Kọ O Rrọ Ọzadhe kẹ Usiuwoma Ota?
1 Izuazọ ahwo buobu e vọ avọ iruo. Isẹri Jihova a rọ usu ahwo nọ eware e mai bu abọ gaga na—a re wuhrẹ Ẹme Ọghẹnẹ, kpohọ iwuhrẹ ukoko, je w’obọ evaọ usiuwoma ota na. Fibae, obọ mai o rọ iruo okọ, iruo uwou hayo iruo isukulu, gbe ewha-iruo efa buobu, yọ enana kpobi e rẹ rehọ oke. Onana o mae rọ use-abọ kẹ enọ i wo uzou uviuwou.
2 Fiki ẹbẹbẹ ugho evaọ eria buobu, enọ i wo uzou iviuwou a re ruiruo euwa buobu jẹ daoma gaga re a sae ko iviuwou rai. Nọ iruo okọ e tẹ be rehọ oke gbe ẹgba rai buobu, umutho ọvo u re kiọkọ kẹ iruo usiuwoma ota na. Nọ o rọnọ a wo owha-iruo re a gwọlọ kẹ iviuwou rai evaọ abọ-iwo na, ejọ i re roro nọ umutho obọ ọvo a rẹ sai wo evaọ odibọgba na. (1 Tim. 5:8) Uzẹme, itunyẹ buobu e riẹ nẹnẹ rọ kpahe ewo ẹgwọlọ uzuazọ. Rekọ u du fo ho re iruo okọ ohwo e jọ ọzadhe kẹ ewhowho emamọ usi na. (Mak 13:10) Fikiere, u re woma re ma kiẹ uzedhe uyero mai riwi.
3 Fikinọ eyero akpọ na o bi dhe enwenwene, ọnọ o wo uzou uviuwou ọ sae raha oke buobu fihọ iruo, avọ irẹro re o koko igho fihọ kẹ eware idudhe. (1 Kọr. 7:31) Nọ o rẹ wọhọ nọ oke buobu nọ a rẹ raha fihọ iruo okọ o rẹ kẹ ekwakwa efe efa hayo uvẹ buobu erọ arozaha omarukpokpọ gbe omawere na, kọ onana o te kẹ uviuwou na evawere gbe evevọwẹ viere otẹrọnọ oke nọ a hai fihọ ilale abọ-ẹzi gbe iwuhrẹ enya ẹsikpobi oye a raha ro ru ei? Ma rẹ ghinẹ whaha oware kpobi nọ u re fi edikihẹ abọ-ẹzi mai họ ọza. Ẹmeoyo kẹ ohrẹ Jesu re a “kọ okọ obọ odhiwu” je ‘fe efe evaọ obọ Ọghẹnẹ’ na họ edhere areghẹ.—Mat. 6:19-21; Luk 12:15-21.
4 Kake Gwọlọ Isiuru Uvie: Jesu o wuhrẹ ilele riẹ re a fi eware abọ-ẹzi haro eware efa kpobi. Ọ tuduhọ ae awọ nọ: “Wha ruawa ha, nnọ, Didi oware ma rẹ ria? hayo oware nọ ma rẹ da? hayo eme ma rẹ rehọ gọ egọ?” Fikieme ọ jẹ ta ere? O ru rie vẹ nọ: “Keme Ọsẹ obọ odhiwu rai ọ riẹ nọ eware enana kpobi i kiọkọ kẹ owhai.” Oyena u te ghine mu omai ẹro, uvumọ ọzadhe ọ te jariẹ hẹ nọ ọ te whaha omai eruo oware nọ Jesu ọ ta lele iei na: “Wha kake guọlọ uvie riẹ gbe [ẹrẹreokie] riẹ, eware enana kpobi [eware iwo nọ i fo] a reti fi ai họ kẹ owhai.” Ọghẹnẹ ọ te ruẹ nọ ma wo eware eyena! (Mat. 6:31-33) Onana o rrọ oke nọ awa-ọruọ nọ o fo ho kpahe eyero uzuazọ ọ rẹ rọ sa omai awọ dhe he hayo re isiuru re ma wo uzuazọ akpọriọ evaọ eyero-akpọ nọ ọ be te vrẹ kẹle na e rehọ iroro mai.—1 Pita 5:7; 1 Jọn 2:15-17.
5 Uzedhe ẹjiroro iruo okọ họ re ohwo o wo ẹgwọlọ abọ-iwo riẹ. Rekọ bro eware ma ghinẹ gwọlọ? Pọl ukọ na o kere nọ: “Otẹrọnọ ma wo emuore gbe emuẹgọ jọ enana e da omai ẹro.” Kọ ma be daoma re ma wo vi ere? Otẹrọ ere, ma rẹ sai vu okpẹtu nọ Pọl ọ vẹvẹ unu kpahe na inọ: “Ahwo nọ a re siuru efe a re kie ruọ ẹdawọ, je kie ẹta, je kie ruọ urusio eware igheghẹ avọ [oma-onwa] buobu nọ i re suẹ ahwo ruọ ekie gbe ẹraha.” (1 Tim. 6:8, 9; Mat. 6:24; Luk 14:33) Ẹvẹ ma sae rọ riẹ sọ isiuru nọ e vrẹta i bi si omai kpemu?
6 Otẹrọnọ fiki ilale isiuru obọ mai umutho abọ ọvo ma bi wo evaọ usiuwoma ota hayo ma be ruẹ ẹgwọlọ nọ ma re ro ru omodawọ jọ fiki emamọ usi na ha, koyehọ u fo re ma ru enwene evaọ eware nọ ma rọ karo. (Hib. 13:15, 16) Oghẹrẹ eyero uzuazọ nọ o mae rrọ owowa u ti fiobọhọ gaga k’omai si awhaha usiuwoma ota mai nana no. Isiuru Uvie e rẹ karo ẹsikpobi evaọ eroruiruo oke gbe ẹgba mai.
7 Iruo nọ E Rrọ Ivrẹvru Hu: Eme ọ Pọl e tuduhọ omai awọ re ma “jọ owhreze iruo Ọnowo na, nnọ [ma] riẹ nọ iruo [mai] eva Ọnowo na e rọ ivrẹvru hu.” (1 Kọr. 15:58) Oware ọsosuọ evaọ “iruo Ọnowo na” họ usiuwoma ota Uvie na gbe iruo ilele-iruo na. (Mat. 24:14; 28:19, 20) Re ma sai w’obọ vọvọ wọhọ epanọ o rẹ lọhọ te, ma rẹ m’omaa oke rọkẹ usiuwoma ota na k’oka k’oka jẹ daoma re ma siọ oke oyena ba e ro le ekwakwa efa. (Ẹf. 5:15-17) Kẹsena, iruo okọ hayo oware ofa jọ o gbẹ sae jọ ọzadhe kẹ odibọgba mai hi.
8 Ma tẹ fialoma via re ma ghale uzẹme Ebaibol kugbe amọfa, ma rẹ ruẹ evawere ilogbo nọ i re no ẹkẹ zẹ. (Iruẹru 20:35) Ẹkwoma ele iruo usiuwoma ota Uvie na, ma rẹ sai rri kpohọ obaro na avọ evaifihọ, “keme Ọghẹnẹ ọ kare ọ rọ ẹrẹreokie he nọ iruo [mai] i re vẹro ho gbe uyoyou nọ [ma] be rehọ fiki riẹ ruẹ.”—Hib. 6:10.