Izoge, Kọ Wha be Daoma Te kẹ Ewha-Iruo?
1. Oke vẹ u fo nọ oniọvo-ọmọzae o re ro mu ẹme nọ ọ rrọ 1 Timoti 3:10 na họ efihiruo?
1 Ebaibol na ọ ta nọ: “Otẹrọnọ ohwo jọ ọ guọlọ ọkwa. . . , yọ okpiruo ọ guọlọ na.” (1 Tim. 3:1) Ẹme nana o be tuduhọ inievo-emezae awọ re a daoma te kẹ idibo iruiruo gbe ekpako evaọ ukoko na. Kọ whọ rẹ kpako no taure who te ti ru ere? Uzẹme na họ, o rẹ mai woma re who muọ oma họ ẹdawo evaọ okenọ whọ gbẹ rrọ uzoge. Nọ who te bi ru ere, amọfa a ve fi obọ họ kẹ owhẹ ruẹrẹ oma kpahe kẹ iruo na, who ve ti te kẹ odibo oruiruo nọ whọ tẹ dina kpako no. (1 Tim. 3:10) Otẹrọnọ whẹ yọ uzoge nọ ọ họ-ame no, ẹvẹ whọ sai ro te kẹ odibo oruiruo?
2. Ẹvẹ whọ sai ro wo ẹzi obufihọ kẹ amọfa, kọ eme who re ru ro fi obọ họ?
2 Fi Obọ Họ kẹ Amọfa: Kareghẹhọ nọ obọdẹ iruo whọ be daoma te kẹ na orọnikọ okpodẹ hẹ. Fikiere, daoma hai fi obọ họ kẹ inievo ukoko na. Whọ rẹ sai ru onana nọ who te roro didi kpahe oghẹrẹ nọ Jesu o ro fi obọ họ kẹ amọfa. (Mat. 20:28; Jọn 4:6, 7; 13:4, 5) Lẹ se Jihova re o fi obọ họ kẹ owhẹ gwọlọ ewoma amọfa. (1 Kọr. 10:24) Kọ whọ sai fi obọ họ kẹ inievo nọ e kpako no hayo enọ oma o ga ha? Kọ whọ be hae fialoma via re whọ gbẹ ẹbẹ, hwere, hayo ru iruo efa evaọ Ọgwa Uvie na? Otẹrọnọ oniọvo jọ nọ a kẹ ẹme evaọ Isukulu Odibọgba na ọ ziọ ewuhrẹ hẹ, kọ whọ sai ru ẹme na? Whọ te ruẹ nọ eva e te were owhẹ nọ who te bi fi obọ họ kẹ amọfa.—Iruẹru 20:35.
3. Fikieme o rọ gwọlọ nọ ohwo o re kruga evaọ ukoko na, kọ ẹvẹ ohwo ọ sai ro kruga?
3 Kruga Evaọ Ukoko Na: Emamọ usu nọ ohwo o re wo kugbe Ọghẹnẹ o roja vi obọdẹ onaa jọ nọ o re wo. Ohwo nọ o kruga evaọ ukoko na o re rri eware wọhọ epanọ Jihova avọ Jesu a bi rri rai. (1 Kọr. 2:15, 16) Oniọvo otiọye na ọ rẹ mọ “ubi Ẹzi” na. (Gal. 5:22, 23) Ọ rẹ rọ usiuwoma Uvie na karo. (Mat. 6:33) O re ru uwuhrẹ omobọ riẹ kẹse kẹse nọ o rẹ lẹliẹe wo emamọ uruemu. O re se Ebaibol na kẹdẹ kẹdẹ, daoma se Uwou-Eroro gbe Awake! kpobi nọ o kpozi, ruẹrẹ oma kpahe kẹ iwuhrẹ je kpohọ iwuhrẹ na. (Ol. 1:1, 2; Hib. 10:24, 25) Okenọ Pọl ọ jẹ ta kẹ Timoti nọ o wo ẹnyaharo evaọ ukoko na, o kere sei nọ: “Sẹro . . . uwuhrẹ ra.” (1 Tim. 4:15, 16) Fikiere, nọ a tẹ kẹ owhẹ ẹme evaọ Isukulu Odibọgba na, daoma ru ei ziezi. Ruẹrẹ oma kpahe kẹ usiuwoma ota, jẹ hai kpohọ usiuwoma ẹsikpobi. Fi itee họ nọ who re le t’obọ, wọhọ iruo ọkobaro, iruo Ebẹtẹle, hayo Isukulu Ebaibol Rọkẹ Inievo-Emezae nọ E re Rọo Ho. Nọ who te kruga evaọ ukoko na, who ti “si omano urusio ogena.”—2 Tim. 2:22.
