“Ru Kẹre”
1 Evaọ okugbe-inievo Ileleikristi na, mai omomọvo ma wo owha-iruo nọ ma rẹ rọ zọhọ fihọ omosasọ ukoko na. (1 Pita 1:22; 2:17) Omosasọ utioye na u re dhesẹ oma via nọ ma te dhesẹ uyoyou mai “kẹre” kẹ ohwohwo. (2 Kọr. 6:12, 13, NW ) Fikieme o jẹ roja re ma riẹ inievo mai ziezi?
2 Usu na O rẹ Ga Vi Ere: Nọ ma be riẹ ibe Ileleikristi mai vi ere na, ma ve ti rri ẹrọwọ, ithihakọ, gbe iruemu iwoma efa rai ghare vi epaọ ọsosuọ. Ethobọ rai e rẹ wọhọ eware esese kẹ omai, jẹ lẹliẹ usu mai rro haro. Nọ ma tẹ riẹ ohwohwo ziezi, ma rẹ sae ghinẹ bọ ohwohwo ga jẹ sasa ohwohwo oma. (1 Tẹs. 5:11) Ma rẹ sae jọ “obufihọ ọbọga” kẹ ohwohwo nọ ma rẹ rọ whaha okpomahọ oyoma akpọ Setan na. (Kọl. 4:11, NW ) Fiki eyawọ-egaga erọ edẹ urere nana, ẹvẹ eva e rẹ were omai te nọ ma ro wo emamọ egbẹnyusu evaọ udevie ahwo Ọghẹnẹ!—Itẹ 18:24.
3 Egbẹnyusu ekpekpe e rẹ sae jọ ehri ọbọga gbe omosasọ nọ ma tẹ rẹriẹ ovao ku edawọ egaga. (Itẹ 17:17) Oleleikristi jọ nọ o je lele iroro ọ me fioka ha muabọ ọ kareghẹhọ nọ: “Egbẹnyusu jọ e jariẹ nọ e jẹ rọ eware iwoma jọ nọ e rrọ omẹ oma jiri omẹ re u fi obọ họ kẹ omẹ kpairoro vrẹ iroro ethọthọ nọ me wo na.” Egbẹnyusu itieye na yọ oghale nọ u no obọ Jihova ze.—Itẹ 27:9.
4 Dhesẹ Isiuru Kpahe Amọfa: Ẹvẹ ma sai ro dhesẹ uyoyou mai kẹre kẹ ibe enọ e rọwo? Fiba uyere nọ who re yere amọfa eva iwuhrẹ Ileleikristi, daoma re who lele ai ta eme nọ e rẹ bọ ohwo ga. Daoma dhesẹ isiuru omobọ ohwo kẹ ai, ababọ eware ididi uzuazọ rai nọ whọ rẹ gwọlọ kiẹ re whọ riẹ. (Fil. 2:4; 1 Pita 4:15) Edhere ọfa nọ ma sai ro dhesẹ isiuru kẹ amọfa họ ẹkwoma emu nọ ma re zizie ai ze te re kugbe omai. (Luk 14:12-14) Hayo whọ sai ru ọruẹrẹfihotọ re wha gbẹ jọ usu evaọ odibọgba na. (Luk 10:1) Nọ ma be daoma gwọlọ riẹ inievo mai ziezi na, ma rẹ rọ ere wha okugbe haro evaọ ukoko na.—Kọl. 3:14.
5 Kọ ahwo nọ ma gbẹ rrọ edhe hayo enọ isiuru rai e wọhọ emai ọvo ma rẹ gwọlọ ku usu kugbe? Ma kuvẹ re iroro itieye na e whaha omai egbẹnyusu nọ ma re mu evaọ ukoko na ha. Devidi avọ Jonatan gbe Rut avọ Naomi a mu usu okpekpe dede nọ a jọ ọhwa ha yọ a yeri oghẹrẹ uzuazọ ovona no otọ ze he. (Rut 4:15; 1 Sam. 18:1) Kọ whọ sai ru usu ra kẹre? Ere oruo o rẹ wha eghale nọ a rẹro riẹ hẹ ze.
6 Ẹkwoma uyoyou mai nọ ma re dhesẹ kẹre te amọfa, ma rẹ bọ ohwohwo ga jẹ wha udhedhẹ haro evaọ ukoko na. Ofariẹ re, Jihova omariẹ ọ rẹ ghale omai fiki uyoyou nọ ma bi dhesẹ kẹ inievo mai. (Ol. 41:1, 2; Hib. 6:10) Kọ who gbe ru ei fihọ ute ra re whọ riẹ ahwo te epanọ o rẹ sae lọhọ te kpobi?
[Study Questions]
1. Didi owha-iruo mai omomọvo ma wo?
2. Fikieme o jẹ roja re a mu usu kugbe ibe enọ e rọwo?
3. Ẹvẹ ma sae rọ jọ ọbọga kẹ amọfa?
4. Ẹvẹ ma sae rọ riẹ amọfa ziezi evaọ ukoko na?
5. Edhere jọ vẹ ma sai ro ru usu mai kẹre?
6. Didi irere jọ i re no uyoyou nọ ma re dhesẹ kẹre kẹ inievo mai ze?