Edhesẹvia Odẹ Ọghẹnẹ
1 Ẹvẹ o jọ k’owhẹ evaọ oke ọsosuọ nọ who wuhrẹ kpahe odẹ Ọghẹnẹ? O rẹ jọ ahwo buobu oma wọhọ epanọ o via kẹ aye jọ nọ ọ ta nnọ: “Oke ọsosuọ nọ mẹ ruẹ odẹ Ọghẹnẹ evaọ Ebaibol na, irui i no omẹ aro ze. U duobọte udu mẹ gaga inọ mẹ sae riẹ odẹ-oma Ọghẹnẹ jẹ be rehọ iẹe ruiruo.” Rọkẹ iẹe, ẹriẹ odẹ Ọghẹnẹ yọ owojẹ nọ u w’uzou evaọ ẹriẹ Jihova wọhọ ohwo gbe usu nọ a rẹ sai wo kugbe ei.
2 Fikieme A Je Dhesẹ Iẹe Via? Odẹ Ọghẹnẹ u w’obọ kugbe ekwakwa riẹ, ẹjiroro riẹ, gbe iruẹru riẹ. U te je w’obọ kugbe esiwo. Pọl ukọ na o kere nọ: ‘Kohwo kohwo nọ o se odẹ Jihova a re ti siwi ei.’ Pọl ọ tẹ nọ inọ, “kẹvẹ ahwo a re ti ro se odẹ [riẹ]” otẹrọnọ ahwo a gbẹ kaki wuhrẹ kpahe Jihova je fi ẹrọwọ họ iẹe he? Fikiere o rrọ oware ovẹrẹ rọkẹ Ileleikristi re a dhesẹ odẹ Ọghẹnẹ gbe eware nọ u dikihẹ kẹ kpobi rọkẹ amọfa. (Rom 10:13, 14) Dede na, ẹjiroro ọfa nọ ọ mae rro ọ riẹ nọ a re ro dhesẹ odẹ Ọghẹnẹ via hrọ.
3 Evaọ ikpe ọ 1920 na, ahwo Ọghẹnẹ a vuhu avro nọ o kpomahọ ẹkpare kpehru esuo-okpehru Ọghẹnẹ gbe erufuọ odẹ riẹ na rono Ikereakere na ze. Taure Jihova ọ tẹ te raha irumuomu na re o si afuẹwẹ nọ a wha se odẹ riẹ na no, “akpọ kpobi ọ [rẹ] riẹ” uzẹme na kpahe iẹe hrọ. (Aiz. 12:4, 5; Izik. 38:23) Fikiere, ẹjiroro ọsosuọ nọ ma rẹ rọ ta usiuwoma họ re ma jiri Jihova evaọ ẹgbede je ru odẹ riẹ fo evaọ aro ahwo-akpọ kpobi. (Hib. 13:15) Uyoyou kẹ Ọghẹnẹ gbe ọrivẹ o rẹ wọ omai w’obọ vọvọ evaọ iruo nana nọ Ọghẹnẹ o ro mu na.
4 ‘Ahwo Rọkẹ Odẹ Riẹ’: Evaọ 1931 ma rehọ odẹ na Isẹri Jihova. (Aiz. 43:10) No anwọ okioye ze, ahwo Ọghẹnẹ a dhesẹ odẹ Ọghẹnẹ via no te epanọ obe ọ Proclaimers na, ẹwẹ-obe avọ 124, o rọ ta nnọ: “Wariẹ akpọ na họ, ohwo kpobi nọ o bi se odẹ Jihova ẹsikpobi a rẹ nwani vuhu iei wọhọ omọvo Isẹri Jihova.” Kọ a be rehọ ere vuhu owhẹ re? Ovuhumuo rọkẹ ewoma Jihova ọ rẹ wọ omai ‘kpẹwẹ odẹ riẹ,’ t’ẹme kpahe iẹe evaọ oke nọ u fo kpobi.—Ol. 20:7; 145:1, 2, 7.
5 Wọhọ ‘ahwo rọkẹ odẹ riẹ,’ ma rẹ yọrọ itee riẹ hrọ. (Iruẹru 15:14; 2 Tim. 2:19) Ẹsibuobu, uruemu uwoma Isẹri Jihova họ oware nọ ahwo a rẹ kaki muẹrohọ. (1 Pita 2:12) Ma rẹ gwọlọ gbe odẹ riẹ ku vievie he ẹkwoma ẹjẹfiẹ ehri-izi Ọghẹnẹ hayo ẹkwoma egagọ riẹ nọ ma re fihọ oria avivẹ evaọ izuazọ mai. (Izerẹ 22:31, 32; Mal. 1:6-8, 12-14) Ukpoye, jọ edhere uzuazọ mai o dhesẹ nnọ ma rri uvẹ ọ odẹ Ọghẹnẹ nọ a bi ro se omai na ghaghae.
6 Nẹnẹ na, ma be ruẹ owhowhovia Jihova na nọ o bi ru gba: “Rino obọ ovatha-ọre rite ukiediwo riẹ ere odẹ mẹ o [te rro te] eva udevie erẹwho na.” (Mal. 1:11) Joma ruabọhọ edhesẹ via uzẹme na kpahe Jihova je “jiri odẹ riẹ bẹdẹ bẹdẹ.”—Ol. 145:21.
[Study Questions]
1. Ẹvẹ ẹriẹ odẹ-oma Ọghẹnẹ o rẹ sai kpomahọ ahwo?
2. Fikieme o jẹ rrọ oware ovẹrẹ kẹ omai re ma wuhrẹ amọfa kpahe Jihova?
3. Ovẹ họ ẹjiroro ọsosuọ nọ ma rẹ rọ ta usiuwoma?
4. Ẹvẹ a te rọ rehọ odẹ Ọghẹnẹ riẹ Isẹri Jihova?
5. Ẹvẹ uruemu mai u ro w’obọ kugbe odẹ Ọghẹnẹ nọ a bi se kpahe omai?
6. Uvẹ-ọghọ vẹ ma rẹ sae reawere riẹ enẹna gbe bẹdẹ bẹdẹ?