Wha Wo Okugbe Ọvo
1 Bro ẹse ona ukpehru orọ ugboma ohwo-akpọ na u gbe owhẹ unu no? (Ol. 139:14) Abọ ọvuọvo ugboma na o re ru iruo kugbe abọ nọ o kiọkọ kpobi. Ẹme Ọghẹnẹ ọ rehọ ukoko Ileleikristi na ro dhe ugboma nọ u bi ru iruo kugbe ziezi. Evaọ otọ Ọnowuzou na, Kristi, ahwo ukoko na kpobi a ‘whẹgbe evaọ okugbe ọvo je bi ruiruo kugbe ẹkwoma ẹzo-oma na kpobi nọ ọ rẹ kẹ oware nọ a gwọlọ.’ (Ẹf. 4:16a) Fikiere, Jihova ọ sae rehọ ahwo okugbe riẹ ro ru eware ilogbo.
2 Ahwo ukoko ikpe-udhusoi ọsosuọ na a jẹ rọ “evaevo” sẹro ẹgwọlọ abọ-ẹzi gbe ọrọ abọ-iwo ohwohwo. (Iruẹru 2:44-47) Avọ uketha Jihova, a rehọ okugbe rẹriẹ aro dhe ọwọsuọ ọgaga je fi kparobọ. (Iruẹru 4:24-31) A whowho ovuẹ Uvie na evaọ oria kpobi nọ a nya, rehọ emamọ usi na rọ nya abọ akpọ nọ a riẹ evaọ oke oyena kpobi duwu. (Kọl. 1:23) Evaọ etoke ọgbọna, ukoko Ileleikristi na o rehọ okugbe ru eware evo nana no evaọ edhere nọ ọ mae rro dede. Eme o bi fi obọ họ wha okugbe ọnana ze?
3 Ewuhrẹ Ọghẹnẹ O Si Omai Kugbe: Wariẹ akpọ na họ, egagọ mai i ku omai kugbe. Ẹvẹ onana o rọ lọhọ? Ma vuhu edhere nọ a rẹ ruẹ nọ Jihova ọ be rọ k’omai ‘emu abọ-ẹzi evaọ ẹruoke’ mu. (Mat. 24:45) Ma te je vuhu ‘ekẹ ahwo’ nọ ọ rọ kẹ wọhọ iwuhrẹ evaọ ukoko na mu. Nọ ma be rọ omarokpotọ jẹ eruẹrẹfihotọ Jihova nọ ọ be rọ ko omai evaọ abọ-ẹzi rehọ na, otoriẹ mai orọ Ẹme Ọghẹnẹ o be rro haro jẹ be kẹ omai ẹgwọlọ udu nọ ma rẹ rọ rehọ aro kele Jesu wọhọ ilele riẹ. Ma rẹ ruabọhọ ewuhrẹ Ẹme Ọghẹnẹ hrọ, dao oma avọ osegboja re ma “wo okugbe orọwọ na.” (Ẹf. 4:8, 11-13) Kọ whọ be zọhọ fihọ okugbe abọ-ẹzi mai na ẹkwoma isase Ebaibol kẹdẹ kẹdẹ?
4 Usu Ileleikristi na U Ku Omai Gbe: Uyoyou u re si omai kugbe evaọ usu okpekpe eva iwuhrẹ Ileleikristi. Eva iwuhrẹ enana, ma re ‘roro kpahe ohwohwo.’ (Hib. 10:24, 25) Onana o kẹre te erri vrẹ eriwo ehru-oma na gheghe re ma riẹ inievo mai ziezi, riwi ae evaọ edhere nọ Jihova o bi riwi ai, inọ a rrọ ghaghae. (Hag. 2:7) Nọ ma be gaviezọ kẹ ọtavia ẹrọwọ rai na, uyoyou mai rọ kẹ ae u re diwi viere o vẹ jẹ bọ okugbe mai ga viere. Kọ a riẹ owhẹ wọhọ ohwo nọ o re kpohọ iwuhrẹ ukoko kẹse kẹse?
5 Ibe Iruiruo Evaọ Udhu Na: Ma te bi ku oma gbe ibe enọ e rọwo ta usiuwoma na u re ku omai kugbe evaọ oreva Ọghẹnẹ uruo. Pọl ukọ na o wo ovuhumuo kẹ ‘ibe iruiruo riẹ rọkẹ uvie Ọghẹnẹ.’ (Kọl. 4:11) Eware nọ ma rọ ẹro ruẹ nọ ma rẹ ghale kugbe amọfa gbe obufihọ kẹ ohwohwo evaọ okenọ ma rrọ usiuwoma u re fi obọ họ k’omai ru iruo Ileleikristi mai na gbunu u ve je ru okugbe mai ga viere.—Kọl. 3:14.
6 Okugbe nọ Ẹzi Ọfuafo na Ọ Be Wha Ze: Nọ ma be rọ oma mai kẹ eruo oreva riẹ na, Jihova ọ be rọ ẹzi riẹ ghale omai. Onana u re fi obọ họ k’omai ku ẹwhọ họ jẹ rria kugbe evaọ okugbe. (Ol. 133:1) O rẹ w’omai re ma “[yọrọ] okugbe Ẹzi na eva udhedhẹ.” (Ẹf. 4:3) Omomọvo mai ọ rẹ sae zọhọ fihọ okugbe nọ ọ rrọ udevie ahwo Ọghẹnẹ na ẹkwoma ubi ẹzi na nọ ma re dhesẹ via evaọ eyerikugbe ohwohwo.—Gal. 5:22, 23.
7 Ẹgọ avọ okugbe ọvo evaọ otọ uzou-uwo Kristi ‘o rẹ kẹ oma na orro rọ kẹ ẹbọga omobọ riẹ eva uyoyou.’ (Ẹf. 4:16b) Ofariẹ, o rẹ rehọ orro kẹ Jihova, “Ọghẹnẹ udhedhẹ” na.—Rom 16:20.