Otunyẹ Ọhwa gbe Uvẹ-Ọghọ Usiuwoma Ota Ra
1 Otunyẹ ọhwa yọ okpomahọ ọgaga—rọkẹ ewoma hayo eyoma. Ibe idibo erọ Jihova i re kpomahọ omai wowoma nọ o rẹ w’omai ru iruo iwoma Ileleikristi. (Hib. 10:24) Dede na, ahwo uviuwou, ibe-iruiruo, ibe-isukulu, erivẹ, hayo egbẹrioma efa nọ e rọ Isẹri hi e sai tunyẹ omai re ma nya lele edhere nọ ọ wọso ehri-izi Oleleikristi. A sae ta “eme iyoma kpahe uruemu ezi [mai] eva Kristi.” (1 Pita 3:16) Ẹvẹ ma sae rọ yọrọ ọtamuo mai re ma gbẹ hae ta usiuwoma na ghelọ otunyẹ ọhwa ọthọthọ nọ ma rẹ sae nyaku?
2 Ahwo Iviuwou: Ẹsejọ, ọzae uwou-orọo gbe ọsẹ nọ ọ rọ omọvo Isẹri Jihova ha ọ sae gwọlọ nọ aye gbe emọ riẹ a w’abọ evaọ odibọgba ẹgbede na ha. Ere o jọ evaọ uviuwou jọ nọ o rọ Mexico. Aye ọzae jọ avọ emọ ihrẹ riẹ a kurẹriẹ. Evaọ ọsosuọ, ọzae na ọ jẹ wọso keme ọ gwọlọ nọ uviuwou riẹ o ta usiuwoma na je fi ebe nọ a kporo no Ebaibol ze họ ada n’uwou ruọ uwou hu. O roro nọ iruo nana i si adhẹẹ no ae oma. Rekọ, aye gbe emọ riẹ a dikihẹ ga evaọ ẹjiroro rai re a gọ Jihova je w’obọ ẹsikpobi evaọ odibọgba na. Uwhremu na, ọzae na o te mu aghare edederehọ ọruẹrẹfihotọ Ọghẹnẹ kẹ iruo usiuwoma ota na họ ẹruẹ, ọ tẹ jẹ rehọ omariẹ mudhe kẹ Jihova. O rehọ e riẹ ikpe 15 taure ọ tẹ te jẹ uzẹme na rehọ, kọ ọ hae sai ru ere o hae jọ nọ uviuwou riẹ u thihakọ evaọ uvẹ-ọghọ rai re a ta usiuwoma na ha?—Luk 1:74; 1 Kọr. 7:16.
3 Ibe-Iruiruo: Otujọ a rẹ sai dede omodawọ ra re who se isẹri kẹ ibe-iruiruo rehọ họ. Oniọvo-ọmọtẹ jọ o gbiku nnọ okenọ ẹmeọta kpahe urere akpọ na ọ romavia evaọ ọfisi, a te sei ẹkoko fikinọ ọ jiroro kẹ ae nọ a se Matiu uzou avọ 24. Rekọ, nọ edẹ jọ e vrẹ no, ibe-oruiruo riẹ jọ ọ tẹ ta kẹe nọ o se uzou na no yọ o were riẹ. Ọ tẹ rehọ obe jọ kẹe, a te je ru ọruẹrẹfihotọ kẹ uwuhrẹ Ebaibol kugbei avọ ọzae riẹ. Uwuhrẹ ọsosuọ na u kri te ighọjọ ivẹ irioke. Nọ a ru uwuhrẹ avọ esa no, a te muọ ewuhrẹ họ ẹnya, yọ u kri hi a tẹ siọ utaba ba ese je muọ abọ họ ewo evaọ odibọgba na. Kọ oniọvo-ọmọtẹ nana ọ gbẹ hae daoma re ọ ghale ẹruore riẹ kugbe amọfa ha onana o hae via?
4 Ibe-Isukulu: O rọ oware okpokpọ kẹ izoge Isẹri hi re a ruẹ otunyẹ ọhwa eva isukulu jẹ dhozọ nọ izoge efa i ti rri rai vo fikinọ a bi w’obọ evaọ iruo usiuwoma ota na. Uzoge Oleleikristi jọ evaọ United States ọ ta nọ: “Mẹ jẹ dhozọ isẹri-ise kẹ izoge efa keme mẹ jẹ dhozọ ẹkoko nọ a re ti se omẹ.” Fikiere ọ tẹ whaha uvẹ nọ o re ro se isẹri kẹ ehwa riẹ eva isukulu gbe evaọ ẹkwotọ na. Ẹvẹ whọ sai ro wo ẹgba nọ who re ro dikihẹ kẹ otunyẹ ọhwa? Fievahọ Jihova, hae gwọlọ ọjẹrehọ riẹ. (Itẹ 29:25) Rri ọghọ fihọ ẹgba ra nọ who bi ro fi Ẹme Ọghẹnẹ h’iruo evaọ odibọgba ra. (2 Tim. 2:15) Uzoge nọ ma fodẹ na o te muọ olẹ họ ẹlẹ se Jihova, be yare iẹe re o fiobọhọ kẹe wo isiuru nọ ọ rẹ rọ t’ẹme kẹ ibe-isukulu riẹ. O te muọ isẹri-ise ọnyakuo họ eva isukulu, wo emamọ iyẹrẹ, je muọ ẹme họ ẹta kẹ ohwo kpobi nọ ọ riẹ. O ku rie họ nọ: “Izoge eyena e gwọlọ ẹruore kẹ obaro na, yọ Jihova ọ be rehọ omai fiobọhọ kẹ ae.”
5 Erivẹ: Ma sai wo erivẹ hayo egbẹrioma nọ eva mai e rẹ dha fiki oghẹrẹ ahwo nọ ma rrọ gbe fiki ẹrọwọ mai. Otẹrọnọ whọ rẹ dhozọ oware nọ a bi roro, nọ oma ra nọ: ‘Kọ a riẹ uzẹme nọ u re su kpohọ uzuazọ ebẹdẹ bẹdẹ na? Eme mẹ rẹ sai ru re mẹ nyate idu rai?’ Ọsẹro okogho jọ o muẹrohọ nọ a re wo emamọ iyẹrẹ nọ a tẹ be hai se umutho isẹri kẹ erivẹ kẹse kẹse. Lẹ se Jihova kẹ ẹgba gbe ereghẹ nọ o gwọlọ re whọ hae rọ gwọlọ ahwo udu-oruọzewọ via.—Fil. 4:13.
6 Ma te kie kẹ otunyẹ ọhwa ọthọthọ o sae were otu ọwọsuọ eva, rekọ kọ ere oruo o rẹ wha erere nọ ọ mai woma se ai—hayo s’omai? Ahwo otẹwho Jesu a wọso iẹe. O tube thihakọ eme ẹsọ inievo riẹ dede. Rekọ ọ riẹ nọ edhere ọvo nọ ọ sai ro fiobọhọ kẹ ae họ ẹkwoma etilẹmu edhere nọ Ọghẹnẹ ọ ruẹrẹhọ kẹe. Fikiere, Jesu “o wo odiri kẹ erahaizi eva ukpokpoma kpobi nọ a kẹ riẹ.” (Hib. 12:2, 3) Ma re ru ere hrọ. Gbaemu re whọ rehọ uvẹ-ọghọ ra nọ who re ro whowho ovuẹ Uvie na ro ruiruo ziezi. Ẹkwoma ere oruo, “who re ro siwi oma ra gbe ahwo [nọ] a be kezọ ẹme ra.”—1 Tim. 4:16.