Wha Bọ Ohwohwo Ga Ẹkwoma Ẹkpahefihọ Eva Iwuhrẹ
1 A tuduhọ omai awọ eva Ahwo Hibru 10:24 re ma ‘fiobọhọ kẹ ohwohwo dhesẹ uyoyou je ru iruo ezi.’ Onana o kẹre te ẹbọga ohwohwo ẹkwoma uvi eme nọ a rẹ kpahe eva iwuhrẹ ukoko. Fikieme ma jẹ kpahe ẹme? Ẹvẹ ma sai ro ru onana? Ono o re wo erere?
2 Roro kpahe unuẹse buobu nọ who wo erere no eme eliọliọ, ivevẹ erọ amọfa ze no nọ i fiobọhọ kẹ otoriẹ ra jẹ b’owhẹ ga evaọ abọ-ẹzi. Who wo uvẹ-ọghọ nọ who re ro ru epọvo na kẹ ae re. Nọ whọ tẹ kpahe ẹme, yọ who bi dhesẹ ẹgwọlọ ra re whọ ‘ghale okẹ abọ-ẹzi jọ’ rọkẹ uduotahawọ ahwo kpobi nọ a nyaze na.—Rom 1:11, 12.
3 Epanọ A rẹ rọ Kẹ Emamọ Iyo: Whọ kẹ iyo ithethei hi, enọ i re duobọ te eme nọ e rọ edhe-ẹme na soso. Iyo ithethei i re duobọ te ugogo uyo na ha yọ u re whrehe amọfa nọ a gbe w’obọ họ. Uyo ọsosuọ evaọ edhe-ẹme na o rẹ jọ uyo okpẹkpẹe, oliọliọ kẹ onọ nọ o rọ obe na. Ahwo nọ a be te gbẹ kpahe ẹme a rẹ sai dhesẹ efihiruo ẹme na hayo a re dhesẹ epanọ ikereakere na i ro kiekpahe iẹ. Rri School Guidebook, ẹwẹ-obe 90-92.
4 Otẹrọnọ ozọ uyo-okẹ u re mu owhẹ, ruẹrẹ uyo okpẹkpẹ họ, re whọ ta kẹ ọnọ o bi ru ewuhrẹ na re o s’owhẹ evaọ edhe-ẹme ọyena. Nọ who te ru onana evaọ umutho iwuhrẹ jọ no, uyo-okẹ o te jọ lọlọhọ k’owhẹ viere. Kareghẹhọ nọ Mosis gbe Jerimaya a dhesẹ ababọ udufihọ kpahe ẹgba rai nọ a rẹ rọ t’ẹme evaọ ogbotu. (Ọny. 4:10; Jeri. 1:6) Rekọ Jihova o fiobọhọ kẹ ae t’ẹme riẹ, yọ o ti fiobọhọ k’owhẹ re.
5 Ono O ti Wo Erere no Iyo Ra Ze? Whẹ omara who re wo erere keme iyo ra i re ru uzẹme na kodo evaọ iroro gbe udu ra, ru ei lọhọ k’owhẹ re whọ kareghẹhọ evuẹ na evaọ okiofa. Ofariẹ, amọfa a re wo erere no eme ọbọga ra nọ a re yo ze. O rẹ tudu h’omai awọ okenọ ahwo kpobi, makọ enọ i wo ona no, emaha, enọ e rẹ vuoma, hayo ahwo ọkpokpọ, a tẹ daoma re a dhesẹ ẹrọwọ rai via eva iwuhrẹ ukoko.
6 U muomai ẹro nnọ ‘eme nọ a rẹ ta evaọ ẹruoke i re woma gaga’ nọ a tẹ rehọ ae bọ ohwohwo ga eva iwuhrẹ!—Itẹ 15:23.