Dhesẹ Ẹzi Ọkobaro
1 Te a sai ru ọkobaro enẹna hayo a sai ru hu, owhowho-uvie kpobi ọ rẹ sai dhesẹ ẹzi ọkobaro. A ghinẹ gwọlọ yo ẹme kẹ ujaje na re a ta usiuwoma je ru ilele. (Mat. 28:19, 20; Iruẹru 18:5) A wo ọdawẹ kẹ ahwo yọ a be rọ oma rai dheidhe re a sai ru odibọgba rai gba. (Mat. 9:36; Iruẹru 20:24) U no idibo Jihova eva ze re a ru oware nọ o gwọlọ kpobi ro fi obọ họ kẹ amọfa wuhrẹ uzẹme na. (1 Kọr. 9:19-23) Joma kiẹ oriruo ohwo jọ nọ o dhesẹ ẹzi otiọye na riwi, Filip ọtausiwoma na.
2 Usiuwoma Ota gbe Ewuhrẹ: Filip o wo ewha-iruo nọ i wuzou gaga evaọ ukoko ikpe-udhusoi ọsosuọ na. (Iruẹru 6:1-6) Ghele na, ọ jọ ohwo nọ o wo ajọwha ewhowho emamọ usi na gaga. (Iruẹru 8:40) Fikiere, dede nọ ekpako gbe idibo iruiruo a be rọ ẹro te ewha-iruo nọ a wo nẹnẹ, a rẹ sai dhesẹ ẹzi ọkobaro ẹkwoma ajọwha nọ a rẹ rọ karo evaọ odibọgba na. Ẹvẹ onana o rẹ kẹ ukoko na ajọwha te!—Rom 12:11.
3 Nọ Stivin o whu no, ukpokpoma ogaga o tẹ rọ oma via idudhe nọ o wha ozighi fihọ uzuazọ ilele na. Dede na, Filip ọ ruabọhọ usiuwoma ota, yọ o wo abọ ologbo evaọ emuhọ iruo usiuwoma ota na evaọ udevie ahwo Sameria. (Iruẹru 8:1, 4-6, 12, 14-17) Ma rẹ sae rọ aro kele oriruo riẹ ẹkwoma ewhowho emamọ usi na nọ ma rẹ ruabọhọ evaọ okenọ ma rrọ otọ edawọ, gbe ababọ-ọriẹwẹ nọ ma rẹ rọ ta usiuwoma kẹ ohwo kpobi nọ ma nyaku.—Jọn 4:9.
4 Ma rẹ sae ruẹ ona nọ Filip o wo wọhọ owuhrẹ Ẹme Ọghẹnẹ evaọ ikuigbe oghẹrẹ nọ ọwharọ Ẹtiopia na o ro kurẹriẹ. (Iruẹru 8:26-38) Re ma wuhrẹ ona epanọ a rẹ rọ rehọ Ebaibol na ruiruo jẹ ‘rehọ Ikereakere na lele ahwo jiroro,’ yọ edhere ọfa nọ ma re ro dhesẹ ẹzi ọkobaro. (Iruẹru 17:2, 3) Wọhọ Filip, ma be daoma ta usiuwoma na kẹ ahwo evaọ oria kpobi nọ ma jẹ sae ruẹ e rai gbe eva uyero nọ u fo kpobi.
5 Uviuwou gbe Ukoko: Ababọ avro, uruemu gbe oriruo Filip u kpomahọ emetẹ riẹ wowoma. (Iruẹru 21:9) Ere ọvona re, esẹgbini Ileleikristi nọ i fi isiuru Uvie na họ oware ọsosuọ evaọ uzuazọ rai a rẹ ta udu họ emọ rai awọ re a ru epọvo na re. Dede nọ oma o rẹ sae rrọ esẹgbini evaọ urere oka, ọsẹ hayo oni nọ ọ rẹ rọ ajọwha ta usiuwoma na kẹ amọfa ọ rẹ sai kpomahọ iroro ọmọ wowoma.—Itẹ 22:6.
6 Filip o ru ọghọ kẹ Luk avọ Pọl, Ileleikristi ajọwha nọ i je ruiruo gaga evaọ iruo Jihova. (Iruẹru 21:8, 10) Ẹvẹ ma sai ro dhesẹ ovuhumuo gbe uketha kẹ enọ i bi dhesẹ ajọwha nẹnẹ? Ẹsejọ, ma sae ta kẹ ekobaro na re ma lele ai ruiruo evaọ ohiohiẹ hayo uvo edẹ nọ ahwo a re kpohọ usiuwoma bu tere he. (Fil. 2:4) Ma sai je zizie ai ze obọ uwou mai kẹ omakugbe nọ o rẹ bọ ohwo ga. Oghẹrẹ nọ uyero mai o rrọ kpobi kẹhẹ, jọ mai kpobi ma daoma dhesẹ ẹzi ọkobaro na.
[Study Questions]
1. Ẹvẹ who re dhesẹ ẹzi ọkobaro?
2. Ẹvẹ ekpako gbe idibo iruiruo a sae rọ rehọ aro kele ajọwha nọ Filip o wo kẹ odibọgba na?
3. Ẹvẹ ma sai ro dhesẹ ẹzi ọkobaro evaọ okenọ ma tẹ rẹriẹ ovao dhe edawọ?
4. Didi oriruo Filip o fihọ otọ wọhọ owuhrẹ?
5. Eme ọ rẹ sai fi obọ họ kẹ esẹgbini Ileleikristi bọ ẹzi ọkobaro họ emọ rai?
6. Ẹvẹ ma sai ro dhesẹ ovuhumuo kẹ ekobaro nọ e rrọ ukoko mai?