Jihova Ọ rẹ kẹ Ogaga Ulogbo nọ O Thesiwa
1 Uvẹ oghaghae iruo efuafo—odibọgba Oleleikristi na—a mu rie h’obọ ilele Jesu kpobi. (Mat. 24:14; 28:19, 20) Rekọ sebaẹgba ohwo-akpọ avọ otunyẹ eyero eware nana o rẹ sae lẹliẹ omai rri oma mai ẹsejọ inọ ma te vievie he.
2 Nọ onana o tẹ via ma rẹ sai wo omosasọ no ileta nọ Pọl ukọ na o kere se Ileleikristi nọ a kẹ ẹzi evaọ Kọrint na ze. O kere nọ: “Ma wo efe ọnana eva eware nọ a rehọ ẹkpẹ ma.” (2 Kọr. 4:7) Pọl o wo udu: “Fikiere nọ oma wo iruo enana no . . . , ma gbe [serihọ họ].” (2 Kọr. 4:1) Uzẹme, o rọ use-abọ rọ k’omai omomọvo, makọ ọnọ a kẹ ẹzi hayo ọrọ “igodẹ efa,” re ma gbẹ hai whowho usiuwoma na ‘ababọ eriosehọ.’ Ma gwọlọ ẹgba no obọ Ọghẹnẹ ze, ọnọ ọ rẹ kẹ “ogaga nọ o thesiwa.”—Jọn 10:16; 2 Kọr. 4:7b.
3 Avọ uduotahawọ, Isẹri buobu a rọ etausiuwoma ọwhọ ghelọ ohọre nọ a wo kugbe ọwọsuọ ọgaga, ebẹbẹ ẹyao oyoma, hayo ugho nọ u tulo ho. Mai kpobi ma re vuhumu hrọ inọ Jihova ọ be tha iruo usiuwoma ota mai uke. Viukpenọ ma rẹ kẹ ababọ-uduowha hayo ozọ uvẹ re u whrehe ọtamuo usiuwoma ota mai, j’oma “kru oma ga eva Ọnowo na gbe eva ogaga eri [riẹ].”—Ẹf. 6:10; Itẹ 24:10.
4 Epanọ A re ro Wo Ẹgba Ọghẹnẹ: Thihakọ evaọ olẹ, yarọ Ọghẹnẹ kẹ obufihọ gbe ẹgba. (Rom 12:12; Fil. 4:6, 7) Avọ udu ra kpobi, fievahọ Jihova re ọ k’owhẹ ogaga nọ o thesiwa. (Itẹ 3:5) Se iku uzuazọ ọgbọna evaọ emagazini mai, keme e kẹ imuẹro nnọ Jihova o bi fiobọhọ kẹ idibo riẹ nẹnẹ thihakọ edawọ. Sikẹle inievo na evaọ ukoko na, yọ who gbabọ kẹ iwuhrẹ ukoko na ha.—Rom 1:11, 12; Hib. 10:24, 25.
5 Joma ru utho mai kpobi re ma fi oma mai họ uhie kẹ ewo ogaga Jihova—ogaga nọ o thesiwa gbe onọ u re fiobọhọ k’omai nọ ma gbe serihọ họ evaọ iruo ovuẹ Uvie na nọ o mai w’uzou na.