Jọ Odibọgba na Daoma Vi Epaọ Ọsosuọ
1 Pọl ukọ na ọ tuduhọ Ileleikristi awọ inọ a nya evaọ edhere Ọghẹnẹ je “he dhei erueruo.” (1 Tẹs. 4:1) Eme onana u dhesẹ? Edhere jọ họ ma rẹ gwọlọ idhere nọ ma re ro te kẹ iruẹru abọ-ẹzi efa ẹsikpobi, daoma ẹsikpobi re ma ‘ru iruo usiuwoma ota mai gba.’—2 Tim. 4:5.
2 Oware nọ O be Wọ Omai: Isiuru nọ ma rọ gwọlọ gọ Ọnọ ọ ma omai vọvọ oye o rẹ w’omai daoma vi epaọ ọsosuọ evaọ odibọgba mai. Ma gwọlọ wo ẹnyaharo abọ-ẹzi jẹ gwọlọ idhere nọ ma re ro wo ẹnyaharo evaọ odibọgba mai. Emamọ omaa nọ ma re wo avọ uvi ẹjiroro u ti fiobọhọ k’omai nyate itee abọ-ẹzi.—Ol. 1:1, 2; Fil. 4:6; Hib. 10:24, 25.
3 Oma nọ ma rẹ dawo re ma ru odibọgba mai kẹre o gwọlọ nọ ma re wo ẹzi-okẹ, gbe ẹzi omolahiẹ kẹ amọfa. Ma rẹ sai wo ẹzi otiọye ẹkwoma oriruo Jesu nọ ma re roro kpahe jẹ raro kele. (Mat. 20:28) Jesu o wo oghọghọ ulogbo no obọ nọ o je fihọ kẹ amọfa ze evaọ odibọgba riẹ. (Iruẹru 20:35) Ma rẹ sae rọ aro kele Jesu ẹkwoma isiuru nọ ma re dhesẹ kpahe amọfa je muẹrohotọ kẹ uvẹ kpobi nọ u rovie fihọ nọ ma sai ro ru odibọgba mai kẹre.—Aiz. 6:8.
4 Ẹkabọ Esẹgbini: A rẹ sae bọ isiuru nọ a re ro fiobọhọ kẹ amọfa je ru odibọgba mai kẹre họ emọ no oke ọmaha ze. Emaha na a re muẹrohọ epanọ ahwo uviuwou rai a be rọ osegboja wobọ jẹ rọ ọwhọ ru odibọgba rai kẹre. Fikinọ ọmoha jọ o je kuomagbe ọsẹ-ologbo riẹ ru iruo ukoko na sa-sa, oma o wọ riẹ ru odibọgba riẹ kẹre. Nọ ọ ruẹ oghọghọ avọ osegboja nọ ọsẹ-ologbo riẹ o bi ro ruiruo, oma o tẹ wọe nọ ọ rọ gwọlọ uvẹ nọ o re ro fiobọhọ kẹ inievo abọ-ẹzi riẹ. Odibo oruiruo ọ rrọ enẹna.
5 Ẹgwọlọ kẹ Inievo-Emezae: ‘Otẹrọnọ ohwo jọ ọ guọlọ ọkwa iruo . . . , yọ okpiruo ọ guọlọ na.’ (1 Tim. 3:1) Eme nana e ta udu họ inievo-emezae awọ re a te kẹ uvẹ iruo efa evaọ ukoko Jihova. Orọnikọ onana o gwọlọ ona obọdẹ jọ hayo oghẹrẹ ẹgba obọdẹ jọ họ. Oniọvo-ọmọzae nọ ọ gwọlọ te kẹ ọkwa-iruo ọ rẹ rọ isiuru Uvie na karo jẹ rọ ajọwha ru iruo odibọgba na ziezi. (Mat. 6:33; 2 Tim. 4:5) Ọ rẹ daoma jọ emamọ oriruo kẹ amọfa.
6 Akpọ-Soso: Jihova o bi ru iruo ekoko na vẹrẹ. (Aiz. 60:22) Ẹgwọlọ ọkpakpata ọ riẹ kẹ ahwo kpobi nọ a bi lele oriruo Jesu re a jọ odibọgba rai ru vi epaọ ọsosuọ. Iyẹrẹ iruo akpọ so-so erọ ukpe iruo 2006 na i dhesẹ nọ ahwo 248,327 a họ-ame. Yọ a tẹ ghale iẹe fihọ ukpe na soso, koyehọ ahwo nọ a bu vrẹ 680 a jẹ họ-ame kẹdẹ kẹdẹ! Jọ mai kpobi ma gwọlọ idhere nọ ma re ro ru odibọgba mai kẹre vi epaọ ọsosuọ.