Oghẹrẹ Vẹ Ma re ro Se Isẹri kẹ Imoni Mai?

¹ Oghọghọ ulogbo ofa vẹ ma rẹ sai wo vi akpọ ọkpokpọ na nọ ma rẹ ro avọ iyoyou mai, be gọ Jihova evaọ okugbe ọvo! Ẹkwoma imoni mai nọ ma re se isẹri kẹ, ẹruore oghọghọ nana ọ rẹ sae ziọ uzẹme. Dede na, re ma ru ere evaọ edhere nọ ọ rẹ sasa oma, o gwọlọ orimuo. Ọsẹro okogho jọ o muẹrohọ nọ: “Ahwo nọ a rẹ kpare isiuru imoni rai ẹkwoma usiuwoma nọ a rẹ ta kẹ ae ẹmẹrera a re wo emamọ iyẹrẹ tobọ.” Ẹvẹ ma sai ro ru onana?

² Kpare Isiuru Rai: Kaki roro didi kpahe oghẹrẹ nọ whọ sae rọ kpare isiuru imoni ra. (Itẹ 15:28) Eme ọ rrọ isiuru rai? Didi ebẹbẹ a be rẹriẹ ovao dhe? Ẹsejọhọ whọ sai dhesẹ uzoẹme jọ hayo fodẹ ugogo ikereakere jọ nọ o ta ẹme kpahe oware jọ nọ o rẹ were ai gaga. Otẹrọnọ imoni ra a be rria kẹle owhẹ hẹ, otiẹsejọ whọ sai ru onana ẹkwoma ileta hayo ifonu. Ababọ eme nọ whọ rẹ ta bu hrọ, kọ ibi uzẹme, jẹ rọ ẹro so Jihova re o ru ai rro.—1 Kọr. 3:6.

³ Jesu ọ ta kẹ ọzae jọ nọ o le izi igbegbe no oma inọ: “Kpo bru egbẹnyusu ra, re whọ ta epa eware ilogbo nọ Ọnowo o ru kẹ owhẹ kẹ ae, gbe epanọ ọ rọ re ohrọ ra.” (Mak 5:19) Dai roro kpahe oghẹrẹ iroro nọ onana o kẹ ahwo uviuwou ọzae na! Dede nọ oware ulogbo utioye o sae te nwane via kẹ owhẹ hẹ, ẹsejọhọ imoni ra a wo isiuru kpahe iruẹru ra hayo erọ emọ ra. Ẹta kpahe ẹme jọ nọ who ru evaọ Isukulu Odibọgba Esuo-Ọghẹnẹ na, okokohọ jọ nọ whọ nya, iweze nọ who weze kpohọ Ebẹtẹle, hayo oware jọ nọ o via k’owhe o sai rovie uvẹ fihọ nọ whọ rẹ rọ ta eware efa kẹ ae kpahe Jihova gbe ukoko riẹ.

⁴ Hai Rri Otọ Mu: Nọ whọ tẹ be ta usiuwoma kẹ imoni ra, whaha eme buobu nọ whọ rẹ ta kẹ ai ẹsiẹvo. Nọ oniọvo ọmọzae jọ ọ kareghẹhọ okenọ o ro mu Ebaibol na họ ewuhrẹ, ọ ta nọ: “Mẹ jẹ hae raha euwa buobu ta kẹ oni mẹ kpahe enwenọ oware kpobi nọ me wuhrẹ no Ebaibol na ze, yọ onana o jẹ hae wha avro ze ẹsibuobu, maero kọ mẹ avọ ọsẹ mẹ.” O tẹ make rọnọ ohwo uviuwou mai jọ o dhesẹ isiuru kpahe ovuẹ Ebaibol na, lele iei ta ẹme evaọ edhere nọ ọ rẹ kpare isiuru riẹ re ọ gbẹ gwọlọ wuhrẹ. (Itẹ 25:7) Hai dhesẹ adhẹẹ, ẹwo, gbe ithihakọ ẹsikpobi, wọhọ epanọ who re ru nọ who te bi lele erara tẹme evaọ odibọgba na.—Kọl. 4:6.

⁵ Eva oke jọ, ahwo uviuwou Jesu a roro nọ uzou riẹ o gbẹ gba ha. (Mak 3:21) Rekọ uwhremu na, ejọ i zihe ruọ Ileleikristi. (Iruẹru 1:14) Otẹrọnọ imoni ra a gbẹ jẹ omodawọ ọsosuọ ra nọ whọ rọ gwọlọ dhesẹ uzẹme na kẹ ae rehọ họ, who rolo obọ họ. Iyero gbe uruemu ahwo e sai nwene. Gbẹ hae gwọlọ uvẹ ofa nọ whọ rẹ rọ ta ugogo-ẹme jọ kẹ ae nọ o rẹ kpare isiuru rai. Ẹsejọhọ who ti wo oghọghọ nọ who ro fi obọ họ kẹ ai ruọ edhere nọ o re su kpohọ uzuazọ ibẹdẹ bẹdẹ na.—Mat. 7:13, 14.

[Study Questions]

1. Fikieme o jẹ gwọlọ orimuo nọ ma te bi se isẹri kẹ imoni mai?

2. Ẹvẹ uvi isiuru nọ ma re wo kpahe imoni mai u re ro fiobọhọ k’omai kpare isiuru rai?

3. Ẹvẹ isiuru nọ imoni mai a wo kpahe omai o sai ro rovie uvẹ fihọ nọ ma re ro se isẹri kẹ ae?

4. Eware vẹ ma rẹ whaha nọ ma tẹ be ta usiuwoma kẹ imoni mai?

5. Eme ma re ru otẹrọnọ imoni mai e be jẹ usiuwoma nọ ma be ta kẹ ae rehọ họ?