Ẹkpẹti Onọ

◼ Okevẹ u ro fo nnọ a rẹ rehọ utu ẹvẹrẹ-erara mu?

Okenọ ahwo ẹvẹrẹ ọfa buobu a tẹ rrọ ẹkwotọ ukoko, ekpako na e rẹ daoma gaga re a ru ọruẹrẹfihotọ iruo usiuwoma ota evaọ ẹvẹrẹ yena. (km-IS 7/02 ẹwẹ. 1; km-IS 2/98 ẹwẹ. 3-4) O sae jọ nnọ okegbe ọ ahwo ẹvẹrẹ sa na ọ vaha ruọ ekwotọ ikoko ivẹ nọ e kẹle oma hayo bu viere. Evaọ utioye na, esẹro okogho na a rẹ kẹ ọkpọvio nọ o fo, nọ u re fi obọ họ kẹ ikoko nọ u kpomahọ na re a ruiruo-kugbe evaọ iruo usiuwoma ota na. N’oke ruoke, a rẹ sae m’omaa ovuẹ ogbotu hayo Uwuhrẹ Uwou-Eroro re a riẹ epanọ ahwo a ti kpohọ ewuhrẹ ọ ẹvẹrẹ ọrara na bu te.

A rẹ sae rehọ utu ọ ẹvẹrẹ ọrara mu evaọ okenọ eware enana e tẹ gba: (1) Iwhowho-uvie hayo enọ i wo isiuru nọ e rẹ sai wo otoriẹ emamọ usi na evaọ ẹvẹrẹ ọrara na ọvo. (2) Ọkpako hayo odibo oruiruo nọ o te ziezi ọ tẹ riẹ re ọ k’obaro je ru ewuhrẹ ẹkpoka ọvo jọ, o tẹ kao. (3) U te no ugboma ekpako jọ eva ze re a tha utu na uke. Okenọ itee nana e tẹ gba, ekpako na e rẹ vuẹ uwou-ogha na re a ruẹsi vuhu utu na mu jẹ kẹ ithubro efa.

A re mu itu buobu họ ẹkwoma Uwuhrẹ Obe Ukoko na nọ a re ru k’oka k’oka. Nọ oke o be nya haro na, ekpako na e sai kuenu kẹ iwuhrẹ efa nọ a re fiba ae, wọhọ Ovuẹ Ogbotu gbe Uwuhrẹ Uwou-Eroro na. A rẹ sai ru ẹme avọ 2, ọrọ avọ 3, gbe ọrọ avọ 4 erọ Isukulu Odibọgba Esuo-Ọghẹnẹ na evaọ eklase efa otẹrọnọ ọkpako hayo odibo oriruo nọ o te ziezi, nọ ọ riẹ ẹvẹrẹ na ziezi ọ sae jọ wọhọ ọkohrẹ. Dede na, utu na u re ku oma kugbe ukoko na evaọ ẹme uthubro, oruvẹ Ebaibol, gbe Ewuhrẹ Odibọgba na. A rẹ sai je ru ọruẹrẹfihotọ iwuhrẹ kẹ usiuwoma ota kẹ utu na.

Ahwo kpobi nọ a rrọ utu na a re ru iruo kugbe evaọ otọ ẹruọsa ugboma ekpako na. Ekpako na e rẹ kẹ ọkpọvio ọgbagba je dhesẹ isiuru evaọ ẹruorote ẹgwọlọ utu na. Okenọ ọsẹro okogho na o te weze kpohọ ukoko nọ o be kẹ utu na uketha, o re je ru ọruẹrẹfihotọ re o lele utu na kpohọ usiuwoma re ọ ruẹse bọ ae ga evaọ abọ-ẹzi. Avọ oghale Jihova, utu ẹvẹrẹ ọrara na o sai zihe ruọ ukoko evaọ obaro.