Ọjọriẹ Ehaa Ekareghehọ

Enukpe ọnana ehaa Ekareghẹhọ na o kie fihọ Edene-Oka, March 28. U fo re ekpako na a muẹrohọ eware nana:

◼ Nọ a te bi fi oke họ kẹ omakokohọ na, jọ u mu owhai ẹro nọ a rẹ wọ ebrẹdi gbe udi na ha bẹsenọ ọre o re kiediwi no.

◼ Ahwo kpobi, kugbe ọnọ ọ te kẹ ovuẹ na, a rẹ riẹ uzedhe oke gbe oria ehaa na.

◼ A re wo oghẹrẹ ebrẹdi gbe udi nọ a gwọlọ na te obọ a vẹ jẹ ruẹrẹ ae kpahe.—Rri Uwou-Eroro ọ February 15, 1985 (ọrọ Oyibo), ẹwẹ-obe avọ 19.

◼ A rẹ kake wha imidhe, egalase, gbe emẹjẹ avọ ohọ-emẹjẹ nọ u kiehọ ze ọgwa na a vẹ jẹ kake ruẹrẹ ae họ oria rai.

◼ A re ru Ọgwa Uvie na hayo oria ofa nọ a ti kokohọ fo tẹtẹtẹ evaọ ẹruoke.

◼ A rẹ kake salọ eruẹrẹahwohọ avọ enọ e te wọ emu na jẹ kẹ ae uthubro kpahe oghẹrẹ nọ a re ru gbe ẹkẹ-iruo rai, gbe ẹgwọlọ nọ a rẹ rọ wha ẹgọ gbe osẹ nọ u wo adhẹẹ.

◼ A re ru ọruẹrẹfihotọ re a wọ ebrẹdi gbe udi na se ọnọ a wholo kpobi nọ oma riẹ o ga ha nọ ọ sae nyaze he.

◼ Nọ ikoko nọ e te jọ Ọgwa Uvie ọvo ru ehaa na e tẹ vrẹ ọvo, emamọ ọruẹrẹfihọ ọ rẹ jariẹ evaọ udevie ikoko na re a siọ ahwo ba ẹkeke evaọ unuẹthẹ, edhere owotọ, gbe oria nọ a rẹ dhẹ imoto fihọ.