Esẹ gbe Ini—Wha Wuhrẹ Emọ Rai no Emaha Ze
1 “Wuhrẹ ọmọ edhere nọ ọ rẹ nya, nọ ọ jẹ kpako no ọ gbẹ thọriẹ ẹro ho.” (Itẹ 22:6) Esẹ gbe ini, otẹrọnọ wha gwọlọ nọ edhere uzẹme na ọ ‘thọrọ emọ rai ẹro’ ho, oke vẹ ewuhrẹ otiọye na o re ro muhọ? Oke emaha!
2 Okenọ Pọl ọ ta nnọ ewuhrẹ abọ-ẹzi ọ Timoti o no “oke emaha ze,” o rrọ vevẹ inọ no oke ọmọ-unuevie ze ọ ta. (2 Tim. 3:14, 15) Fikiere, Timoti ọ rro zihe ruọ obọdẹ ọzae abọ-ẹzi. (Fil. 2:19-22) Esẹ gbe ini, o gbahọ nnọ wha rẹ kẹ emọ rai ewuhrẹ nọ a gwọlọ no “oke emaha ze” re a ‘rro evaọ abọ Jihova.’—1 Sam. 2:21.
3 Wha Kẹ Ae Ame nọ A Gwọlọ re A Rro: Nwanọ epanọ ekakọ eboba e rẹ gwọlọ ame ẹsikpobi re e rro ruọ irre ilogbo na, ere emọ unu ikpe kpobi e gwọlọ ame uzẹme Ebaibol na re a rro ruọ idibo Ọghẹnẹ nọ e kpako no. Edhere ọsosuọ nọ a re ro wuhrẹ emọ uzẹme na je fiobọhọ kẹ ae wo usu okpekpe kugbe Jihova họ ẹkwoma uwuhrẹ Ebaibol uviuwou orọ ẹsikpobi. Rekọ esẹ gbe ini, wha roro kpahe ẹgba ezọgaviẹ ọmọ ọvuọvo. Rọkẹ emọ eboba, ẹsejọhọ etoke uthubro okpẹkpẹe orọ ikẹse kẹse o rẹ mai w’iruo vi etoke othethei.—Izie. 11:18, 19.
4 Wha rri ẹgba ewuhrẹ emọ rai vo vievie he. Gbiku kẹ ae kpahe ahwo nọ a rẹ jọ Ebaibol se ku na. Jọ a drọ ifoto ọ eware nọ e via evaọ Ebaibol hayo ru edrama eware nọ e via evaọ Ebaibol na. Rehọ ividio gbe ekasẹte mai ro ruiruo ziezi, kugbe edrama Ebaibol na. Ru ewuhrẹ uviuwou na kiehọ unu ikpe gbe ẹgba ewuhrẹ emọ ra. Eware elọlọhọ a re ro mu ewuhrẹ na họ, umumutho; rekọ nọ ọmọ na ọ be rro kpako na, ewuhrẹ riẹ ọ vẹ kẹre jẹ nyaharo viere. Ru ithubro Ebaibol na jọ jajaja jẹ jọ oghoghẹrẹ. Whọ gwọlọ re emọ ra i wo ‘ẹgwọlọ’ kẹ Ẹme na, fikiere ru ewuhrẹ na siuru te epanọ whọ sai ru ei kpobi.—1 Pita 2:2.
5 Wha Ru Ai W’abọ Evaọ Iruẹru Ukoko Na: Wha fi itee ẹnyaharo họ kẹ emọ rai re a jọ ukoko na w’iruo vọvọ. Eme ọ rẹ sae jọ ute ọsosuọ rai? Ọsẹ gbe oni emọ esese ivẹ jọ a ta nọ: “Oware nọ ma kaki wuhrẹ aimava họ epanọ a rẹ keria dhedhẹ evaọ Ọgwa Uvie.” Kẹsena, wha ve fiobọhọ kẹ emọ na re a rọ eme obọ rai kẹ iyo evaọ iwuhrẹ na je ru ei fihọ ute rai re a fi odẹ h’otọ evaọ Isukulu Odibọgba Esuo-Ọghẹnẹ na. Evaọ usiuwoma ota, emamọ itee nọ a re le t’obọ e sae jọ re a fi omobe-ovẹvẹ họ ada evaọ unuẹthẹ, re a se ikereakere, re a t’ẹme nọ a re ro fi emagazini họ ada, jegbe re a si ọnọ o wo uwou na fihọ ẹmeọta isiuru.
6 Wha Fi Emamọ Oriruo h’Otọ kẹ Ae: Kọ emọ ra i re yo nọ whọ be t’ẹme kpahe Jihova jẹ lẹ sei kẹdẹ kẹdẹ? Kọ a be ruẹ owhẹ nọ who bi wuhrẹ Ẹme riẹ, kpohọ iwuhrẹ, w’obọ evaọ odibọgba na, jẹ be rehọ evawere ru oreva Ọghẹnẹ? (Ol. 40:8) O r’oja inọ a rẹ ruẹ onana gbe nnọ wha re ru eware enana kugbe. Ọmọtẹ jọ nọ o te ohwo no ọ ta kpahe oni riẹ, ọnọ ọ yọrọ emọ ezeza zihe ruọ Isẹri ẹrọwọ no inọ: “Oware nọ o mai duobọte omai họ oriruo oni mai—o t’ẹme ruae vi egede.” Ọyewọ emọ ene jọ ọ ta nnọ: “ ‘Jihova ọ rẹ jọ oria ọsosuọ’ orọnikọ o jọ ẹme nọ ma jẹ hai dhe ẹtẹta ọvo ho rekọ o jọ edhere nọ ma jẹ rria izuazọ mai.”
7 Esẹ gbe ini, wha kaki mu emọ rai họ ewuhrẹ, wuhrẹ ai uzẹme nọ u no Ẹme Ọghẹnẹ ze, fi itee ẹnyaharo họ, je fi oriruo nọ ọ mai woma h’otọ. Eva e te were owhẹ inọ who ru ere!