Ewhowho Obọdẹ nọ A rẹ rọ Ghale Ibroshọ Ọkpokpọ
1 Iyero akpọ na e be kẹ ahwo buobu nẹnẹ idhọvẹ, rekọ umutho ahwo jọ ọvo a riẹ oware nọ o soriẹ nọ eware e rọ rrọ epanọ e rrọ na, oghẹrẹ nọ obaro na ọ te jọ, gbe oware nọ o gwọlọ nọ a re ru hrọ re a sae zọ vrẹ ẹdhoguo nọ ọ be tha na. (Izik. 9:4) Re u fiobọhọ kẹ ai vuhu epanọ oke mai na u wuzou te, ma ti ru ewhowho obọdẹ nọ ma te rọ ghale ibroshọ Wha Hai Rroro! na, nọ u ti muhọ evaọ Ẹdọvo-Oka, March 21, rite Ẹdoka, April 17.
2 A sai fi ibroshọ na họ ada evaọ okenọ ma rrọ usiuwoma ota nuwou ruọ uwou, okenọ ma bi ru izihebro, okenọ ma bi se isẹri oke-gheghe, hayo okenọ ma bi se isẹri evaọ oria nọ ogbotu ọ rrọ. Rekọ, a rẹ rọ ibroshọ Wha Hai Rroro! na kẹ ahwo odode he. Ukpoye, a ti fi ibroshọ na họ ada kẹ ahwo nọ a dhesẹ uvi isiuru kpahe oware nọ Ebaibol na e ta kpahe eware nọ e rrọ akpọ via na. A sae kẹ ahwo nọ a dhesẹ umutho isiuru omobe-ovẹvẹ ukpenọ a rẹ kẹ ae ibroshọ na.
3 Whọ sai wo iroro ohwo tobọ ẹkwoma eme nana nọ whọ rẹ ta:
◼ “Ahwo buobu a wo ọdawẹ kpahe ebẹbẹ egaga gbe eware imuozọ nọ e be via nẹnẹ na. [Kẹ oriruo jọ nọ wha jọ oborai riẹ.] Kọ whọ riẹ nọ a ruẹaro eware itieye na evaọ Ebaibol na? [Kuvẹ kẹ uyo. Kẹsena who ve se ikere jọ nọ i fo oriruo nọ whọ kẹ na, wọhọ Matiu 24:3, 7, 8; Luk 21:7, 10, 11; hayo 2 Timoti 3:1-5.] Ebaibol na i dhesẹ otofa eware nọ e be via evaọ oke mai na gbe oware nọ o rrọ obaro kẹ ahwo-akpọ. Kọ whọ gwọlọ riẹ viere? [Kuvẹ kẹ uyo. Fi ibroshọ na họ ada kẹ ohwo na otẹrọnọ o dhesẹ uvi isiuru.] Ibroshọ na ọvọvẹ o rrọ. O tẹ were owhẹ re who ru unevaze kẹ iruo akpọ so-so mai, o rẹ were omai re ma rehọ iẹe.”
4 Hayo edhere nana ọ sai wo iruo kẹ owhẹ:
◼ Eware imuozọ nọ e rrọ akpọ via nẹnẹ hayo eware iyoma nọ e be via kẹ ahwo jọ e be kẹ ahwo buobu ọkora. U bi gbe ahwo buobu unu kpahe oware nọ Ọghẹnẹ ọ gbẹ be jowọ re ọ whaha eware itieye na ha. Ebaibol na e komai imuẹro inọ Ọghẹnẹ ọ te jowọ kẹle re o si uye-oruẹ ahwo-akpọ no. Muẹrohọ eghale nọ Ọghẹnẹ ọ te rọ kẹ ahwo-akpọ. [Se Olezi 37:10, 11.] Kọ whọ gwọlọ riẹ viere?” Rọ epanọ a dhesẹ fihọ obehru na ro kuhọ.
5 Daoma wo odẹ gbe adrẹse oria nọ ohwo kpobi nọ ọ rehọ ibroshọ na ọ be rria tobọ, je ru ọruẹrẹfihotọ nọ who re ro zihe re whọ tua isiuru na. Iroro-ejẹ epanọ a sai ro ru onana e te roma via evaọ Odibọgba Uvie Mai ọrọ April 2005. Otẹrọnọ ohwo jọ o dhesẹ uvi isiuru evaọ iweze ọsosuọ, whọ sai mu obe-uwuhrẹ Ebaibol họ ẹsiẹsiẹ yena ẹkwoma ibroshọ Wha Hai Rroro! na hayo obe ofa, wọhọ ibroshọ Gwọlọ na.
6 Ibroshọ ọkpokpọ na ọ te jariẹ nọ Ewuhrẹ Odibọgba nọ a jọ ru ẹme nana ọ tẹ fa no. Ma jẹ iroro inọ iwhowho-uvie gbe ekobaro a kake rehọ unu nọ a roro nọ a rẹ sai fihọ ada evaọ umutho edẹ jọ nọ a ro muọ ewhowho obọdẹ na họ na. Jọ Jihova ọ ghale iruẹru obọdẹ nana re o wha ujiro sei jẹ jọ erere kẹ ahwo udu-oruọzewọ evaọ oria kpobi.—Ol. 90:17.