Isukulu Ewuhrẹ Odibọgba—Ẹthẹ Ologbo Iruo Nọ O Rovie Fihọ
1 Ẹkwoma Jerimaya ọruaro na, Jihova ọ ta nọ: “Mẹ vẹte rehọ ithuru-igodẹ mu kẹ [ahwo mẹ] nọ e rẹte sẹro rai, a gbẹ te dhẹ ozọ ofa ha, hayo oma o rẹte lọhọ ae he, hayo ọvuọvo o gbeti vrẹ hẹ.” (Jeri. 23:4) A bi ru iruo ẹruorote itieye na nẹnẹ evaọ udevie ahwo erẹwho kpobi. Ekpako ukoko nọ i bu te idu buobu a bi ru iruo ẹruorote nana. Fiba ekpako na, utu emoha nọ i re buobu wọhọ igrigri a fialoma rai via kẹ iruo Jihova no. (Ol. 110:3) Inievo emezae omarokpotọ nana a rrọ oghale kẹ ikoko ahwo Ọghẹnẹ kẹhẹ! Nọ iruo ekokohọ abọ-ẹzi na e gbẹ be nyaharo na, ẹgwọlọ ọ gbẹ riẹ kẹ ezae nọ i te re a fialoma rai via re a ga inievo rai.
2 Obọdẹ ọruẹrẹfihotọ jọ nọ a re ro wuhrẹ ekpako gbe idibo iruiruo nọ e re rọo ho kẹ ewha-iruo nọ i bi vihọ na họ Isukulu Ewuhrẹ Odibọgba na. Anwẹnọ a ro mu isukulu na họ evaọ 1987 na, a wuhrẹ emọ-uwuhrẹ nọ i bu vi 22,000 nọ i no erẹwho 140 ze no evaọ eklase 999. Rọ kẹ inievo emezae nana, Isukulu Ewuhrẹ Odibọgba na o rrọ ‘ẹthẹ ologbo iruo nọ o rovie fihọ.’—1 Kọr. 16:9.
3 Ẹjiroro Isukulu Na: Ẹjiroro Isukulu Ewuhrẹ Odibọgba na họ re a wuhrẹ jẹ thọ ezae nọ i te oma kpahe kẹ ewha-iruo evaọ oria kpobi nọ ẹgwọlọ ọ jẹ sae roma via evaọ ukoko na. Isukulu na e rẹ kẹ ae ẹgba ologbo nọ a rẹ rọ kobaro evaọ iruo usiuwoma ota na, w’obọ evaọ ẹruorote uthuru na, je wuhrẹ evaọ ukoko na. Nọ a te nwrotọ no, a re vi emọ-uwuhrẹ jọ wọhọ ekobaro obọdẹ hayo idibo ọnyawariẹ evaọ orẹwho nọ a no ze hayo kpohọ orẹwho ofa. A rẹ kẹ ejọ iruo inọ a lele ukoko nọ a no ze ruiruo hayo evaọ eria nọ ẹgwọlọ ọ jẹ mae rro evaọ ẹkwotọ nọ uwou ogha na o be rọ ẹro te.
4 Evaọ etoke ewuhrẹ eka eree na, emọ-uwuhrẹ na a re ru uwuhrẹ ogaga orọ Ebaibol na nọ a rẹ kiẹ kokodo. A rẹ rọ oma totọ kiẹ iwuhrẹ Ebaibol buobu gbe owha-iruo ẹruorote jegbe ekpọvio nọ a rẹ rọ rehọ ẹro te ebẹbẹ evaọ uzuazọ uyero Oleleikristi. A re je wuhrẹ oware nọ Ikereakere na e ta kpahe iruo ẹruorote, ẹdhoguo, gbe eme nọ i kpomahọ ukoko na. A rẹ kẹ ae obọdẹ uwuhrẹ epanọ a rẹ rọ ta ẹme evaọ ogbotu gbe obufihọ epanọ ae omarai a re ro wo ẹnyaharo evaọ abọ-ẹzi.
5 Itee: U re vevẹ, itee nọ a re ro kpohọ isukulu na i re kpekpehru. O tẹ kawo, ohwo nọ ọ gwọlọ kpohọ isukulu na ọ rẹ jọ ọkpako ukoko hayo odibo oruiruo te ikpe ivẹ ususu no tao. Ọ rẹ jọ ohwo nọ ọ re rọo ho, jẹ jọ umuo ikpe 23 rite 50. Ọ rẹ jọ ohwo nọ ọ rẹ sai se, kere, jẹ ta ẹvẹrẹ nọ a bi ro ru isukulu na ziezi, yọ o re wo emamọ omakpokpọ, nọ ọ rẹ gwọlọ oghẹrẹ emu jọ sa re ọ tẹ re-ọrẹ hẹ. Ahwo nọ a rrọ iruo ọkobaro oke-kpobi a rẹ kake kẹ uvẹ na.
