Kọ Whọ Gwọlọ Ru Viere?
1 Jesu ọ rehọ Uvie na dhesẹ efe nọ ọ ghare w’umuo ho. (Mat. 13:44-46) Iruo ẹvaha usi Uvie na yọ efe ọghaghae re. U fo nọ odibọgba nana ọ rẹ karo evaọ izuazọ mai, o tẹ make rọnọ abọ-owo vọvọ evaọ eva riẹ o gwọlọ oghẹrẹ awhaha omobọ ohwo jọ. (Mat. 6:19-21) Kọ whọ gwọlọ ru viere evaọ iruo Uvie na?
2 Roro Kpahe Eware Obọdẹ Enana: Eware buobu e r’oja re ma sai ru ẹkẹ-abọ mai evaọ odibọgba na kẹre: (1) ewo ọtamuo re a fi isiuru Uvie haro evaọ uzuazọ (Mat. 6:33); (2) edhesẹ ẹrọwọ gbe ẹrorọsuọ Jihova (2 Kọr. 4:1, 7); (3) ẹgwọlọ obufihọ Ọghẹnẹ ẹkwoma olẹ oruọzewọ, orọ ikẹse kẹse (Luk 11:8-10); (4) ẹnya gbe eru lele elẹ mai.—Jem. 2:14, 17.
3 Idhere nọ Ma re ro Ru Odibọgba Mai Kẹre: Mai kpobi ma rẹ sai fi ugogo ute họ re ma hae raha oke jọ ẹsikpobi evaọ odibọgba na k’amara k’amara. Kọ who roro kpahe uvẹ kpobi nọ who re ro se isẹri ọnyakuo no, daoma ru ẹmeọta ra wo uvi otofa viere, ru izihebro ra w’iruo viere, jẹ daoma ru ebe uwuhrẹ Ebaibol nọ e rẹ nyaharo? Kọ whọ sai ruiruo ọkobaro obufihọ hayo ọrọ oke-kpobi hayo ruiruo evaọ oria nọ ẹgwọlọ na ọ jọ mae rro? Whọ tẹ rọ oniọvo-ọmọzae nọ ọ họ-ame no, kọ whọ sai te wọhọ odibo oriruo hayo ọkpako? (1 Tim. 3:1, 10) Kọ whọ sai ru odibọgba ra kẹre ẹkwoma obe ufihọ kẹ iruo Ebẹtẹle, hayo Isukulu Ewuhrẹ Odibọgba na?—Luk 10:2.
4 A tuduhọ oniọvo jọ nọ o je ruiruo okọ oke-kpobi, nọ ọ rẹ jẹ raha oke buobu fihọ iruẹru arozaha awọ re ọ jọ ọkobaro oke-kpobi. O te muọ iruo ọkobaro obufihọ na họ je ru inwene evaọ uyero riẹ re ọ ruọ iruo odibọgba oke-kpobi na. Uwhremu na o te kpohọ Isukulu Ewuhrẹ Odibọgba na, onọ o ruẹrẹ e riẹ kpahe kẹ iruo nọ ọ rọ obọnana wọhọ ọsẹro okogho. Ọ ghọghọ gaga inọ ọ j’owọ kẹ uduotahawọ nọ a kẹ riẹ, yọ o wo evaifihọ nnọ ọ be wereva viere enẹna fiki ọtamuo riẹ re o ru viere evaọ iruo Uvie na.
5 Jihova ọ rẹ ghale ahwo nọ e fialoma via. (Aiz. 6:8) Jọ oware ovuovo o d’owhẹ ji hi re who ru odibọgba ra kẹre jẹ reawere evevọwẹ ilogbo gbe omosasọ nọ u re noi ze.