Ẹkpẹti Onọ

◼ Didi oma esẹ gbe ini e rẹ yọrọ evaọ okenọ emọ esese rai i te bi w’obọ evaọ usiuwoma ota?

Esẹ gbe ini Ileleikristi a rẹ wha emọ rai lele oma ziezi kpohọ usiuwoma ota, wuhrẹ ai re a ghale emamọ usi Uvie na kugbe amọfa. Evaọ ere oruo, o gwọlọ re a fiẹrohọ emọ esese rai fiki enwoma nọ e rẹ sae jọ ẹkwotọ na, makọ evaọ okegbe nọ “ufuoma” o mae rrọ. Ẹsebuobu, emọ e rẹ mai kie ruọ ozighi gbe ọgbahọ fiki uvuthei gbe ogbekuo ọ owezẹ ezaveyae nọ i bi vihọ evaọ “oke ẹbẹbẹ” nana nọ ma be rria na. (2 Tim. 3:1-5) O gwọlọ re esẹ gbe ini a yọrọ oma ziezi re a sẹro emaha rai no obọ ahwo nọ a gwọlọ raha ae. Kọ eme a rẹ sai ru?

Ebaibol na ọ kẹ ohrẹ areghẹ inọ ma yọrọ oma je roro kparo kpahe enwoma obaro. (Itẹ 22:3; Mat. 10:16) Orọnikọ ẹjiroro na họ re ma fi izi họ họ, rekọ o rọ oware areghẹ kẹ ọyewọ hayo ekpako efa re a lele emọ rai okenọ a te bi kpohọ usiuwoma. Otẹrọnọ emaha ivẹ nọ e kpako no omojọ a rrọ usu, u fo re ọsẹ hayo oni hayo ọkpako ọfa jọ ọ hai fiẹrohọ ae oke kpobi. Uzẹme, nọ ọmọ ọ be kpako je wo areghẹ na, ọsẹ gbe oni a rẹ sae jiroro sọ o gwọlọ re a kẹe uvẹ omojọ.—Je rri Ẹkpẹti Onọ evaọ Odibọgba Uvie Mai ọrọ October 1992 (ọrọ Oyibo).

O tẹ jẹ rọ oware areghẹ re a wo iroro omofọwẹ h’eva evaọ okenọ a tẹ rọ omoto bi kpohọ erẹ gbe a tẹ be nya onya. Oma nọ a rẹ yọrọ ziezi o rẹ whaha asidẹnte gbe owha ulogbo orọ edada, araha imu, gbe ewha uzi hayo edhọ okọto nọ e rẹ sai noi ze.

U fo re izoge i “jiri odẹ ỌNOWO na.” (Ol. 148:12, 13) Eme awere gbe emamọ uruemu rai evaọ okenọ a tẹ rọ usiuwoma i re si amọfa urru gaga o vẹ jẹ wha adhẹẹ se Jihova. Evaọ edhere kpobi, jọ whai esẹ gbe ini wha fiobọhọ kẹ emọ rai re a w’obọ kẹse kẹse evaọ ewhowho emamọ usi na nọ wha bi je fiẹrohotọ re wha sẹro rai no enwoma nọ e rẹ sae via na!