Kọ August Ọ te Jọ Amara Oghẹrẹsa?
1 Evaọ ukpe ọ 1948 unu iwhowho-uvie evaọ akpọ na soso o vrẹ 226,000. Otẹrọnọ whọ jọ ukoko na okioye, whọ sae kareghẹhọ epanọ eva e were omai te nọ ma wo ahwo buobu nọ e be vuẹ ovuẹ Uvie na! Enẹna, unu iwhowho-uvie yena e rọ orẹwho onana ọvo. Dede na, k’amara k’amara, nọ a tẹ ghale iẹ, ahwo 20,000 evaọ usu mai a be n’iyẹrẹ evaọ odibọgba na ha.
2 Jẹ Use-Abọ na Rehọ: Evaọ August ma be daoma re ma nyate unu nọ o mai bu kpaobọ orọ iwhowho-uvie 215,000 evaọ Nigeria. Otẹrọnọ omodawọ mai o kparobọ, August ọ te ghinẹ jọ amara oghẹrẹsa! Ma sai ru onana otẹrọnọ mai kpobi ma ru ẹkẹ abọ mai.
3 Ahwo nọ a be j’iroro erẹ a rẹ sae raha oke jọ fihọ odibọgba na taure a tẹ te nya vrẹ. Wha unu emebe-evẹvẹ jọ lele oma, ibroshọ, hayo emagazini re whọ sai se isẹri kẹ ahwo nọ whọ te nya ku evaọ erẹ ra na. Ofariẹ, nọ who te te obonọ whọ be nya no whọ sae reawere aghale evaọ odibọgba na kugbe inievo obei.
4 Otẹrọnọ whọ be mọ hayo whẹ yọ ọmo, whọ sai w’obọ ziezi evaọ odibọgba na ghele. Ẹsejọhọ whọ te sai se isẹri kẹ edọketa, enọso, hayo amọfa nọ a weze bru owhẹ ze. Ẹsejọhọ whọ sai se isẹri ẹkwoma ileta hayo ifonu.
5 Ababọ avro o te were otujọ otẹrọnọ a fiobọhọ kẹ ae evaọ usiuwoma ota evaọ August. Ekpako, idibo iruiruo, gbe enọ i re ru uwuhrẹ a re ru ọruẹrẹfihọ kẹ obufihọ onana. Evaọ edhere kpobi, jọ o thọrọ owhẹ ẹro ho re whọ n’iyẹrẹ usiuwoma ota ra ababọ okioraha evaọ urere amara na re a sai kele owhẹ wọhọ owhowho-uvie evaọ August.
6 Rri Uvẹ-Ọghọ na Ghaghae: Odibọgba na yọ ‘omuhobọ obọdẹ.’ (2 Tim. 1:14) Ma wo ovuhumuo kẹ uvẹ-ọghọ nọ a k’omai re ma whowho emamọ usi na. (1 Tẹs. 2:4) Nọ ma te roro kpahe eware kpobi nọ Jihova o ru k’omai no, o rẹ w’omai re ma w’obọ ẹsikpobi evaọ iruo nana nọ e mai w’uzou na evaọ ẹgbukpe na soso. Ma rẹ kẹ uvumọ oware uvẹ re o whaha omai usiuwoma ota kẹse kẹse he. Joma ru August nana fihọ amara oghẹrẹsa evaọ iruo Jihova jẹ gbae mu re ma se isẹri kpahe iẹ k’amara k’amara n’umuo okioye vrẹ!—Ol. 34:1.