Ile nọ I re Ru Oma Sasa
1 Ile-esuọ gbe ikporakporo yọ abọ jọ nọ o wuzou evaọ egagọ uzẹme. Evaọ Izrẹl anwae, Asaf avọ inievo riẹ a so nọ: “Wha rọ uyere kẹ ỌNOWO na. . . . Wha suile kẹ e, suile ajiri rọ kẹ e, wha gbe iku iruo urirẹ riẹ kpobi!” (1 Irv. 16:8, 9) Nẹnẹ ma rẹ jọ iwuhrẹ ukoko ẹkpoka mai suile kẹ Jihova. (Ẹf. 5:19) Uvẹ-ọghọ nọ ma wo nọ ma re ro jiri odẹ riẹ o rro kẹhẹ!—Ol. 69:30.
2 Ile Ukoko nọ ma rẹ gaviezọ kẹ, e rẹ lẹliẹ iroro mai vọ avọ eware abọ-ẹzi. Oniọvo-ọmọtẹ jọ ọ ta nọ: “Nọ a te bi kporo ile ukoko na, mẹ rẹ jọ udu mẹ kareghẹhọ eme ole na. Edhere nọ mẹ rẹ rọ kareghẹhọ Jihova evaọ iroro mẹ nọ mẹ be reawere ile na o rro kẹhẹ!”—Fil. 4:8.
3 Etoke nọ A rẹ rọ Reawere Rai: Ile Ukoko nọ a re kporo eva obọ uwou e rẹ wha uyero udhedhẹ orọ abọ-ẹzi fihọ uviuwou na. Uviuwou jọ u kere nọ: “Ma re kporo [ile] nana ekpekporo evaọ uwou gbe omoto mai, yọ ile na e rẹ bẹ omai hi keme a ruẹrẹ e rai họ evaọ oghẹrẹ nọ i re ro siuru jẹ sasa oma. Ẹsibuobu Ile Ukoko na e kẹ omai iroro idhedhẹ no evaọ okenọ ma tẹ be ruẹrẹ oma kpahe kẹ iwuhrẹ Ileleikristi hayo okenọ ma tẹ rrọ omoto bi kpohọ okokohọ.” Oniọvo-ọmọtẹ jọ ọ ta nọ: “Ile Ukoko na nọ mẹ rẹ gaviezọ kẹ eva okenọ me te bi ru iruo-uwou e rẹ lẹliẹ omẹ jọ sasasa—ono ọ rẹ sai roro nọ eva e rẹ were omẹ enẹ nọ me te bi kpiri iwu? Me wo rie fihọ iroro nnọ me re kporo ile na nọ mẹ tẹ rrọ ọkora. Ile na i re ru ohwo oma sasa! . . . Ole kpobi ọ rẹ wha evawere ze.” Kọ iyero jọ e riẹ nọ ile itieye na nọ i re ru oma sasa na e jẹ kẹ owhẹ erere?
4 Ile inẹnẹ buobu i bi dhesẹ ẹzi akpọ na. Esẹgbini e rẹ sai fi obọ họ kẹ emọ rai re a bọ isiuru kẹ ile nọ e rẹ kẹ erere ẹkwoma Ile Ukoko na nọ a re kporo ziezi. O te were emọ-uwuhrẹ Ebaibol buobu gbe ahwo nọ a dhesẹ isiuru re a riẹ emamọ ile abọ-ẹzi nana nọ i bi jiri Jihova jẹ sasa ẹzi ohwo oma na.—Ol. 47:1, 2, 6, 7.