Jọ Ọnọ Ọ rẹ Gaviezọ Ziezi
1 O rẹ gwọlọ omonyẹ re a gaviezọ ziezi. O rẹ jẹ gwọlọ isiuru mi ọnọ ọ be gaviezọ na re o wuhrẹ je wo erere no oware nọ o yo ze. Fikiere, Jesu o fiẹgbahọ ẹgwọlọ nọ a rẹ rọ ‘yọrọ oma epanọ wha re yo.’—Luk 8:18.
2 Onana o mae rọ ere evaọ okenọ ma te kpohọ iwuhrẹ ukoko, ikokohọ esese, gbe ilogbo. Enana yọ etoke nọ ma rẹ jọ gaviezọ ziezi. (Hib. 2:1) Igogo eware jọ nọ i re fiobọhọ k’owhẹ jọ ọnọ ọ rẹ gaviezọ ziezi eva omakugbe Ileleikristi nana ena.
◼ Wo ovuhumuo kẹ aghare iwuhrẹ na. E rọ edhere nọ ọ viodẹ nọ ‘ỌNOWO na o bi ro wuhrẹ’ omai ẹkwoma “odibo oruọzewọ” na.—Aiz. 54:13; Luk 12:42.
◼ Ruẹrẹ oma kpahe. Kiẹ obe nọ a ti wuhrẹ na riwi, yọ jọ u mu owhẹ ẹro nọ whọ wha Ebaibol ra gbe obe nọ a ti wuhrẹ na lele oma.
◼ Evaọ etoke iwuhrẹ na, daoma gaga re whọ tẹrovi ewuhrẹ na. Whọ rẹ whaha ẹmeọta kẹ enọ e keria kẹle owhẹ gbe eriwi oware nọ amọfa evaọ ogbotu na a bi ru. Daoma re iroro kpahe eware nọ who bi ti ru evaọ okenọ ewuhrẹ na ọ tẹ fa no hayo kpahe eme omobọ ra efa e siọ ezọgaviẹ ra ba ẹrehọ.
◼ Roro kpahe ẹme nọ a be ta na. Nọ oma ra nọ: ‘Ẹvẹ onana u ro kie kpahe omẹ? Okevẹ me bi ti ro fi ei họ iruo?’
◼ Kere igogo eme gbe ikere fihotọ kpẹkpẹe. Onana u ti fiobọhọ k’owhẹ tẹrovi ẹme nọ a be ta na je fiba ekareghẹhọ ra ọrọ igogo eme na rọkẹ eroruiruo evaọ obaro.
3 Wuhrẹ Emọ Ra re A Gaviezọ: Emọ e gwọlọ uthubro abọ-ẹzi. (Izie. 31:12) Evaọ oke anwae “ahwo kpobi nọ a rẹ sae yo ẹme” evaọ udevie ahwo Ọghẹnẹ a rẹ gaviezọ nọ a te bi se Uzi na kẹ ae. (Neh. 8:1-3) Nọ esẹ gbe ini i te bi w’obọ evaọ iwuhrẹ jẹ be gaviezọ ziezi, emọ rai e te sai ru epọvo na re. U fo ho re a wha eware arozaha hayo ebe iwoho ze re emọ e rọ zaharo. Omunya kpohọ eria ame-okuo o rẹ whaha ezọgaviẹ rai. Nọ o rọnọ “ugheghẹ o rọ eva ọmaha” na, esẹ gbe ini e rẹ daoma gaga re a ruẹ nọ emọ rai a keria oria ovo jẹ gaviezọ eva iwuhrẹ.—Itẹ 22:15.
4 Ẹkwoma ẹjọ enọ e rẹ gaviezọ ziezi, ma re dhesẹ nọ ma ghine wo areghẹ yọ ma gwọlọ ‘rehọ ithubro efa.’—Itẹ 1:5.