Wuhrẹ Amọfa Ẹvẹrẹ Ọgbagba Na
1 Dede nọ a no ‘erẹwho, erua, ahwo gbe erọo-unu buobu’ ze, Isẹri Jihova yọ ahwo nọ a wo okugbe, uvi okugbe-inievo akpọ soso. (Evia. 7:9) Oyena u gbunu gaga evaọ akpọ inẹnẹ nọ ọ ghale oma na. Ẹvẹ o rọ lọhọ? Keme ‘a rẹriẹ ẹrọunu mai ruọ ẹvẹrẹ ọgbagba’ no.—Zef. 3:9.
2 Okpomahọ Ogbunu: Eme họ ẹvẹrẹ ọgbagba nana? Oye họ emamọ otoriẹ uzẹme nọ a re duku evaọ Ẹme Ọghẹnẹ kpahe Jihova gbe ẹjiroro riẹ, maero uzẹme kpahe Uvie Ọghẹnẹ. Wọhọ epanọ Jesu ọ ruẹaro riẹ, a be vaha uzẹme nana ẹkwoma ukoko otọakpọ nọ a rẹ ruẹ, ‘ọrigbo nọ o wo ẹrọwọ avọ areghẹ na,’ onọ u ru nọ ahwo “kẹvẹrẹ kẹvẹrẹ erẹwho kpobi” a bi ro dede egagọ uzẹme rehọ.—Mat. 24:45; Zek. 8:23.
3 Nọ ahwo a bi wuhrẹ ẹvẹrẹ ọgbagba na, o rẹ wọ ae ru izuazọ rai rọwokugbe itee Jihova. A bi wuhrẹ re a “jọ iroro gbe oziẹ-obro ọvo.” (1 Kọr. 1:10) Ewuhrẹ Ọghẹnẹ o bi je ru ae wo uruemu ogbagba jẹ ta eme ezi erọ uzẹme, maero kpahe emamọ usi na nọ a be vuẹ amọfa. (Tait. 2:7, 8; Hib. 13:15) Obọdẹ inwene enana e rẹ wha ọghọ se Jihova.
4 Wọhọ oriruo, ọzae jọ nọ a wha emamọ usi na se o wo enọ buobu, yọ a kẹ iyo rai kpobi no Ebaibol na ze. Nọ eware nọ o yo e wọ e, o te muhọ ewuhrẹ isiava ẹkpoka je muọ iwuhrẹ họ ẹnya. Odederehọ ọsasa nọ a kẹ riẹ eva obọ Ọgwa Uvie na o gbe rie unu, keme ibuobu ahwo nọ a jariẹ na a no oghẹrẹ ovioma sa ze. U lehie he, ọye omariẹ avọ aye riẹ a te ru inwene evaọ izuazọ rai jẹ họ-ame. No anwọ okeoye ze, o fi obọ họ kẹ ahwo 40 efa no re a gọ Jihova, kugbe ahwo uviuwou riẹ buobu. Ghelọ uye ẹyao ọgaga nọ ọ rrọ, o muọ iruo ọkobaro họ kẹle na.
5 Ewuhrẹ Amọfa: Eware nọ e be via evaọ akpọ na e be lẹliẹ ahwo oruọzewọ buobu wariẹ kiẹ iroro gbe izuazọ rai riwi. Wọhọ Jesu, ma rẹ gwọlọ fi obọ họ kẹ ae. Emamọ izihebro gbe ebe-iwuhrẹ Ebaibol yọ usiavẹ evaọ obọ ufihọ kẹ ahwo oruọzewọ re a wuhrẹ ẹvẹrẹ ọgbagba na.
6 Edhere jọ nọ o ruiruo ziezi no evaọ ẹmeọta kugbe ahwo nọ a wo uvẹ hẹ họ, re a ru obe-uwuhrẹ Ebaibol kpẹkpẹe evaọ unuẹthẹ rai. (km-IS 5/02 ẹwẹ. 1) Kọ whọ dawo onana no? Okenọ whọ tẹ be ruẹrẹ oma kpahe kẹ ozihebro, salọ edhere ẹmeọta jọ nọ o fo ọnọ o wo uwou na ro no uko-obeva ọ Odibọgba Uvie Mai ọrọ January 2002 na ze. A ruẹrẹ idhere ẹmeọta buobu nọ e rrọ uko-obeva nana họ re i su ovavo kpohọ ẹmeọta evaọ ibroshọ Gwọlọ na hayo obe Eriariẹ na. Wuhrẹ edhere ẹmeọta na ziezi re whọ sae ta ẹme na ovavo no eme-emuhọ na ruọ edhe-ẹme jọ. Salọ ikereakere ọvo hayo ivẹ no edhe-ẹme na ze nọ who re se jẹ ta kpahe, jẹ ruẹrẹ onọ jọ kpahe nọ who re ro kuhọ. Oyena u re fi obọ họ nya ovavo ruọ edhe-ẹme nọ whọ gwọlọ wuhrẹ evaọ iweze n’otha.
7 Ahwo Jihova a be ruẹ eghale buobu fikinọ a wuhrẹ ẹvẹrẹ ọgbagba na. J’oma rehọ osegboja fi obọ họ kẹ amọfa re a ku oma gbe omai “se odẹ ỌNOWO na” jẹ “rọ evevo gọ e.”—Zef. 3:9.