Eduku Oghọghọ Evaọ Iruo Efuafo Ra
1 A “ghọghọ” zihe ze. Ikuigbe Ebaibol na i dhesẹ epanọ o jọ ilele 70 na oma evaọ okenọ a nya ze te n’iyẹrẹ kẹ Jesu, nọ a zihe no erẹ usiuwoma ota okẹkẹe jọ ze no. A wo oghọghọ rono oreva Ọghẹnẹ uruo ze. (Luk 10:17) Eme ọ rẹ sai fiobọhọ k’owhẹ duku oghẹrẹ oghọghọ utioye na evaọ iruo efuafo?
2 Uruemu Irẹro: Who wo uvẹ-ọghọ n’obọ Ọghẹnẹ ze nọ whọ rẹ rọ vuẹ ahwo kpahe ẹjiroro ogbunu Jihova. Ẹkwoma usiuwoma ota ra ze, whọ rẹ sai fiobọhọ siwi ohwo jọ no iruemu ogbekuo akpọ nana gbe egbregba egagọ erue ze. Whọ rẹ sae kẹ ahwo ẹruore ọ uzuazọ evaọ akpọ nọ ọ kare ẹwhọ nọ ọ wariẹ omai họ nẹnẹ na. Roro kpahe oghọghọ nọ Jihova o re wo nọ whọ tẹ sae kọ ibi uzẹme na fihọ udu nọ o rẹ sai yoẹme. Wo irẹro ewoma evaọ olẹ rọkẹ ẹzi Ọghẹnẹ re o jọ oma ra mọ ibi oghọghọ nọ whọ be rehọ udu ra kpobi le odibọgba na.
3 Ewuhrẹ nọ O w’Iruo: A rehọ etoke eme ithubro nọ Jesu ọ ta kẹ ilele 70 riẹ na ro dhesẹ Ewuhrẹ Odibọgba ẹdẹ inẹnẹ. Ọ kẹ uwuhrẹ re a sai ru odibọgba rai gbunu. (Luk 10:1-16) Nẹnẹ na Ewuhrẹ Odibọgba na o re wuhrẹ owhẹ idhere nọ whọ rẹ rọ nyabru ahwo, epanọ a re ro muọ ẹmeọta họ, gbe epanọ a re ro muhọ je ru ebe-iwuhrẹ Ebaibol. Ẹkwoma oma ra nọ whọ rẹ fialọ ze gbe ẹnyaharo nọ who re ru evaọ ona usiuwoma ota ra, whọ te ruẹ nọ uduama hayo iroro seba-ete nọ who wo kpobi i ti kpotọ, uduowha gbe oghọghọ i ve ti ruru ai.
4 T’ẹrovi Obaro: Jesu o duku oghọghọ evaọ iruo efuafo riẹ ghelọ uye-oruẹ nọ o thihakọ riẹ na. Fikieme? Fikinọ ọ t’ẹrovi eghale gbe uvẹ-ọghọ nọ e jọ obaro riẹ. (Hib. 12:2) Whọ rẹ sai ru epọvo na re ẹkwoma iroro gbe udu ra nọ whọ rẹ tọvi odẹ Jihova gbe eghale nọ e be tha evaọ akpọ ọkpokpọ Ọghẹnẹ na. Onana u ti fi oghọghọ gbe otofa ba odibọgba ra.
5 Iruo efuafo nọ a re ru kẹ Jihova họ uvẹ-ọghọ nọ o mae rro kpaobọ nọ whọ rẹ sai wo nẹnẹ na. Fikiere, ta nọ: “Mẹ gwọlọ ru orọeva ra, O Ọghẹnẹ mẹ.”—Ol. 40:8.