Wuhrẹ Emọ Ra re A Jiri Jihova
1. Kọ emaha a sai jiri Jihova?
1 Olezi avọ 148:12, 13 o tuduhọ emezae gbe emetẹ awọ re a ‘jiri odẹ Jihova.’ Iriruo emaha buobu nọ i jiri Jihova e rrọ Ebaibol na. Wọhọ oriruo, Ebaibol e tanọ “Eva oke onana Samuẹle ọmọ na yọ ọ be gbodibo kẹ ỌNOWO na.” (1 Sam. 3:1) “Ọmọtẹ ọsese jọ” ọye ọ ta kẹ aye Neaman inọ ọruẹaro Jihova nọ ọ rrọ obọ Izrẹl ọ sai siwi oti Neaman kpo. (2 Iv. 5:1-3) Nọ Jesu ọ jọ etẹmpol ru iruo igbunu, “emaha” na họ ahwo nọ a bo nọ “Hosana kẹ Ọmọ Devidi!” (Mat. 21:15) Ẹvẹ esẹgbini a sai ro wuhrẹ emọ rai re a jiri Jihova?
2. Fikieme u ro wuzou re esẹgbini a fi emamọ oriruo hotọ kẹ emọ rai?
2 Ẹkwoma Oriruo Ra: A kẹ esẹ erọ ahwo Izrẹl ohrẹ inọ taure a tẹ te kọ uzẹme na họ udu emọ rai, ae omarai a rẹ kaki you Jihova tao je wo ijaje riẹ họ udu rai. (Izie. 6:5-9) Otẹrọnọ whọ rẹ ta ẹme ezi kpahe iruo usiuwoma ota na je fi ei kugbe omaa ẹkpoka ra, o te lẹliẹ emọ ra rri iruo usiuwoma ota na wọhọ oware nọ o wuzou jẹ kẹ evawere.
3. Ẹvẹ oriruo ọsẹgboni oniọvo-ọmọtẹ jọ o ro fiobọhọ kẹe?
3 Oniọvo-ọmọtẹ jọ ọ kareghẹhọ nọ: “Nọ mẹ gbẹ jọ ọmaha, abọjọ uruemu uviuwou mai họ ma re kpohọ usiuwoma ota evaọ urere-oka kpobi. Mẹ ruẹ nọ ọsẹgboni mẹ a jẹ reawere usiuwoma ota na. O tẹ whae ze nọ ma ro rri iruo odibọgba na wọhọ oware omawere nọ ma be rro na.” Oniọvo-ọmọtẹ nana o zihe ruọ owhowho-uvie nọ ọ re họ-ame he nọ ọ jọ ikpe ihrẹ yọ ọ rrọ iruo odibọgba oke-kpobi vrẹ ikpe 32 no.
4. Eme u dhesẹ re a rehọ eware elọlọhọ mu ọmọ họ ewuhrẹ?
4 Rehọ Eware Elọlọhọ Muhọ: Wha emọ ra lele oma kpohọ usiuwoma je ru ai wo obọ evaọ usiuwoma ota na. Ẹsejọhọ a sai kporo ẹthẹ na, rehọ omobe-ovẹvẹ kẹ ohwo nọ wha ta usiuwoma kẹ, hayo se oria Ebaibol. Onana o te lẹliẹ ae reawere usiuwoma na je fiobọhọ kẹ ai wo udu nọ a re ro whowho ovuẹ Uvie na. Nọ a be rro na, u fo nọ a re wo ẹnyaharo evaọ odibọgba na. Fikiere, fiobọhọ kẹ ae re a wo ẹnyaharo re a je roro kpahe itee abọ-ẹzi nọ a re le.
5. Eme o gwọlọ mi ọmọ re o te owhowho-uvie nọ ọ re họ-ame he?
5 Whọ tẹ ruẹ nọ emọ ra a te ahwo nọ a rẹ jọ iwhowho-uvie nọ e re họ-ame he no yọ u no rai eva ze re a jọ iwhowho-uvie, ta kẹ ekpako na ababọ okioraha. Owhowho-uvie nọ emọ na a rẹ jọ o te lẹliẹ ai vuhumu inọ a wo owha-iruo nọ a re ro jiri Jihova. Hae kareghẹhọ inọ u du gwọlọ nọ ọmọ o re wo eriariẹ wọhọ ọkpako nọ ọ họ-ame no taure o te ti te owhowho-uvie he. Kọ ọmọ ra o wo otoriẹ igogo iwuhrẹ Ebaibol na? Kọ ọ be rria lele itee ẹfuọ-uruemu nọ e rrọ Ebaibol na? Kọ o rrọ isiuru riẹ re o wobọ evaọ usiuwoma ota, re a jẹ riẹe wọhọ omọvo Isẹri Jihova? O tẹ rrọ ere, ekpako na a te jiroro inọ o te re ọ jọ owhowho-uvie nọ ọ re họ-ame he.—Rri obe A Koko Omai Họ re Ma Ru Oreva Jihova, ẹwẹ. 79-82.
6. Fikieme o gbẹ rrọ oware uvrẹvru hu re esẹgbini a wuhrẹ emọ rai?
6 O gwọlọ omodawọ re a wuhrẹ emọ re a jiri Jihova no eva rai ze. Rekọ ọzioware ọ rẹ wha oghọghọ se esẹgbini te onana ha, re a ruẹ emọ rai nọ i bi wo ẹnyaharo abọ-ẹzi. Mai wuzou, eva e rẹ were Jihova nọ emaha na a tẹ be ta kpahe iruo igbunu riẹ.