Jihova O Bi Wuhrẹ Omai
1 Enẹna ọruẹrẹfihotọ ewuhrẹ akpọ soso ọ rrọ iruo evaọ ekwotọ 233 evaọ otọ ọkpọvio Ọghẹnẹ. A rẹ sae rehọ uvumọ oware nọ akpọ ọnana ọ rẹ kẹ rọ wawo iẹ hẹ. Owuhrẹ Ologbo mai, Jihova, o bi wuhrẹ omai epanọ ma re ro wo erere k’omobọ mai evaọ enẹna wọhọ epanọ o bi je wuhrẹ omai kẹ uzuazọ ebẹdẹ bẹdẹ na.—Aiz. 30:20; 48:17.
2 Isukulu ọ Ewuhrẹ Ọghẹnẹ: Roro kpahe isukulu nọ e be nyaharo enẹna rọkẹ erere ọ ahwo Jihova. Isukulu Odibọgba Ọghẹnẹ na, onọ a bi ru k’oka k’oka evaọ ikoko nọ i bu te 87,000 na, u bi wuhrẹ ima ọ iwhowho Uvie re a jọ emamọ egbodibo erọ emamọ usi na. Kọ who fi odẹ h’otọ no? Whọ rrọ udevie ọ idu ahwo nọ a kpohọ Isukulu Iruo Ọkobaro orọ eka ivẹ na no? Ẹsejọhọ ute euwa nọ a sikpotọ no kẹ ekobaro oke-kpobi na u ti fiobọhọ kẹ amọfa ruiruo ọkobaro na je te kẹ ekpohọ isukulu nana. Isukulu Ewuhrẹ Odibọgba ọrọ emerae ivẹ na, onọ a bi ru enẹna evaọ evẹrẹ nọ e viodẹ wariẹ akpọ họ na, o be ruẹrẹ ekpako gbe idibo iruiruo nọ e rọo ho họ re a wọ ewha iruo Ọghẹnẹ nọ e mae rro. N’oke ruoke, a rẹ kẹ ekpako gbe idibo iruiruo kpobi obọdẹ ithubro evaọ Isukulu Odibọgba Uvie na.
3 A be jọ obọ Oria Ehri Ewuhrẹ ọ Watchtower eva Patterson, New York, bi ru isukulu obọdẹ, nọ o be kẹ ewuhrẹ Ọghẹnẹ nọ o kpehru. Ewuhrẹ ọ emerae isoi ọrọ Isukulu Ebaibol Giliad ọrọ Watchtower na o rẹ ruẹrẹ egbodibo họ kẹ iruo imisiọnare evaọ ekwotọ ọrara. Ahwo Ogbẹgwae Uwou-Ogha no akpọ kpobi ze a re kpohọ ewuhrẹ ọ emerae ivẹ kpahe iruẹru uwou-ogha. Idibo Jihova kpobi a bi wo obọdẹ irere no ewuhrẹ nọ Jihova ọ be kẹ ze ẹkwoma isukulu enana sa-sa.
4 Ẹjiroro vẹ A Bi ro Wuhrẹ Na? Omọvo ọ Ugboma Esuo na jọ ọ ta nọ: “A ruẹrẹ omaa ọ ewuhrẹ mai orọ enẹna họ re o rehọ ahwo Jihova kpobi ziọ emamọ uyero ọ ẹkpako nọ a dhesẹ eva Itẹ 1:1-4 na.” Jọ Jihova ọ gbẹ kẹ omomọvo mai “ẹrọwo-unu otu nọ a wuhrẹ.”—Aiz. 50:4.