Whowho Ovuẹ Uvie Na
1 “Mẹ rẹ vuẹovuẹ usiuwoma uvie Ọghẹnẹ [kẹ] ewho efa re; keme fiki onana a je vi omẹ ze.” (Luk 4:43) Jesu ọ rehọ eme yena dhesẹ uzoẹme odibọgba riẹ via—Uvie Ọghẹnẹ. Ovuẹ nọ ma bi whowho nẹnẹ na o t’ovao vi Uvie na re, wọhọ epanọ a ruẹaro riẹ eva Matiu 24:14: “A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ na kpobi; kẹsena urere u te zi te.” Didi uzẹme kpahe Uvie Ọghẹnẹ o gwọlọ nnọ ahwo a re yo kpahe?
2 Uvie Ọghẹnẹ u bi su no obọ odhiwu ze enẹna yọ kẹle na u ti nwene isuẹsu ohwo-akpọ kpobi. A le Ẹdhọ no obọ odhiwu no, yọ eyero-akpọ omuomu ọnana ọ ruọ edẹ urere riẹ no. (Evia. 12:10, 12) A te raha eyero omuomu anwae ọrọ Setan no riẹriẹriẹ, rekọ Uvie Ọghẹnẹ u ti nuhu hu. O te jọ bẹdẹ bẹdẹ.—Dan. 2:44; Hib. 12:28.
3 Uvie na u ti ru emamọ isiuru ahwo-akpọ ẹmeoyo kpobi gba. O te wha ufuoma ze rono uye ọ ẹmo, egbulegbu, okienyẹ gbe uvuhu. (Ol. 46:8, 9; 72:12-14) Emuore ọ te jọ buobu kẹ ahwo kpobi. (Ol. 72:16; Aiz. 25:6) Eyao gbe oma-oko e te gbẹ jọ vievie he. (Aiz. 33:24; 35:5, 6) Nọ ohwo-akpọ ọ be rro kpohọ ẹgbagba na, otọakpọ na u ti nwene kpohọ aparadase, ahwo a vẹ te rria evaọ okugbe ọvo.—Aiz. 11:6-9.
4 Ma re dhesẹ nnọ ma gwọlọ jọ enọ e be romakpotọ kẹ Uvie Ọghẹnẹ evaọ edhere nọ ma bi yeri uzuazọ enẹna. U fo nnọ ovuẹ Uvie na u re kpomahọ edhere uzuazọ mai soso, te itee mai gbe eware nọ ma rọ karo evaọ uzuazọ. Wọhọ oriruo, dede nọ ma wo owha-iruo nọ ma rẹ rọ sẹro uviuwou mai, ma rẹ sae kẹ uvẹ vievie he re awa-ọruọ kpahe ekwakwa iwo e jọ awhaha kẹ isiuru Uvie na. (Mat. 13:22; 1 Tim. 5:8) Ukpoye, ma rẹ kezọ kẹ ohrẹ Jesu na: “Rekọ wha kake guọlọ uvie riẹ gbe [ẹrẹreokie] riẹ, eware enana [ugogo ẹgwọlọ uzuazọ] kpobi a reti fi ai họ kẹ owhai.”—Mat. 6:33.
5 O rrọ oware ovẹrẹ re ahwo a yo jẹ j’owọ kpahe ovuẹ Uvie na nọ oke o gbe riẹ na. J’oma fi obọ họ kẹ ae ru ere ẹkwoma ‘ẹme uvie Ọghẹnẹ nọ ma rẹ tẹzẹ ae rọwo.’—Iruẹru 19:8.