Who Sioma h’Emu Hu!
1 Okenọ ma tẹ ruẹrẹ oma kpahe re ma kpohọ usiuwoma ota n’ẹthẹ ru’ẹthẹ, ọzadhe nọ ọ mae rro nọ ma rẹ nyaku o sae jọ re ma kpama no uwou mai. Iroro nnọ ma te he e sae lẹliẹ omai sioma h’emu re ma kpama n’uwou re ma nyae ta uzẹme na kẹ “ahwo kpobi.” (1 Tim. 2:4) Rekọ u fo re ma sioma h’emu hu evaọ ewhowho emamọ usi na. Eme jabọ?
2 Ovuẹ Jihova O Rrọ: Jihova ọ ta ẹme riẹ k’omai no ẹkwoma Ebaibol na. Nọ ma tẹ wha ovuẹ onana se amọfa, iroro riẹ ma be wha na, orọnikọ ọmai hi. (Rom 10:13-15) Okenọ ahwo a tẹ se ovuẹ Uvie na, Jihova a be ghinẹ se na. Ghele na, oma o rẹ lọhọ omai hi. Ma wo evaifihọ inọ ovuẹ onana u ti duobọte udu ahwo nọ a bi siuru enwene evaọ uyero akpọ na gbe enọ i wo ọdawẹ kpahe ẹgwọlọ abọ-ẹzi rai.—Izik. 9:4; Mat. 5:3, 6.
3 Jihova O re Si Ahwo Na: Ohwo nọ ọ se nọ ọ rẹ gaviezọ k’omai evaọ oke nọ u kpemu no ọ sae gaviezọ enẹna fikinọ uyero riẹ u nwene yọ udu riẹ o lọhọ no. Jihova ọ sai dhesẹ evezi riẹ kẹ ohwo ọyena je ‘si ei’ enẹna. (Jọn 6:44, 65) Onana o tẹ via, ma rẹ ruẹrẹ oma kpahe re Jihova ọ rehọ omai ruiruo je fi oma h’otọ kẹ ekpakpọ enjẹle evaọ ẹgwọlọ ahwo otiọye na.—Evia. 14:6.
4 Ọghẹnẹ Ọ rẹ k’Omai Ẹzi Riẹ: Ẹzi ọfuafo o re fiobọhọ k’omai ta ẹme “Ọnowo na ududu.” (Iruẹru 14:1-3) Ma tẹ kareghẹhọ nọ ma wo uketha ogaga nana evaọ odibọgba mai, ehoo ọ te ro omai oma ha re ma ta uzẹme na kẹ erivẹ, ibe-iruiruo, ibe-eklase, imoni, hayo ahwo nọ a riobe ziezi hayo edafe.
5 Jesu O Wuhrẹ Omai Epanọ Ma re Ru Iei: Jesu ọ rehọ enọ nọ e rẹ kpare iroro, etadhesẹ elọlọhọ, gbe iroro-ejẹ Ikereakere ro ruiruo. O ru uzẹme na vẹ evaọ edhere ọlọlọhọ, nọ o re siuru, no udu riẹ ze. Enana e gbẹ rọ idhere nọ e mai woma nẹnẹ na. (1 Kọr. 4:17) Uyero oria nọ ma be jọ ta usiuwoma na o sai wo ohẹriẹ, rekọ ovuẹ ẹgba Uvie na o gbẹ rọ ovona.
6 Ma wo uvẹ-ọghọ nọ Jihova ọ be rọ rehọ omai ruiruo ro fiobọhọ kẹ ahwo evaọ edhere obọdẹ nọ o r’oja. A j’oma sioma h’emu hu! J’oma g’ẹro jẹ kuvẹ re Jihova o “rovie ẹthẹ eme riẹ kẹ omai” re ma sae ta emamọ usi na kẹ amọfa.—Kọl. 4:2-4.