Esẹ gbe Ini—Wuhrẹ Emọ Rai re A Ta Usiuwoma
1 A rehọ emọ buobu ghale ikoko mai enọ i wo isiuru oruọzewọ re a gọ Ọghẹnẹ. (Ọtausi. 12:1) A rọ usu ahwo nọ Jihova o zizie re a kuomagbe jiri ei. (Ol. 148:12-14) Fikiere, ewuhrẹ ekẹdẹ kẹdẹ nọ ọsẹ gbe oni a rẹ kẹ emọ rai u re kugbe uthubro oghẹrẹ nọ a rẹ ghale ẹrọwọ rai kugbe amọfa evaọ iruo usiuwoma ota Uvie na.—Izie. 6:6, 7.
2 Wuhrẹ Emọ Ẹmẹrera: U woma re a wuhrẹ emọ no emaha boba ze re a lele esẹ gbe ini rai evaọ odibọgba na. Re who te ti kpohọ usiuwoma, ruẹrẹ emọ ra họ re a wo emamọ abọ. Kaki roro oware nọ whọ gwọlọ nọ a rẹ ta evaọ unuẹthẹ taure oke u te ti te. Emaha a rẹ sae kẹ emebe-evẹvẹ hayo ebe uzizie je zizie ahwo ziọ Ọgwa Uvie na. A rẹ sai zizie emaha nọ e be riẹ se ziezi re a se ikereakere jọ evaọ unuẹthẹ. A rẹ sae ta umutho ẹme kpẹkpẹe ro fiọ emagazini họ ada. Nọ a bi wo eriariẹ viere na, wuhrẹ ai re a rehọ Ebaibol na ruiruo evaọ ẹmeọta rai. Iwhowho-uvie eboba buobu jọ a mu ejẹ emagazini rai họ no je kpohọ izihebro no kẹse kẹse. O rẹ mai woma re ọmaha o lele ọkpako ruiruo ukpenọ o re ruiruo kugbe ọmaha ọfa. Ọkpako na ọ rẹ sae ta vevẹ kẹ ọnọ o wo uwou na nọ o bi wuhrẹ ọmaha na kẹ odibọgba na.
3 Ọmọtẹ ọsese jọ ọ yare ekpako na kẹ obufihọ rai re ọ ruẹsi te owhowho Uvie. Dede nọ ikpe isoi ọvo ọ jọ evaọ oke yena yọ ọ riẹ epanọ a re se he, ghele ọ rẹ sae kẹ umutho ovuẹ Uvie na evaọ inuẹthẹ. O wuhrẹ eria ikereakere fihọ uzou, yọ o re rovie obe kpohọ oria nọ ikereakere na e rọ, ọ vẹ ta kẹ ọnọ o wo uwou na nọ o se ai, ọ vẹ fotọ rai.
4 Oriruo esẹ gbe ini i re je wuhrẹ emọ aghare emamọ oma nọ a re wo ẹkwoma abọ nọ a re wo ẹsikpobi evaọ odibọgba na. U fo re esẹ gbe ini a fi oke usiuwoma ota họ koka koka a vẹ jẹ nya lele ẹdẹ na, re emọ na a riẹ abọ jọ oka na nọ o rọ kẹ iruo usiuwoma ota.
5 Nọ a te wuhrẹ emọ no emefofa ze re a you jẹ reawere odibọgba na, oma o rẹ wọ ai re a nyaharo te uvẹ iruo efa evaọ obaro, ẹsejọhọ kugbe iruo ọkobaro. (1 Kọr. 15:58) Mai kpobi ma rẹ tudu họ emọ nọ e rọ udevie mai awọ re a ru emamọ ẹnyaharo wọhọ enọ i bi jiri Jihova.