoka họ Ebaibol na gbe obe nọ a bi wuhrẹ na. Re a rehọ kọmputa kere eme nọ e rrọ eria Ikereakere họ obe nọ a re kru họ obọ se evaọ ewuhrẹ, o rẹ wha oyẹlẹ fihọ Ebaibol nọ a re rovie jọ gwọlọ ikereakere. Ghele na, re a rovie Ebaibol jọ gwọlọ oria Ikereakere evaọ etoke uwuhrẹ Ebaibol hayo eva ewuhrẹ ukoko yọ abọjọ ewuhrẹ nọ a bi wuhrẹ omai, nọ o be ruẹrẹ omai kpahe kẹ emamọ eroruiruo Ebaibol na evaọ usiuwoma ota. Ẹsebuobu, yọ maero evaọ oria ikereakere nọ u theri gaga, re a se gbiae no Ebaibol na ze o mai woma, maero nọ a tẹ tuduhọ ogbotu na awọ inọ a lele isase na evaọ Ebaibol na.

⁹ Egbefẹ Ilogbo Efa: Wọhọ epanọ a dhesẹ evaọ ẹwẹ-obe avọ 17 ọrọ Uwou-Eroro ọ August 1, 1993 (ọrọ Oyibo), re ẹko ahwo jọ a wo evie-evuẹ ọvo kugbe nọ a rẹ sai fi evuẹ họ kẹ ohwohwo, o rẹ sae wha ebẹbẹ abọ-ẹzi ilogbo ze. Wọhọ epanọ ohwo oyoma ọ rẹ sai ru okwakwa kọmputa uyoma o ve vi ei kpohọ evie-evuẹ nọ a wo kugbe re o raha kọmputa amọfa na, ere ọvona ikọ-erue, isu-egagọ, gbe ahwo nọ e be gwọlọ raha uruemu amọfa a rẹ sai fi iroro enua rai họ evie-evuẹ nọ a wo kugbe. Makọ evie-evuẹ nọ a kere “JW Only” (Iseri Jihova Ọvo) fihọ, a gbe mu ẹro họ iẹe ziezi hi, re a je ru ei fihọ epanọ idibo ẹrọwọ Jihova nọ e kpako ziezi ọvo a sai ro fi evuẹ họ iẹe he, o rẹ sai ru Ileleikristi nọ i bi rovie evie-evuẹ na kie ruọ “usu uyoma.” (1 Kọr. 15:33) Iyẹrẹ i te iwou ogha obọ no inọ orọnikọ eme omuroro kpahe eware abọ-ẹzi ọvo a rehọ evie-evuẹ itieye nọ ahwo jọ ọvo a wo kugbe ta no ho rekọ a rehọ e rai kẹ ohrẹ uyoma no, vaha iguẹgu gbe evuẹ erue, kọ iroro iyoma họ ahwo eva, kpare enọ gbe avro nọ e raha ẹrọwọ ejọ no, jẹ vaha otofa obọ ahwo jọ kpahe Ikereakere na. Who te rri rie ehruehru, evuẹ jọ e rẹ sai siuru tube ru ohwo riẹ eware ekpokpọ dede, ghele na a sae rehọ eware enua wholo ai. Ileleikristi a rẹro so ‘ọrigbo nọ o wo ẹrọwọ avọ areghẹ na’ kẹ emu abọ-ẹzi ẹruoke gbe oruvẹ. (Rri Uwou-Eroro Na ọrọ July 1, 1994, ẹwẹ-obe avọ 9-11 [ọrọ Oyibo].) Oleleikristi kpobi o wo owha-iruo nọ ọ rẹ rọ thọ ẹrọwọ riẹ mukpahe eware ogbekuo kpobi yọ, oware jọ nọ u re fi obọ họ evaọ abọ nana họ, ọ rẹ yọrọ oma kpahe ohwo nọ o re lele nyusu.—Mat. 24:45-47; 2 Jọn 10, 11.

