Edhere nọ Ọ Mai w’Iruo nọ Who re ro ‘You Erivẹ Ra’
1 Okenọ whọ tẹ ruẹ erivẹ nọ e rọ ẹbẹbẹ, ẹvẹ oma o rẹ jọ owhẹ? Whọ sae ta nọ, ‘Ohrọ rai o rẹ re omẹ, yọ mẹ rẹ gwọlọ fiobọhọ.’ Oma o sae wọ owhẹ re who ru azọhọ unevaze kẹ ufuoma rai. Iruo iwoma itieye na rọkẹ erere ahwo nọ a rrọ ẹbẹbẹ i re dhesẹ uyoyou kẹ erivẹ mai. (Mat. 19:19) Dede na, orọnikọ azọhọ unevaze họ edhere nọ ọ mai w’iruo nọ ma re ro dhesẹ uyoyou erivẹ hẹ.
2 Usiuwoma Ota O Mai w’Iruo: Dede nọ Jesu o ru emamọ iruo igbunu erọ usiwo, jẹ kẹ ikọ riẹ ẹgba re a ru epọvo na re, ọ fodẹ onana ha evaọ okenọ ọ jẹ kẹ ae ithubro urere riẹ taure o te ti tovrẹ kpohọ obọ odhiwu. Ikpoye, ọ kẹ ujaje nọ: “Fikiere wha wuhrẹ ahwo erẹwho kpobi, wha họ ae ame evaọ odẹ Ọsẹ, gbe Ọmọ gbe Ẹzi Ẹri, wha wuhrẹ ai, re a ru eware kpobi nọ mẹ vuẹ owhai.” (Mat. 28:19, 20) Usiuwoma ota u w’iruo keme u re fiobọhọ kẹ ahwo fi ehri-izi Ebaibol h’iruo. Onana u ve fiobọhọ kẹ ae whaha ebẹbẹ nọ e rẹ sae wha enwoma ikrẹkri se ai. Wọhọ oriruo, efihiruo ehri-izi Ebaibol nọ i kie kpahe iruo, uruemu mai kpahe ekwakwa efe, ogbẹlọ imu, gbe ekoko ute uruemu riẹ, e rẹ sai fiobọhọ whaha uvuhu, fiba omakpokpọ jẹ kẹ imuẹro uzuazọ uviuwou evawere.—Itẹ 10:4; Ẹf. 4:28; 1 Tim. 6:6-8.
3 Ọzae ikpe 35 jọ ọ rọwo nọ: “Nọ mẹ jọ ikpe 18 hayo 19 yọ me zihe ro ọgbidi no. Nọ mẹ jọ ikpe 20 mẹ jẹ hae da ololo ologbo udi ogaga yọ o tẹ kao egọ ebiẹ 20 evaọ okpẹdẹ. A rehọ omẹ kpohọ ẹsipito isiasa evaọ omodawọ re a siwi omẹ no uruemu mẹ na, rekọ edọkita na e sai fiobọhọ họ. Dede nọ me je wo oware wọhọ ₦75,400.00 evaọ amara, udugaga mẹ rẹ rọ wha umutho riẹ jọ ziọ uwou se uviuwou mẹ.” Oware nọ Isẹri Jihova e ta kẹe evaọ etoke usiuwoma ota rai oye o kẹ riẹ isiuru re o wo omamọ usu kugbe Ọnọma riẹ. Ọ tẹ ta haro nọ: “Ẹkwoma olẹ, mẹ sai wo oware nọ edọkita e sai ru hu.” Ma rẹ sai roro okpomahọ owoma nọ onana u wo kẹ uzuazọ uviuwou riẹ no!
4 Uzẹme, usiuwoma ota u re ku ebẹbẹ kpobi họ họ. Ghele na u w’iruo keme o rẹ kẹ ẹruore. Evaọ otọ Uvie Ọghẹnẹ ebẹbẹ kpobi i ti kuhọ. Jesu o re ti ru eware igbunu erọ abọ-iwo rọkẹ ahwo kpobi nọ e rọ uzuazọ. Erere riẹ ọ te jọ bẹdẹ bẹdẹ. (Jọn 17:3) Fikiere ewuhrẹ ahwo re a fi ẹrọwọ họ idhe ẹtanigbo Jesu gbe eruẹrẹfihotọ riẹ o rẹ wha ewoma nọ ọ mae rro kpobi ze evaọ ukuhọ riẹ.—Jọn 3:16.
5 O Gwọlọ Owowa Evaọ Eyou Erivẹ: Uzẹme, obufihọ abọ-ẹzi nọ a re fiẹgba họ ziezi, o rẹ whaha omai ẹkẹ obufihọ abọ-iwo ho otẹrọnọ obọ mai u te. Rekọ nọ ma te bi fiobọhọ kẹ amọfa evaọ abọ-iwo, ajọ owha-iruo ọsosuọ mai gbe edhere nọ ọ mai w’iruo ọrọ edhesẹ uyoyou kẹ erivẹ mai o thọrọ omai ẹro ho—usiuwoma ota orọ Uvie Ọghẹnẹ nọ a ro mu na.—Mat. 24:14.