Kọ Who Wo “Edada eva Oma”?
1 O rọ omai oja gaga re ma ru iruo ẹvuẹ emamọ usi nọ a k’omai na gba te umuo nọ ẹgba mai o mu. Dede na, o rọ bẹbẹ kẹ inievo eghaghae mai buobu re a w’obọ vọvọ keme na eyao egaga ugboma na i bi bru rai dhe, nọ u bi ru ei bẹbẹ kẹ ae re a sai ru te epanọ a gwọlọ. Rọ kẹ ae, o sae jọ ẹbẹbẹ re a thihakọ iroro ewhrehe, maero kọ nọ a tẹ ruẹ amọfa nọ a wariẹ e rai họ nọ a bi ruiruo gaga evaọ odibọgba na.—1 Kọr. 9:16.
2 Oriruo nọ A rẹ Raro Kele: Pọl ukọ na o je lele “edada eva oma” họre. Ọ lẹ se Jihova isiasa re o si ọzadhe idhọvẹ na no, onọ o dhesẹ wọhọ “ukọ Setan” nọ u je dhei ẹtẹtehe. Ghelọ oyena, Pọl o thihakọ jẹ ya haro evaọ odibọgba riẹ. Ohrọ omobọ riẹ o jẹ riẹe he hayo o je bruenu gaga ha. Ọ dawo ẹgba riẹ kpobi. Usiavẹ nọ ọ sae rọ kparobọ na họ imuẹro nana nọ i no obọ Ọghẹnẹ ze na: “Aruoriwo mẹ o te kẹ owhẹ, keme eva okuako ogaga mẹ o jẹ gbunu.” Ewhrehe Pọl o zihe ruọ ẹgba evaọ okenọ o wuhrẹ epanọ ọ rẹ rọ jẹ uyero riẹ rehọ je fievahọ Jihova avọ ẹzi ọfuafo re ọ sai thihakọ.—2 Kọr. 12:7-10.
3 Epanọ Whọ Sai ro Thihakọ: Kọ oma uwhrewhrehe ohwo-akpọ u fiọ ọzadhe họ egagọ Ọghẹnẹ ra? Otẹrọ ere, rọ aro kele eriwo Pọl. O tẹ make rọnọ ẹyao ra o wo ifue evaọ eyero eware nana ha, whọ rẹ sai fieva ra họ Jihova vọvọ, ọnọ o w’otoriẹ ẹgwọlọ ra ọ vẹ te k’owhẹ “ogaga ulogbo nọ o thesiwa.” (2 Kọr. 4:7) Wo erere no obufihọ nọ who wo evaọ ukoko na ze, whọ kuoma ra dhere he. (Itẹ 18:1) Otẹrọnọ o rọ bẹbẹ k’owhẹ re who w’obọ evaọ iruo n’ẹthẹ t’ẹthẹ na, gwọlọ obọdẹ idhere efa nọ who re ro ru isẹri-ise ọnyakuo.
4 Dede nọ edada eva oma o rẹ sae whaha epanọ whọ rẹ sai ru te evaọ odibọgba na, who du roro nọ whọ r’abọ muoma ha. Wọhọ Pọl, whọ rẹ sai je “si isẹri usiuwoma aruoriwo Ọghẹnẹ,” re who ru utho nọ ẹgba avọ uyero ra o k’uvẹ riẹ. (Iruẹru 20:24) Nọ whọ be daoma re who ru odibọgba ra gbunu na, riẹ nọ eva e be were Jihova gaga.—Hib. 6:10.