Ẹrọwọ Mai Ọ rẹ w’Omai Ru Iruo Iwoma
1 Ẹrọwọ ọ wọ Noa, Mosis, gbe Rehab j’owọ. Noa o ku okọ. Mosis ọ nyasiọ irere ubroke erọ uzuazọ evaọ uwou-ovie Fẹro ba. Rehab ọ ko ekiotọ na dhere o te yoẹme kẹ ithubro rai, ọ tẹ rọ ere siwi uviuwou riẹ. (Hib. 11:7, 24-26, 31) Didi iruo iwoma ẹrọwọ mai ọ rẹ wọ omai ru nẹnẹ?
2 Isẹri-Ise: Ẹrọwọ ọ rẹ w’omai t’ẹme kpahe Ọghẹnẹ ogbunu mai avọ eruẹrẹfihotọ riẹ rọkẹ evawere ibẹdẹ. (2 Kọr. 4:13) Ẹsejọ, ma re si enẹ h’emu re ma siọ isẹri ba ese. Rekọ ‘mai avọ ỌNOWO na a tẹ gbẹ rrọ kẹse kẹse,’ o rẹ bọ omai ga je ru ozọ mai kpotọ. (Ol. 16:8) Ẹrọwọ mai ọ vẹ w’omai re ma ghale emamọ usi na kugbe imoni mai, erivẹ, ibe-iruiruo, ibe-isukulu, gbe amọfa evaọ oke kpobi nọ u kiehọ.—Rom 1:14-16.
3 Oma-Ukokohọ Kugbe: Ewuhrẹ ọnya kẹse kẹse yọ iruo iwoma efa nọ i re no ẹrọwọ ze. Ẹvẹ o rọ rrọ ere? U re dhesẹ imuẹro mai inọ Jesu ọ rrọ kugbe omai ẹkwoma ẹzi ọfuafo Ọghẹnẹ evaọ okenọ ma te kokohọ eva iwuhrẹ Ileleikristi. (Mat. 18:20) U re dhesẹ ẹgwọlọ mai re ma ‘yo oware nọ ẹzi na ọ be ta kẹ ikoko na.’ (Evia. 3:6) Ma re se uthubro nọ ma bi wo na gboja keme ibiaro ẹrọwọ mai e be ruẹ nnọ ọnọ o bi wuhrẹ omai na họ Owuhrẹ Ologbo mai, Jihova.—Aiz. 30:20.
4 Oghẹrẹ Ẹsalọ nọ Ma bi Ru: Imuẹro egaga nọ ma wo kpahe eware nọ a rẹ rọ ẹro ruẹ hẹ e rẹ w’omai rọ eware abọ-ẹzi karo evaọ izuazọ mai. (Hib. 11:1) Ẹsibuobu onana o rẹ gwọlọ obusino ekwakwa iwo. Wọhọ oriruo, ọkpako ukoko jọ ọ se iruo ilogbo jọ fikinọ o te lẹliẹe siọ iwuhrẹ ba ẹsejọ, nyasiọ uviuwou riẹ ba, jẹ siọ iruo ọkobaro riẹ ba. Joma rọ epọvo na fieva kpobi họ imuẹro nọ Ebaibol ọ kẹ na inọ Jihova ọ te gwọlọ kẹ enọ e be “kake gwọlọ uvie riẹ gbe [ẹrẹreokie] riẹ.”—Mat. 6:33.
5 Amọfa a re muẹrohọ oghẹrẹ nọ ẹrọwọ o bi kpomahọ izuazọ mai ga te. Evaọ uzẹme, a riẹ ẹrọwọ mai evaọ otọakpọ na soso. (Rom 1:8) Fikiere, jọ mai kpobi ma rọ iruo iwoma mai dhesẹ nnọ ẹrọwọ mai ọ rrọ uzuazọ.—Jem. 2:26.