6 U re no ohwo kpobi nọ ọ be fialoma via eva ze hrọ jẹ sai ru iruo evaọ oria kpobi nọ a jọ gwọlọ iẹe. Onana o gwọlọ ọkpọ ẹzi Aizaya ọruẹaro na, ọnọ ọ rehọ ọwhọ fialọ oma riẹ via re o ru obọdẹ iruo jọ, ọ ta nọ: “Mẹ na! Vi omẹ.” (Aiz. 6:8) O dhesẹ omaurokpotọ re evaọ uzuazọ riẹ kpobi. Uyoyou gbe isiuru nọ a rọ gwọlọ ga inievo rai oye o rẹ wọ ahwo nọ a be fialoma via kẹ Isukulu Ewuhrẹ Odibọgba na, viukpenọ a re wo isiuru kẹ ọkwa-omorro. Nọ a tẹ kẹ ai obọdẹ uwuhrẹ utioye no, a re rẹro mi ahwo nọ a nwrotọ no na re a fi eware nọ a wuhrẹ na họ iruo ro fi obọ họ kẹ amọfa.—Luk 12:48.
7 Irere: Evaọ etoke ewuhrẹ ọgaga ọrọ eka eree na, a rẹ “rehọ eme orọwọ na gbe emamọ uwuhrẹ . . . rọ kuọ” emọ-isukulu na. (1 Tim. 4:6) Onana o rẹ lẹliẹ ae te re a fi obọ họ jẹ ta udu họ amọfa awọ evaọ ikoko gbe ikogho nọ a vi rai kpohọ na. Evaọ eria buobu nọ a vi ahwo nọ a nwrotọ no Isukulu Ewuhrẹ Odibọgba na kpohọ no, ẹvi ọ ruọ iruo usiuwoma ota na no; a tuduhọ ahwo awọ no re a ru iruo ọkobaro, maero izoge na; yọ a fi obọ họ ziezi kẹ ahwo ọkpokpọ nọ a bi kuomagbe ahwo Ọghẹnẹ no.
8 Kọ whẹ yọ ọkpako ukoko hayo odibo oruiruo nọ ọ te rọo ho nọ ọ rrọ umuo ikpe 23 rite 50? Kọ who gbe roro kpahe Isukulu Ewuhrẹ Odibọgba na nọ who re fi obe họ kẹ? Kọ whẹ yọ oniọvo-ọmọzae ọmoha nọ o bi roro kpahe itee obaro evaọ egagọ Jihova? Kọ who gbe ru uzuazọ ra lọhọ jẹ kẹnoma no eware nọ i re reghe iroro ohwo re whọ sae ro ‘ẹthẹ ologbo iruo nọ o rovie fihọ’ na? O sae wha oghọghọ gbe evevọwẹ ilogbo se owhẹ. Ẹhẹ, Isukulu Ewuhrẹ Odibọgba na o rrọ oghale orọnikọ rọ kẹ ahwo nọ a nwrotọ no isukulu na ọvo họ, rekọ rọ kẹ ikoko ahwo Ọghẹnẹ wariẹ akpọ-soso họ.
[Box on page 3]
Epanọ A ro Wo Erere no Ewuhrẹ na Ze
“Ewuhrẹ na ọ gine lẹliẹ omẹ nyaharo no evaọ odibọgba mẹ gbe epanọ mẹ rẹ rọ rehọ ikereakere na ruiruo avọ areghẹ rọ sẹro uthuru na.”
“Isukulu na e kẹ omẹ aruọwha gaga no evaọ oghẹrẹ nọ mẹ rẹ rọ rehọ ẹro te ewha-iruo sa-sa nọ me wo evaọ ukoko na.”
“U nwene kabọ kabọ uzuazọ mẹ no, gbe oghẹrẹ iroro nọ me wo kpahe esuo Ọghẹnẹ gbe ukoko riẹ.”
“Uwuhrẹ nọ a kẹ omẹ u fiobọhọ kẹ omẹ vuhu oware nọ o jẹ roja re mẹ fialoma via kẹ iruo evaọ oria nọ ẹgwọlọ ọ jẹ mae rro.”