¹⁰ Uzoẹme Uwou-Eroro ovona u fi ẹgba họ epanọ u wuzou te re a rehọ adhẹẹ kẹ izi ọnọ o ru okwakwa jọ. Ekọmpene buobu nọ i re ru jẹ zẹ ekwakwa kọmputa a re ru izi lele ai, jẹ kẹ obe-udu nọ u re dhesẹ epanọ a rẹ rọ rehọ okwakwa na ruiruo nya lele uzi. Obe-udu na o rẹ ta nnọ ohwo nọ ọ dẹ okwakwa kọmputa na o re fi ei họ kọmputa riẹ no re o je fi iei họ kọmputa omọfa ha; evaọ uzẹme, uzi enọ i re ku ekwakwa evaọ akpọ-soso o rehọ e riẹ wọhọ uzi-othọ nọ ohwo o te ru ere. Ahwo uvo-uthei buobu a re rri emu hu nọ a tẹ be raha uzi na. Rekọ Ileleikristi a rẹ yọroma kpahe eme uzi, rehọ eware Siza kẹ Siza.— Mat. 22:21; Rom 13:1.

¹¹ Ekọmpene ilogbo jọ a rẹ zẹ kọmputa nọ a fi ekwakwa jọ nọ uzi u lele họ no. Dede na, iwou-eki kọmputa jọ a rẹ kẹ obe-udu ọ ekwakwa sa-sa nọ a fihọ kọmputa na ha keme a la uzi vrẹ rehọ ae no kọmputa efa ze fi ai họ kọmputa na, onọ u dhesẹ nọ, ọnọ ọ dẹ kọmputa na ọ raha uzi nọ a rẹ rọ rehọ okwakwa na ruiruo. Kpahe onana, Oleleikristi o re fi eware nọ uzi u lele fihọ evie-evuẹ hayo jọ evie-evuẹ rehọ eware nọ uzi u lele he (wọhọ ebe Ukoko na) ababọ uvẹ nọ o re mi ọnọ o wo obe-udu okwakwa na.—Hib. 13:18.

¹² Ohwo ọ rẹ rehọ erere nọ ọ rrọ eware kpobi nọ ahwo-akpọ a ku wawo enwoma nọ i re no eroruiruo rai ze. Dede nọ a rẹ sae rehọ etẹlivisiọno ruiruo wowoma, oghẹrẹ nọ u bi kpomahọ ahwo-akpọ yoyoma nẹnẹ o be tubẹ lẹliẹ enọ e rrọ Ileleikristi hi ruawa gaga. Evie-evuẹ kọmputa e dhẹ akpọ na soso wariẹ yọ e rẹ sae rehọ emamọ evuẹ nọ i wo oba ha ziọ uwou hayo oria iruo. I re fi obọ họ gaga evaọ eria akiruo je fi obọ họ kẹ ahwo nọ a gwọlọ ru eware obọ rai jọ hayo eware nọ i wo obọ kpahe akiruo rai evaọ akpọ nana nọ ọ be dhẹ kiti kiti na. Eva oke ovona, evie-evuẹ kọmputa e vọ avọ ifoto ẹbẹba, eme omukpahe nọ e rẹ wha ẹwhọ ze, gbe evuẹ buobu kpahe epanọ a re ro thuethu je ru eware iyoma.

¹³ Fikiere, uvi ẹjiroro buobu e riẹ nọ Oleleikristi o je wo eriwo owowa kpahe kọmputa. Ahwo buobu a be reawere Ebaibol ọ New World Translation, iko ọ Insight, gbe okwakwa nọ a re se GetVerse (Eduku Owọ Ebaibol) onọ Ukoko u ru fihọ idiskẹte (ekasẹte) kọmputa. Amọfa a wo erere no ẹkwoma eroruiruo Watchtower Library nọ a fihọ CD-ROM, onọ u wo abọ ekiakiẹ efa buobu. Dede nọ eware jọ nọ a ku i wo erere, ohwo nọ ọ be rehọ eware enana ruiruo evaọ edhere nọ ọ rẹ kẹ erere ọ rẹ jẹ yọroma re ọ thọ oma riẹ gbe amọfa no abọ oyoma ekwakwa nana. U fo nọ ma rẹ yọroma re makọ emamọ eroruiruo eware nọ a ku o gbẹ rehọ abọ buobu oke mai nọ ma ro mudhe kẹ Ọghẹnẹ no hayo reghe iroro mai no ugogo iruo gbe itee mai hi.—Mat. 6:22; 28:19, 20.