Ẹrọwọ O Wo Osohwa
1 Eva obe Ahwo Hibru 11:6 a ta k’omai nọ Ọghẹnẹ “ọ rẹ te hwosa kẹ e nọ e guọlọ e riẹ.” Edhere jọ nọ ọ rẹ rọ hwosa kẹ idibo omarọkẹ riẹ nọ i dhesẹ ‘ẹrọwọ eva eware ekakao’ họ, ọ rẹ ‘rẹhọ ai muẹ uzou eware buobu.’ (Mat. 25:23) Koyehọ, ẹsibuobu Jihova ọ rẹ hwosa kẹ iruo ezi ẹkwoma uvẹ iruo efa nọ o re fiba rọkẹ isẹri ẹrọwọ.
2 A hwosa kẹ ẹrọwọ Pọl ukọ na ẹkwoma odibọgba nọ a rehọ e riẹ mu nọ o wha riẹ te ikpewho avọ iwhre ọ Europe gbe Esia Minor. (1 Tim. 1:12) Dede nọ o rehọ omodawọ ogaga re ọ sai ru odibọgba riẹ gba vọvọ, Pọl ọ rehọ uvẹ nọ u te rie obọ na ghaghae. (Rom 11:13; Kọl. 1:25) O dhesẹ ovuhumuo nọ u n’udu ze ẹkwoma uvẹ usiuwoma ota nọ ọ jẹ gwọlọ avọ osegboja. Ẹkwoma iruo ajọwha riẹ, o dhesẹ vevẹ nnọ ọ jẹ rehọ ẹrọwọ riẹ ruiruo. Oriruo riẹ o rẹ w’omai re ma rri uvẹ iruo mai ghaghae.
3 Jihova Ọ k’Omai Odibọgba No: Ẹvẹ ma re ro dhesẹ eriwo uvẹ osohwa ovo nana nọ Pọl o dhesẹ na? Ma rẹ gwọlọ idhere nọ ma re ro ru ẹkẹ abọ mai vihọ evaọ odibọgba na. Ma rẹ rehọ uvẹ kpobi nọ u rovie ro sisẹri ọnyakuo jegbe ọrọ n’uwou r’uwou. Ma re muẹrohọ ahwo nọ e rọ uwou hu kpobi je zihe bru enọ i wo isiuru kpobi. Yọ ma rẹ nya lele ọtamuo nọ ma ru kpahe obe uwuhrẹ Ebaibol na.
4 Kiekpahe odibọgba mai, Pọl ọ k’ohrẹ nọ: “Mu ọwhọ riẹ.” (2 Tim. 4:2) Oware nọ a re muọwhọ riẹ o gwọlọ ezọgaviẹ kẹ kpatakpata. Kọ ma bi muọwhọ evaọ odibọgba mai, bi fi ei họ oria ọsosuọ evaọ uzuazọ mai? Wọhọ oriruo, ma rẹ k’uvẹ hẹ re iruẹru oma-sasa gbe ilale omobọ mai efa evaọ urere oka na i kpeke họ oke nọ u fo nọ ma rọkẹ iruo odibọgba na. Nọ u mu omai ẹro nọ urere eyero ọnana o bi sikẹle kpatakpata na, u mu omai ẹro re nọ ẹta usiuwoma Uvie na họ iruo nọ e mai w’uzou nọ ma re ru.
5 Ẹrọwọ nọ ma re fihọ Ọghẹnẹ o re dhesẹ oma via ẹkwoma oruọzewọ gbe omurokpotọ nọ ma re dhesẹ kẹe jegbe iruo nọ ọ k’omai nọ ma re ru kẹse kẹse. Joma ru odibọgba mai vọvọ, re Jihova ọ ruẹse hwosa kẹ ẹrọwọ mai evaọ edhere ologbo.