Ekpẹti Onọ

◼ Ẹvẹ eruẹrẹahwohọ a sai ro fiobọhọ kẹ esẹ gbe ini evaọ obufihọ kẹ emọ rai re a yọrọ emamọ uruemu eva obọ iwuhrẹ?

Emọ e rẹ dhẹ zighi zighi, a rẹ keria oria ovo krẹkri hi. Ewuhrẹ ọ tẹ nwane fa no, yọ emọ na a ruẹrẹ oma kpahe no re a dhẹ kpenẹ avọ enẹ a ve je le emaha efa evaọ Ọgwa Uvie na hayo eva iwou iwuhrẹ efa, evaọ oria nọ imoto e rẹ kpahe, hayo evaọ edhere owotọ. Dede na, ohare na uzẹme inọ: “Ọmọ nọ a vuwa ọ rẹ rehọ omovuọ se oni riẹ.”—Itẹ 29:15.

Yoma na, inievo mai jọ nọ e kpako no e nwoma ilogbo jọ no fiki emọ nọ e roma fa ae je gele ai kie. Onana o wha uye-oruẹ gbe araha ro se esẹ gbe ini avọ ukoko na no. Rọkẹ omofọwẹ ọ omobọ rai gbe orọ amọfa, u fo re a kẹ emọ uvẹ re a dhẹ kpenẹ avọ enẹ jẹ zaharo evaọ obeva hayo obọ otafe Ọgwa Uvie na ha.

Esẹ gbe ini a wo owha-iruo Ikereakere nọ a re ro wuhrẹ emọ rai re a rehọ adhẹẹ kẹ eria egagọ mai. (Ọtausi. 5:1a) Eva iwuhrẹ Ileleikristi mai, ikokohọ esese, gbe ilogbo, a rehọ eruẹrẹahwohọ mu re a ruẹ nọ “a ru eware kpobi ziezi gba kiete” jẹ ruẹ nọ ‘ọruẹrẹfihọ owoma’ ọ riẹ. (1 Kọr. 14:40; Kọl. 2:5) A rẹ jaja aro vi hrọ, evaọ etoke iwuhrẹ na gbe okenọ e tẹ fa no, te evaọ obọ eva uwou gbe obọ otafe. Otẹrọnọ ọmọ ọ be dhẹ ohrẹ hayo o bi yoẹme he, ọruẹrẹahwohọ na ọ rẹ sae rehọ oma uwowolẹ kru ọmọ na daji, yọ ọ rẹ sae ta oware nọ oghẹrẹ uruemu utioye na u gbe fo ho kẹ ọmọ na. U fo re a rehọ oma uwowolẹ ta kẹ ọsẹ hayo oni ọmọ na kpahe ẹbẹbẹ na gbe ẹgwọlọ nọ a re ro muẹrohọ ọmọ na. U fo re ọsẹ hayo oni ọmọ na a jẹ emamọ owọ.

Ma riẹ nọ ẹsejọ emọ-eboba gbe emaha esese a rẹ sae viẹ hayo ru ozighi evaọ etoke iwuhrẹ. Eruẹrẹahwohọ na, nọ a re t’obei iminiti 20 no taure ewuhrẹ na o te ti muhọ na, a rẹ sae ruẹrẹ uhie egbara ivẹ urere na evaọ ọgwa na họ kẹ esẹ gbe ini nọ e gwọlọ keria etẹe kugbe emọ rai. U fo re mai ahwo nọ a kiọkọ na ma yoẹme ẹkwoma eria ẹkeria eyena nọ ma rẹ nya seba kẹ ae.

Otẹrọnọ ọmọ o bi kpokpo, u fo re ọsẹ hayo oni ọmọ na ọ j’owọ jọ. Otẹrọnọ ọsẹ hayo oni na o gbe ru ere he yọ ekpokpo na ọ tẹ be whaha ahwo ezọgaviẹ, ọruẹrẹahwohọ jọ ọ rẹ rehọ oma uwowolẹ ta kẹ ọsẹ hayo oni na re ọ wọ ọmọ na kpohọ otafe ọ ọgwa na. Nọ ma te zizie ahwo ọkpokpọ nọ i wo emọ ziọ iwuhrẹ, u fo re ma keria kugbe ai re ma fiobọhọ kẹ ae rẹrote emọ na otẹrọnọ a be viẹ hayo a bi kpokpo evaọ idhere efa.

O be wha oghọghọ s’omai nọ ma tẹ ruẹ emọ unuikpe kpobi evaọ Ọgwa Uvie na je muẹrohọ uruemu ezi rai evaọ uviuwou Ọghẹnẹ. (1 Tim. 3:15) Ẹkwoma adhẹẹ nọ a re wo kẹ ọruẹrẹfihotọ egagọ Jihova, a rẹ wha orro sei yọ ahwo ukoko na kpobi a re wo ọjẹrehọ rai.