Ru Oghọghọ Ra Rro Evaọ Usiuwoma Ota
1 Oghọghọ ẹghale emamọ usi na—kọ who bi woi evaọ odibọgba ra? Ma gbẹ yọroma ha, akpọ omuomu nọ ọ wariẹ omai họ na ọ rẹ sai fi ozọ họ omai ẹro kpahe usiuwoma ota, mi omai oghọghọ mai no. Re ma ruiruo evaọ ẹkwotọ nọ a be jọ gaviezọ họ o rẹ sai ru ọwhọ mai whrehe. Kọ didi owọ ma rẹ sae jẹ re ma ru oghọghọ mai rro evaọ usiuwoma ota?
2 Wo Irẹro Ewoma: Ẹyọrọ irẹro ewoma ọ rẹ sai ghine fiobọhọ. Edhere jọ nọ a re ro ru ere họ ẹkwoma eroro didi kpahe uvẹ oghaghae mai orọ ẹjọ ‘ibe iruiruo Ọghẹnẹ.’ (1 Kọr. 3:9) Jesu ọ tẹ jẹ rrọ kugbe omai evaọ erugba iruo nana. (Mat. 28:20) Yọ ọ be rọ ogba-ẹmo enjẹle rọ tha omai uke. (Mat. 13:41, 49) O rẹ sai mu omai ẹro inọ Ọghẹnẹ ọ be kpọ omodawọ mai. (Evia. 14:6, 7) Fikiere makọ oghẹrẹ owọ nọ ahwo-akpọ jọ a rẹ jẹ kpahe iruo mai, evawere no e rrọ obọ odhiwu i re logbo!
3 Ruẹrẹ Oma Kpahe Ziezi: Emamọ oma-oruẹrẹhọ u re je fiba oghọghọ mai. U re du gwọlọ iruo ilogbo jọ re a tẹ ruẹrẹ oma họ kẹ odibọgba na ha. Umutho iminiti jọ ọvo o rẹ rehọ re a jọ evaọ emagazini ekpokpọ hayo ebe nọ a ti fihọ ada evaọ amara na roro kpahe eme nọ a rẹ rọ ta usiuwoma. Salọ edhere-ẹmeọta jọ rono “Ẹme nọ Whọ rẹ Ta Kpahe Emagazini Na,” evaọ Odibọgba Uvie Mai na ze. Rri kpohọ uko-obeva ọ January 2002 na, “Idhere Usiuwoma Ota nọ A j’Iroro Rai,” hayo rri omobe ọ Ebaibol E rọ Jiroro na rọkẹ emamọ eme-emuhọ. Otẹrọnọ unoma jọ nọ ahwo ẹkwotọ ra a re gu ẹsikpobi o rrọ ọzadhe k’owhẹ, ruẹrẹ uyo jọ fihọ nọ o rẹ ta kpahe ẹme rai na jẹ kpọ iroro rai kpohọ uzoẹme nọ o rẹ kpare isiuru. Omobe ọ Ebaibol E rọ Jiroro na u re fiobọhọ gaga evaọ onana uruo. Eroruiruo ekwakwa obufihọ nana o rẹ k’omai udufihọ nọ ma gwọlọ re ma ta usiuwoma avọ oghọghọ.
4 Lẹ Whawha: Olẹ o r’oja rọkẹ oghọghọ ukrẹkri. Nọ ma bi ru iruo Jihova na, o gwọlọ re ma yare iẹe kẹ ẹzi riẹ, onọ oghọghọ o rrọ ubi riẹ jọ na. (Gal. 5:22) Jihova ọ te k’omai ẹgba nọ ma rẹ rọ ruabọhọ usiuwoma ota. (Fil. 4:13) Ẹlẹ kpahe odibọgba mai o rẹ sai fiobọhọ k’omai wo eriwo ọgbagba evaọ okenọ ma tẹ nya ku ebẹbẹ. (Iruẹru 13:52; 1 Pita 4:13, 14) Otẹrọnọ ozọ o rrọ omai ẹro, olẹ o rẹ sai fiobọhọ k’omai thihakọ avọ aruọwha gbe evawere.—Iruẹru 4:31.
5 Ruẹrẹ Uvẹ Fihọ: Uzẹme, oghọghọ o rẹ mae jọ odibọgba mai evaọ okenọ ma tẹ be sai duku ahwo je se-isẹri kẹ ai. Omaa-iruo ra nọ who re nwene re whọ nya n’uwou ruọ uwou evaọ oke sa-sa, ẹsejọhọ evaọ oke uvo hayo akọ owọwọ, o rẹ sae wha obokparọ ze viere. Whọ rẹ nya ku ahwo evaọ oke kpobi nọ whọ tẹ be nya evaọ iyẹrẹ na, who te kpohọ eki, whọ tẹ rrọ omoto, hayo okenọ who te kpohọ oria arozaha. Kọ eme whọ gbẹ ruẹrẹ eme ekpẹkpẹ jọ nọ a re ro mu ẹmeọta họ họ re who mu ẹme họ kugbe ahwo nọ whọ ruẹ nọ a rrọ whẹtiẹwhẹtiẹ? Hayo ẹsejọhọ who bi ruiruo evaọ oria iruo okọ hayo kpohọ isukulu egọmeti nọ whọ rẹ jọ t’ẹme kugbe amọfa kẹdẹ kẹdẹ. Whọ rẹ sai wo uvẹ nọ who re ro se-isẹri ẹkwoma ẹkpare uzoẹme Ikereakere jọ nọ o rẹ kpare isiuru. Emamọ iroro-ejẹ jọ e rrọ ẹwẹ-obe ọsosuọ ọrọ uko-obeva ọ Odibọgba Uvie Mai ọrọ January 2002 na. Omodawọ enana jọ kpobi e rẹ sai ru oghọghọ ohwo rro haro evaọ usiuwoma ota na.
6 Nọ oghọghọ u re fiobọhọ k’omai thihakọ na, ẹvẹ o r’oja te re ma yọrọ iẹe! Ẹkwoma ere oruo, ma ti vu osahwa ulogbo evaọ okenọ iruo nana nọ a te wariẹ vievie he na i te kuhọ no. Ẹruore ọyena ọvo dede ọ rẹ sai ru oghọghọ usiuwoma ota mai rro haro.—Mat. 25:21.