Idhere nọ Whọ Sai ro Ru Odibọgba Ra Kẹre
1 Bu vi ikpe 40 nọ e vrẹ, uzoẹme nọ o ta nọ “Kọ Whọ Be Dao Ẹgba Ra Kpobi?” o roma via evaọ Uwou-Eroro Na orọ January 15, 1955 (ọrọ Oyibo). Evaọ edhere oyoyou o riobọ họ epanọ o sae rọ lọhọ kẹ ahwo Jihova re a ru ẹnyaharo evaọ omodawọ rai evaọ odibọgba na re a ruẹsi ru iruo Uvie rai vi haro. Emamọ ohrẹ oyena u w’iruo nẹnẹ re, nọ ma gbe bi ru ẹnyaharo viere na.
2 U fo re ujaje nọ o mae rro na o jọ emu ọ iruẹru mai kpobi: “Whọ rẹ rehọ eva ra kpobi, gbe ẹzi ra kpobi, gbe iroro ra kpobi, gbe ogaga ra kpobi, you Ọnowo na Ọghẹnẹ ra.” (Mak 12:30) Ma re dhesẹ uyoyou ovọvọ mai kẹ Jihova ẹkwoma uvẹ orọ erukparo ọ iruo Uvie riẹ nọ ma re ro ruiruo vọvọ. Roro kpahe idhere enana nọ whọ sai ro ru odibọgba ra kẹre.
3 Wọ Owha-Iruo Ra: Inievo-emezae nọ e roma mudhe no a rẹ sai te wọhọ idibo iruiruo jẹ nyaharo te ekpako ukoko. Izoẹme na “Kọ Who bi Ru Ẹnyaharo?,” gbe “Kọ Who te kẹ Iruo?,” evaọ Uwou-Eroro Na ọrọ September 1, 1990 (ọrọ Oyibo), e wọ inievo-emezae buobu no re a rehọ oma rai kẹ ewha-iruo ukoko. Nọ mi ekpako ukoko ra kẹ ugogo ẹjiroro kpahe epanọ whọ sai ro ru ẹnyaharo je te.
4 A zizie ekpako ukoko gbe idibo iruiruo nọ e te rọo ho re a roro gaga kpahe obe-ufihọ kẹ Isukulu Ewuhrẹ Odibọgba na. Whọ sae riẹ kpahe isukulu nana ẹkwoma ese ọrọ eria nọ e rrọ otọ “Ministerial Training School” evaọ Watch Tower Publications Indexes erọ 1986-1995, 1996, gbe 1997. Kọ whọ be ruẹ ‘ẹthẹ ologbo ọrọ iruo’ yena nọ o rovie fihọ k’owhẹ na? (1 Kọr. 16:9a) Inievo-emezae buobu nọ e nya rueva riẹ no a kpaova ruẹ uvẹ-ọghọ iruo kpobi nọ e rrọ abọ obei riẹ na vẹre he. Nẹnẹ na a be reawere iruo evaọ Ebẹtẹle hayo obọ otafe wọhọ ekobaro obodẹ, imishọnare, hayo esẹro okogho.
5 Nyaharo kẹ Iruo Odibọgba Oke-Kpobi: U fo re izoge nọ i bi nwrotọ no isukulu ilogbo ze, eyae uwou-orọo, gbe ohwo kpobi nọ ọ kpako te eriosehọ-n’iruo no a roro kpahe iruo ọkobaro gaga. Makọ inievo nọ e rrọ okọ gbe enọ e rrọ iruo egọmeti a be sai ru iruo ọkobaro oke-kpobi, maero enẹna nọ a go ute euwa na kpotọ no na. Kiẹ uko-obeva ọ Odibọgba Uvie Mai ọrọ July 1998 riwi, whọ vẹ t’ẹme kugbe ekobaro nọ iyero rai e wọhọ erọ uzuazọ ra. Ẹsejọhọ o te w’owhẹ re who ru odibọgba ra kẹre haro ẹkwoma iruo ọkobaro, wọhọ epanọ a bi ru na. (1 Kọr. 11:1) Kọ ẹvẹ o sae rọ lọhọ re who ru iruo ra kẹre te euwa 70 evaọ amara re whọ rehọ ere ru iruo wọhọ ọkobaro oke-kpobi?
6 Bu vi inievo 17,000 i bi ruiruo enẹna evaọ iwou-ogha gbe Ebẹtẹle wariẹ akpọ na họ. Ẹwẹ-obe avọ 116-118 ọrọ Organized to Accomplish Our Ministry o ta kpahe oware nọ o gwọlọ re a fi obe họ kẹ iruo itieye na. Kọ eme who gbe sei re whọ ruẹ sọ whọ sai te kẹ uvẹ obọdẹ orọ iruo Ebẹtẹle he?
7 Ruiruo Evaọ Oria nọ Ẹgwọlọ na Ọ jẹ Mae Rro: Kọ whọ be rria ẹkwotọ nọ a re ru kẹse kẹse hayo oria nọ inievo buobu e be jọ wọ owha na? Kọ who roro kpahe erukẹre ọ odibọgba ra no ẹkwoma ẹkwa kpohọ oria nọ ẹgwọlọ na ọ jẹ mae rro? Ẹsejọhọ whọ sae kwa kpohọ oria ekẹloma nọ a jọ gwọlọ iruiruo. (Mat. 9:37, 38) A rẹ rehọ okpakpa ru onana ha. O gwọlọ eroro kpahe evaọ oma olẹ. (Luk 14:28-30) Lele ekpako ukoko gbe ọsẹro okogho ra t’ẹme kpahe uyero ra. A ti lele owhẹ j’iroro sọ u fo re whọ kwa oghẹrẹ utioye enẹna hayo re whọ ruẹrẹ oma kpahe kẹ ere oruo evaọ obaro. Otẹrọnọ whọ gwọlọ kere se Society re a j’iroro oria nọ whọ rẹ kwa nya, ileta nọ Ogbẹgwae Iruo Ukoko ra a kere jẹ whobọhọ i re lele ileta ra na hrọ.
8 Ru Aghare Iruo Ra Nyaharo: Ẹsejọhọ ma rẹ sai w’obọ evaọ odibọgba na vọvọ viere ẹkwoma aghare usiuwoma ota mai nọ ma re ru kpehru. Kọ who bi w’obọ evaọ abọ iruo na kpobi, te isẹri-ise ọ n’uwou ruọ uwou gbe orọ ọnyakuo jegbe iruo ozihebro gbe uwuhrẹ Ebaibol? Otẹrọnọ who wo obe uwuhrẹ jọ, kọ whọ sai ru ona ewuhrẹ ra woma viere? U woma re whọ kiẹ uko-obeva ọ Odibọgba Uvie Mai ọrọ June 1996 riwi kpahe iroro-ejẹ nọ whọ sai ro ruiruo re whọ tuduhọ ọmọ-uwuhrẹ ra awọ kpohọ omaromudhe gbe ame-ọhọ.
9 Eme buobu kpahe idhere nọ ma re ro ru ẹnyaharo evaọ odibọgba mai e rrọ uzou avọ 9 orọ Organized to Accomplish Our Ministry. Uzẹme, u fo re mai kpobi ma gwọlọ ru utho ẹgba mai evaọ iruo Ọghẹnẹ. Kọ eme who gbe roro kpahe ute abọ-ẹzi ra gaga ha? Ru wọhọ epanọ 1 Timoti 4:15 o fodẹ na: “He dhe iruo enana erueruo, rehọ uvẹ ra kpobi kẹ ae, re ahwo kpobi a ruẹ ẹnyaharo ra.”