Riwi Odẹ Ezi Jihova Ghaghae
1 Setan ọ ta odẹ Ọghẹnẹ raha evaọ okenọ ọ lẹliẹ ọsẹ gbe oni ọsosuọ mai họ ru umuomu. Ẹdhọ ọ ta nọ Jihova ọ ta ọrue kẹ Adamu. (Emu. 3:1-5) Nọ odẹ ofuafo na u w’obọ kpahe ẹgba Ọghẹnẹ nọ o re ro ru ẹme riẹ gba na, eme ọ Setan na yọ ọtaraha nọ ọ mae rro kpobi. Ẹkwoma erugba ẹmẹrera ọrọ ẹjiroro ọfuafo riẹ, Jihova o si afuẹwẹ no odẹ riẹ jẹ wha erru họ iẹ no.—Aiz. 63:12-14.
2 Mai họ ahwo nọ Jihova ọ ‘rọ odẹ riẹ se.’ (Iruẹru 15:14, 17) Onana o k’omai uvẹ nọ ma re ro dhesẹ epanọ ma jọ eva mai roro kpahe erufuọ riẹ. Ma ruẹ nọ odẹ Jihova u ghine wo erru, keme u dikihẹ kẹ oware kpobi nọ u woma, vọ avọ ẹwo, yoyou, vọ avọ ohrọ, je kiẹrẹe. Ọwhewhe ọ vọ omai oma fiki oruaro Ọghẹnẹ. (Ol. 8:1; 99:3; 148:13) Kọ eme oma o rẹ w’omai ru?
3 Ru Odẹ Ọghẹnẹ Fo: A rẹ sai ru odẹ Ọghẹnẹ fo vi epanọ o rrọ no na ha. Rekọ ẹkwoma uruemu ofuafo mai gbe ovuẹ Uvie, ma sai dhesẹ nọ ma rri odẹ Ọghẹnẹ kpehru vi ofa kpobi. Joma bo via inọ: “Wha se odẹ ỌNOWO na, re wha kpẹwẹ iẹe, wha dhesẹ iruo riẹ vevẹ eva erẹwho na wha whowho nọ odẹ riẹ omaero.” (Aiz. 12:4) Ẹvẹ ma sai ro ru onana?
4 Ma rẹ sae rehọ uvẹ kpobi ro whowho odẹ Jihova gbe eware kpobi nọ u dikihẹ kẹ. Makinọ ma wọ no uwou hayo evaọ edhere ọnyakuo, n’uwou ruọ uwou hayo n’uwou-eki ruọ uwou-eki, evaọ iyẹrẹ hayo evaọ ifonu, iruo usiuwoma ota mai o rẹ kẹ Jihova ọghọ. Okenọ ma te duku ahwo nọ a wo isiuru nọ e k’ezọ, ma re ru ọruẹrẹfihọ re ma zihe je wuhrẹ ai viere kpahe Jihova. Oyena u dhesẹ nọ ma rẹ nya lele eyaa eyena ababọ ekie je thihakọ evaọ omodawọ mai re ma muọ iwuhrẹ Ebaibol họ. Avọ evawere, k’ukpe k’ukpe idu egba buobu e be riẹ, rehọ adhẹẹ kẹ, je ru odẹ erru Jihova fuafo.
5 Abọ owo mai n’udu kpobi ze evaọ iruo erufuọ odẹ Ọghẹnẹ u re dhesẹ oria nọ ma dikihẹ vevẹ evaọ avro nọ Setan ọ kpare via evaọ Idẹn na. Onana họ iruo nọ e mae ghare, mai w’ọghọ nọ ma rẹ sai ru. Joma rri odẹ ezi Jihova ghaghae je jiri ei avọ ọwhọ!—1 Irv. 29:13.