Ewuhrẹ Obe ọ Eruẹaruẹ Daniẹl Na
1 Muhọ no oka ọ April 17 vrẹ, ma ti wuhrẹ obe na Kezọ kẹ Eruẹaruẹ Daniẹl! evaọ Uwuhrẹ Obe Ukoko na. Ahwo buobu a se obe urirẹ nana no, rekọ obọnana ma ti wo uvẹ nọ ma te rọ reawere irere iroro-ejẹ otu kpahe iẹe. Ma zizie iwhowho-uvie kpobi, enọ i wo isiuru, gbe emaha na, ẹhẹ, ma tuduhọ ae awọ, re a nyaze k’oka k’oka kẹ ewuhrẹ odidi ọrọ obe Ebaibol Daniẹl na.—Izie. 31:12, 13.
2 Omaa gbe Ithubro Uwuhrẹ Na: Omaa ewuhrẹ obe ọ Eruẹaruẹ Daniẹl na kpobi o rrọ ukere ọ Odibọgba Uvie Mai ọnana. Ru re who fi ojọ họ eva obe ewuhrẹ ra na. Omaa na u dhesẹ izou gbe idhe-eme obe na gbe awọ obe Daniẹl nọ a te t’ẹme kpahe evaọ abọ oka ovuovo. Eme-obotọ na i dhesẹ oghẹrẹ gbe oke nọ a te rọ t’ẹme te eme jọ nọ e rọ obe na. Evaọ ekuhọ uwuhrẹ oka kpobi, a tuduhọ owuhrẹ na awọ re ọ kiẹ awọ obe Daniẹl nọ a kere fihọ omaa oka oyena kugbe utu na. Oke o tẹ riẹ, a rẹ sai se jẹ t’ẹme kpahe awọ na. Awọ jọ e te fa no oka jọ ruọ oka ọdekọ fiki epanọ a gbẹ be t’ẹme kpahe awọ yena.
3 Ruẹrẹ Oma Kpahe kẹ Ewuhrẹ Odidi: Ma daoma re ma ruẹ nọ oke buobu o riẹ k’oka k’oka re a sae roma totọ wuhrẹ oria ẹkpoka nọ a dhesẹ na ziezi. Iwuhrẹ ene jọ e rẹ kpẹkpẹe. Fikiere, evaọ ekuhọ ewuhrẹ ọrọ oka June 5 na, owuhrẹ na ọ rẹ sai fi ọkiẹriwo Daniẹl 2:1-40 kugbei. Rọkẹ ẹkpoka June 26, a rẹ sae kiẹ Daniẹl 3:1-30 riwi. Oka ọ September 4 u re kugbe ẹmeọta odidi ọrọ iwoho gbe ikereakere nọ e rọ ẹwẹ-obe avọ 139 na. A rẹ ta kpahe omaa nọ o rọ ẹwẹ-obe avọ 188 avọ 189 na evaọ oka ọ October 2.
4 Ruẹrẹ oma kpahe ziezi kẹ uwuhrẹ na k’oka k’oka, jẹ reawere abọ nọ who re wo. Wo ovuhumuo kẹ uvẹ-ọghọ ra nọ whọ be rọ nyusu kugbe ukoko Jihova nọ a rẹ ruẹ je bi wo erere no orimuo gbe otoriẹ nọ otu ẹrọwọ riẹ nọ a wholo na a be kẹ ze. (Daniẹl 12:3, 4) Tuduhọ amọfa awọ re a ziọ obe uwuhrẹ na kẹse kẹse. Jomai kpobi a kezọ kẹ ẹme eruẹaruẹ Ọghẹnẹ nọ a dhesẹ via evaọ obe urirẹ Daniẹl na.—Hib. 10:23-25; 2 Pita 1:19.