“Jawo Ae”—Evaọ Oghẹrẹ Vẹ?
1 Nọ ẹvi ukoko Jihova ọ be nyaharo na, ẹgwọlọ ọ riẹ kẹse kẹse re inievo-emezae nọ i te a ruiruo wọhọ idibo iruiruo. Inievo-emezae buobu nọ a ti ro mu hu, te izoge na, a wo isiuru re a ruiruo evaọ ukoko na. Nọ a te fi iruo efa ba kẹ ae, a re wo iroro na inọ a te ahwo nọ a re ro ruiruo a vẹ jẹ rehọ iẹe nọ a le oware jọ t’obọ. Re a gbẹ nyaharo o roma hwa ‘ẹjawo rri rai.’ (1 Tim. 3:10) Kọ ẹvẹ a re ro ru onana?
2 Abọ nọ Ekpako Ukoko A re Ru: Wọhọ abọjọ ọrọ itee Ikereakere kẹ idibo iruiruo nọ e rrọ 1 Timoti 3:8-13 na nọ a rẹ rọ wawo oniọvo-ọmọzae, ekpako e rẹ dawo ete oniọvo-ọmọzae re ọ wha owha-iruo riwi. A rẹ sae rehọ iẹe mu re o ru iruo obufihọ jọ nọ i kiekpahe ẹghale emagazini gbe ebe, ẹruorote emakrofonu, ẹruorote Ọgwa Uvie, gbe efa. Ekpako a re muẹrohọ epanọ ọ be k’uyo kẹ iruo jẹ rẹrote iruo nọ a kẹ riẹ. A re rri gwọlọ ekwakwa ọ ohwo nọ a re fievahọ, oware uruo evaọ ẹruoke, ẹkpatiẹ, omurokpotọ, ẹzi unevaze, gbe ẹgba ọriẹyeri kugbe amọfa. (Fil. 2:20) Kọ ọ rrọ oriruo evaọ ẹgọ gbe osẹ riẹ? Kọ o wo osegboja ọ owha-iruo? A rẹ jọ uzuazọ riẹ ruẹ “oriruo oma-urokpotọ nọ areghẹ ọ rẹ wha tha.” (Jem. 3:13) Kọ ọ be ghinẹ daoma re o te kẹ obufihọ k’amọfa evaọ ukoko na? Kọ ọ be wha ujaje Jesu re a ‘ru ilele ahwo’ na haro ẹkwoma ọwhọ nọ o bi ro w’obọ evaọ usiuwoma ota na?—Mat. 28:19; rri Uwou-Eroro ọ September 1, 1990 (ọrọ Oyibo), ẹwẹ-obe avọ18-28.
3 Dede nọ Ebaibol na o fi uvumọ ukpe jọ họ nọ ohwo ọ rẹ jọ nọ a jẹ rehọ iẹe mu odibo oruiruo ho na, o ta kpahe inievo-emezae itieye na wọhọ ‘ezae nọ e be gba odibo.’ Ma re rẹro nnọ a rẹ jọ etoke emuhọ hayo udevie ikpe ikpegbọ rai hi, maero nọ a fodẹ nọ a rẹ sai wo aye gbe emọ na. (1 Tim. 3:12, 13) Ezae itieye na a re kie kẹ “urusio ogena” ha rekọ a re su oma rai evaọ uruemu osegboja, a re wo emamọ edikihẹ gbe eva efuafo evaọ aro Ọghẹnẹ gbe ahwo-akpọ.—2 Tim. 2:22.
4 Dede nọ ẹgba nọ a kugbe ohwo yẹ u w’iruo na, uruemu gbe ẹzi ohwo họ oware nọ o r’oja. Kọ oniọvo-ọmọzae jọ ọ gwọlọ jiri Ọghẹnẹ evaọ omurokpotọ re o je ruiruo kẹ inievo riẹ? O tẹ rọ ere, Jihova ọ te ghale omodawọ riẹ re o ru ẹnyaharo evaọ ukoko na.