‘Dao Ẹgba Ra Kpobi’
1 Okenọ ma rehọ oma mai mudhe kẹ Jihova, ma yeyaa nọ ma rẹ rọ ẹgba mai kpobi ruiruo kẹe. Nwani fo, Pita ukọ na ọ tudu họ Ileleikristi ikpe-udhusoi ọsosuọ awọ nọ a dao ẹgba rai kpobi re edikihẹ rai evaọ aro Jihova u muẹro. (2 Pita 1:10) Ma ghinẹ gwọlọ dao ẹgba mai kpobi re ma ru Jihova eva were evaọ egagọ riẹ nẹnẹ. Eme onana o gwọlọ? Nọ usu mai kugbe Jihova u bi diwi na yọ ma bi roro kpahe eware kpobi nọ o ru k’omai na, udu mai o rẹ w’omai oke kpobi re ma ru utho ẹgba mai evaọ iruo riẹ. Ma gwọlọ ru ẹnyaharo evaọ ewoma odibọgba mai, yọ o tẹ lọhọ, ma gwọlọ ru bu viere dede.—Ol. 34:8; 2 Tim. 2:15.
2 Oniọvo ọmoha jọ nọ ọ gwọlọ nọ o re ru bu viere evaọ odibọgba na ọ ruẹ nọ Ẹme Ọghẹnẹ nọ o re wuhrẹ ẹsikpobi u ru ovuhumuo riẹ kẹ Jihova diwi viere o tẹ jẹ kẹe ọwhọ buobu. Onana o tẹ wọe re o fi obe họ kẹ iruo ọkobaro na. Oniọvo-ọmọtẹ jọ nọ o jọ bẹbẹ kẹ re ọ t’ẹme kugbe erara o te wuhrẹ emuhọ eme jọ nọ e rọ omobe ọ Ebaibol E rọ Jiroro na yọ u kri hi o te muọ emamọ iyẹrẹ họ ewo evaọ odibọgba riẹ. Ọ tẹ sai wuhrẹ Ebaibol kugbe ọzae avọ aye enọ e jẹ uzẹme na rehọ.
3 Ghọghọ Evaọ Utho nọ Whọ Sai Ru: Uye u re te ibuobu mai oma wọhọ ẹyao, ọwọsuọ uviuwou, uvuhu, hayo ababọ ẹmeoyo kẹ usiuwoma ota mai evaọ ẹkuotọ na. Ebẹbẹ efa buobu nọ e rọ odode evaọ edẹ urere enana e rẹ sae bru usiuwoma mai dhe. (Luk 21:34; 2 Tim. 3:1) Kọ onana u dhesẹ nọ ma kie no omarọkẹ Jihova mai no? O rọ ere he otẹrọnọ ma bi ru utho ẹgba mai kpobi.
4 O rọ oware areghẹ hẹ re ma rehọ oware nọ amọfa a bi ru ro gu oma mai ẹdhọ. Ukpoye, Ikereakere na e tudu họ omai awọ nọ “kohwo kohwo o dhesẹ iruo riẹ via.” Re ma dao ẹgba mai kpobi te epanọ ẹgba mai o te o rẹ were Jihova o vẹ jẹ k’omai ‘ẹjiroro oghọghọ.’—Gal. 6:4; Kọl. 3:23, 24.
5 Joma yo eme Pita re ma ‘dao ẹgba mai kpobi re Ọghẹnẹ ọ ruẹ omai ababọ epe hayo afuẹwẹ, rekọ evaọ udhedhẹ.’ (2 Pita 3:14) Uruemu oyena u re ru omai wo omofọwẹ o vẹ jẹ wha udhedhẹ udu nọ Jihova ọvo ọ rẹ kẹ s’omai.—Ol. 4:8.