Ma Gwọlọ Obufihọ Ra
1 “Whai kobiruo eva eware kpobi nọ wha ru k’omai. Iruo rai i gine fiobọhọ k’omai gaga.” Eme yena e nwani dhesẹ uyere nọ ma rẹ kẹ ekpako gbe idibo iruiruo Ileleikristi nọ e rrọ kugbe omai. Nọ ukoko Ọghẹnẹ o be rro haro na, ẹgwọlọ ọ gbẹ riẹ kẹ ezae nọ i te ziezi nọ i re ruiruo evaọ ikoko nọ i bu te oware wọhọ 100,000 evaọ akpọ na soso. Otẹrọnọ whẹ yọ oniọvo-ọmọzae nọ ọ họ-ame no, ma gwọlọ obufihọ ra.
2 ‘Ete kẹ Ọkwa’: Ẹvẹ whọ sai ro te kẹ ekwa iruo efa eva ukoko na? (1 Tim. 3:1) Wọhọ epanọ o rẹ jọ, ẹkwoma emamọ oriruo nọ who re dhesẹ evaọ kabọ kabọ uzuazọ ra. (1 Tim. 4:12 Tait. 2:6-8; 1 Pita 5:3) Wobọ vọvọ evaọ iruo usiuwoma ota na, je fiobọhọ kẹ amọfa ru epọvo na. (2 Tim. 4:5) Wo uvi isiuru kpahe eware nọ i kpomahọ ibe Ileleikristi ra. (Rom 12:13) Jọ emamọ ọmọ-uwuhrẹ Ẹme Ọghẹnẹ, je wo ‘ona uwuhrẹ.’ (Tait. 1:9; 1 Tim. 4:13) Rọ ẹro te iruo kpobi nọ ekpako ukoko na a rọ kẹ owhẹ ziezi. (1 Tim. 3:10) Otẹrọnọ whẹ yọ ohwo nọ o wuzou uviuwou, ‘su uviuwou ra ziezi.’—1 Tim. 3:4, 5, 12.
3 Re a rọ ohwo mu ọkwa o gwọlọ iruo egaga gbe ẹzi omarodheidhe. (1 Tim. 5:17) Fikiere, nọ whọ be daoma te kẹ ọkwa iruo na, tọ ẹro vi epanọ whọ rẹ rọ gbodibo kẹ amọfa avọ omarokpotọ. (Mat. 20:25-28; Jọn 13:3-5, 12-17) Roro kpahe uruemu Timoti, jẹ daoma rọ aro kele iei. (Fil. 2:20-22) Wọhọ Timoti, jọ uruemu uwoma ra u dhesẹ owhẹ via. (Iruẹru 16:1, 2) Nọ whọ be daoma wo ekwakwa abọ-ẹzi nọ o gwọlọ re a rọ ẹro te ewha-iruo efa na, je bi fi ohrẹ kpobi nọ a kẹ owhẹ kpahe epanọ whọ sai ro wo ẹnyaharo họ iruo na, ‘ahwo kpobi a te ruẹ ẹnyaharo ra.’—1 Tim. 4:15.
4 Esẹgbini, Wha Wuhrẹ Emaha na re A Fiobọhọ: Emọ e rẹ sai wuhrẹ epanọ a re ro fiobọhọ no emaha ze. Wuhrẹ ai re a gaviezọ evaọ iwuhrẹ ukoko, epanọ a rẹ rọ ta usiuwoma, re a je wo emamọ uruemu nọ a rẹ rọ aro kele evaọ obọ Ọgwa Uvie gbe obọ isukulu. Wuhrẹ ai epanọ a re ro wo evawere evaọ obọ ufihọ kẹ amọfa, wọhọ abọ o wo evaọ erufuọ Ọgwa Uvie, obọ nọ a re fihọ kẹ ahwo nọ a kpako no, gbe eware efa. Fiobọhọ kẹ ae re a ruẹ oghọghọ nọ u re no okẹ nọ a rẹ kẹ ze. (Iruẹru 20:35) Iwuhrẹ itieye na nọ a rẹ kẹ ae e rẹ sai fiobọhọ kẹ ae jọ ekobaro, idibo iruiruo, gbe ekpako ukoko evaọ obaro.