4. Fikieme o rọ roja re ma jọ ahwo nọ a re fievahọ?
4 Jọ Ohwo nọ A re Fievahọ: Fikinọ inievo nọ a ro mu re a ghale emu kẹ Ileleikristi nọ ọbẹwẹ ọ jọ oma evaọ ikpe-udhusoi ọsosuọ na a jọ ahwo nọ a “fa odezi whawha,” koyehọ ahwo nọ a re fievahọ, ikọ na a jẹ ruawa vievie he inọ a te riẹ iruo na ru hu. Onana o kẹ ikọ na oke ziezi nọ a rọ tẹrovi eware efa nọ i wuzou. (Iruẹru 6:1-4) Fikiere, nọ a tẹ kẹ owhẹ owha-iruo jọ evaọ ukoko na, romatotọ ru ei. Rọ aro kele Noa nọ ọ romatotọ ru oware kpobi nọ Ọghẹnẹ ọ ta kẹe kpahe ebabọ okọ na. (Emu. 6:22) Ohwo nọ a re fievahọ yọ ohwo nọ o wo usu okpekpe kugbe Ọghẹnẹ, yọ Jihova o re rri ohwo otiọye na ghaghae.—1 Kọr. 4:2; rri ẹkpẹti na “O Roja re A Wuhrẹ Amọfa.”
5. Fikieme izoge a rẹ rọ daoma te kẹ ewha-iruo?
5 Jihova o bi ru iruo Uvie na vẹrẹ, wọhọ epanọ Aizaya ọ ruẹaro riẹ. (Aiz. 60:22) Nọ a tẹ ghale iẹe, ahwo nọ a be họ-ame kukpe kukpe a bu te idu egba ivẹ gbe udhuvẹ gbe ikpe (250,000). Fikinọ ahwo buobu a bi kurẹriẹ ziọ ukoko na, ma gwọlọ inievo-emezae nọ a re ro mu idibo iruiruo gbe ekpako. Enẹna, iruo e vọ ukoko Jihova vi epaọ anwẹdẹ. (1 Kọr. 15:58) Izoge, kọ wha be daoma te kẹ ewha-iruo? Otẹrọ ere, yọ emamọ iruo dẹẹ wha gwọlọ na.
[Ẹme nọ a fi ẹgba họ nọ ọ rrọ ẹwẹ-obe avọ 2]
Fikinọ ahwo buobu a bi kurẹriẹ ziọ ukoko na, ma gwọlọ inievo-emezae nọ a re ro mu idibo iruiruo gbe ekpako
[Ẹkpẹti nọ o rrọ ẹwẹ-obe avọ 3]
O Roja re A Wuhrẹ Amọfa
Izoge a re wo erere nọ ekpako ukoko a tẹ be hae kẹ ae iruo je dhesẹ epanọ a re ru iruo na kẹ ae. Ẹdẹjọ nọ ewuhrẹ o kuhọ no, ọsẹro ọnyawariẹ ọ tẹ keria obọ eplatfọmo be tuduhọ oniọvo jọ awọ. O te muẹrohọ nọ ọmọzae ọmaha jọ o dikihẹ kẹle etẹe, fikiere ọ tẹ nọe sọ ọ gwọlọ ta ẹme jọ kẹe. Ọ tẹ ta kẹe nọ ọye a kẹ iruo ehwere eplatfọmo na nọ ewuhrẹ o te kuhọ no. Ọsẹgboni riẹ a gwọlọ kpo, rekọ ọ gwọlọ ru iruo na no taure o te ti kpo. Ọsẹro ọnyawariẹ na o te no etẹe. Ọ ta nọ: “Ekpako ukoko yena a bi fi obọ họ kẹ izoge na te kẹ ewha-iruo. Fikiere, ẹsikpobi nọ mẹ kpahe ukoko na, ekpako na a rẹ fodẹ oniọvo-ọmọzae jọ nọ a roro nọ o te kẹ odibo oruiruo no.”