Dhesẹ Adhẹẹ kẹ Oria Egagọ Jihova
1 Nọ ma tẹ rọ ọrara evaọ uwou omọfa, ma re dhesẹ adhẹẹ kẹ ekwakwa ohwo ọyena, orọnikọ ma re ru oware jọ rọ raha ae he, yọ ma rẹ wha ozighi họ ọruẹrẹkpahe ọkpakpatiẹ uviuwou na ha. Kọ ẹvẹ onana o rẹ mae jọ ere te nọ ma tẹ rọ erara Jihova! U fo re ma riẹ epanọ ma re su oma mai evaọ uviuwou riẹ. (Ol. 15:1; 1 Tim. 3:15) Makinọ evaọ Ọgwa Uvie ma be jọ ru ewuhrẹ Ileleikristi mai, uwou ohwo jọ, hayo uwou ẹgbede, ibuobu mai a be hai dhesẹ adhẹẹ kẹ oria egagọ mai wọhọ ẹsenọ o rọ uwou Jihova, ọnọ “oruaro riẹ u kpehru vi akpọ gbe odhiwu.”—Ol. 148:13.
2 Inievo jọ a bi dhesẹ ababọ adhẹẹ evaọ iwuhrẹ na ẹkwoma edo oruo hayo ru wọhọ ẹsenọ ovuẹ nọ a be kẹ na o r’oja ha. Ejọ nọ e kpako no a rẹ t’eme nọ e r’oja ha evaọ unuẹthẹ, ogebara, oria ame-okuo, hayo otafe Ọgwa Uvie na yọ ewuhrẹ ọ be nyaharo. Nọ a tẹ nya siọ ọmọ nọ ọ whẹro no ba re ọ rẹro te ọnọ ọ te whẹro ho, ẹsejọ aimava na a ve muọ aroza họ yọ a gbẹ ruoma wo erere no ewuhrẹ na ze he. A ruẹ izoge jọ no evaọ otafe Ọgwa Uvie na nọ ewuhrẹ ọ tẹ fa no, nọ e be zaharo, bi ru edo thomawa, be tubẹ fa ohwohwo ekarate dede. Evaọ ẹsejọ a kpokpo enọ e be rria kẹle etẹe no hayo a fi awhaha họ uhie-imoto no evaọ oria nọ imoto e rẹ kpahe hayo evaọ iyẹrẹ.
3 Epanọ A Sae rọ Whaha Ababọ-Adhẹẹ: Nọ ma te wo ovuhumuo kẹ ọghọ gbe ẹfuọ egagọ mai, ababọ avro ma rẹ gwọlọ wha awhaha se amọfa ẹkwoma ẹme imimẹ hẹ, emuọriọ, ẹta athethe, ebe enware, omunya kpohọ oria ame-okuo, hayo iwuhrẹ nọ a rẹ nyaze whremu kẹse kẹse. Esẹ gbe ini adhẹẹ avọ ovuhumuo a rẹ kẹ emọ rai uvẹ re a gbe otọ-uwou, egbara, hayo igbẹhẹ Ọgwa Uvie ku hu hayo erọ iwou nọ a je ru ewuhrẹ obe ukoko. Yọ ababọ avro mai kpobi ma rẹ rọwo nnọ uvẹ ovuovo o riẹ hẹ rọkẹ oghẹrẹ uruemu omovuọ jọ, eme igheghẹ, hayo eme etọtọ evaọ iwuhrẹ mai.—Ẹf. 5:4.
4 Nọ ma tẹ kareghẹhọ ẹjiroro iwuhrẹ Ileleikristi mai ẹsikpobi, u re mu omai ẹro nnọ mai gbe emọ mai ma re dhesẹ adhẹẹ nọ o fo rọkẹ egagọ Jihova evaọ oria nọ ma ‘salọ nọ ma re dikihẹ na.’—Ol. 84:10.