Kọ Ẹvẹ Kpahe Imoni Ra?

¹ Ibuobu mai a wo imoni buobu nọ e rọ ukoko na ha. Ẹvẹ ma wo ẹruore te kẹ iyoyou mai eyena re a kuomagbe omai evaọ edhere uzuazọ na! Ọdawẹ mai kẹ obaro ebẹdẹ bẹdẹ rai o rẹ mae rro nọ a tẹ ghinẹ rọ ahwo uviuwou mai. Dede nọ ma daoma ikpe buobu no re ma kpọ isiuru rai fihọ ukoko na, u fo re ma nwani ku ei họ nọ ẹruore ọvo ọ gbẹ riẹ hẹ hẹ.

² Okenọ Jesu ọ jẹ ta usiuwoma riẹ, makọ “imoni riẹ dede e rọwo riẹ gbe he.” (Jọn 7:5) Nọ u te oke jọ, imoni riẹ a te je roro nọ ọ be m’oruẹ. (Mak 3:21) Ghele, Jesu ọ nyase ae ba ha. Eva omoke jọ, inievo riẹ e tẹ jẹ uzẹme na rehọ. (Iruẹru 1:14) Jemis oniọvo riẹ o te zihe ruọ uvi ohwo nọ o dikihẹ gaga evaọ ukoko Ileleikristi na. (Gal. 1:18, 19; 2:9) Otẹrọnọ whọ gwọlọ wo oghọghọ ẹruẹ imoni ra nọ i re dede uzẹme na rehọ, whọ d’obọ ji hi re whọ wha emamọ usi Uvie na bru rai.

³ Kẹ Omosasọ, Orọnikọ Eva-Kpọ Họ: Okenọ Jesu ọ ta usiuwoma kẹ amọfa, oma o sasa ahwo nọ a jẹ gaviezọ kẹe, orọnikọ ọ jẹ rọ eme fae ova ha. (Mat. 11:28, 29) Ọ rehọ iwuhrẹ nọ a sae riẹ otọ rai hi reghe ai aro ho. Re whọ rehọ ame uzẹme na sasa imoni ra oma, kẹ ai umutho evaọ etoke, orọnikọ onọ o rẹ bẹ ae t’unu hu! Ọsẹro ọnyawariẹ jọ o muẹrohọ nọ: “Emamọ iyẹrẹ i re t’obọ no obọ ahwo nọ e rẹ kpare isiuru imoni rai ẹkwoma isẹrise ẹmẹrera.” Evaọ edhere ọnana, makọ otu ewọsuọ dede a ve mu enọ họ ẹnọ a ve ti wo isiuru kẹ uzẹme na.—1 Pita 2:2; wawo 1 Ahwo Kọrint 3:1, 2.

⁴ Ileleikristi buobu nọ e rọo no a se isẹri nọ i w’ẹgba kẹ erivẹ-orọo rai nọ e rọwo ho no ẹkwoma obe nọ a re rovie fihọ kpohọ oria nọ u re si ai urru. Oniọvo ọmọtẹ jọ nọ o rovie obe fihọ nyaseba o ru obe uwuhrẹ kugbe emọ riẹ re evaọ oria nọ ọzae riẹ ọ sai jo yo, jẹ kẹ edhesẹ nọ u re wo erere kẹe. Ẹsejọ ọ vẹ nọe nọ: “Enẹ gbe enẹ me wuhrẹ evaọ uwuhrẹ mẹ nẹnẹ. Kọ eme who roro kpahiẹe?” Uwhremu na ọzae riẹ ọ tẹ jẹ uzẹme na rehọ.

⁵ Kẹ Adhẹẹ, Orọnikọ Okpakpa Ha: Owhowho-uvie jọ ọ ta nọ “makọ imoni a wo udu eriwo gbe ẹjiroro obọ rai.” Fikiere ma re dhesẹ adhẹẹ okenọ a tẹ ta ẹjiroro rai via hayo okenọ a tẹ vuẹ omai nọ ma gbẹ t’ẹme kẹ ae kpahe uzẹme na ha. (Otausi. 3:7; 1 Pita 3:15) Ẹkwoma e wo odiri gbe uyoyou gbe emamọ ezọgaviẹ, ma sae gwọlọ uvẹ nọ u kiehọ nọ ma rẹ rọ rehọ ẹghẹ se isẹri. Odiri otiọye na o rẹ sae kẹ osaohwa, wọhọ onọ ma ruẹ evaọ oma ọzae Oleleikristi nọ ọ rehọ odiri kiakọ ekpehre uruemu aye riẹ evaọ ikpe 20 soso. Nọ ọ nwani muhọ enwene no, ọ tẹ ta nọ: “Ẹvẹ mẹ kẹ Jihova uyere te nọ o ro fiobọhọ k’omẹ kọ uye-oruẹ-krẹkri, keme enẹna mẹ be ruẹ iyẹrẹ riẹ: Aye mẹ o muhọ ẹnya evaọ edhere uzuazọ na no!”

⁶ Kọ ẹvẹ kpahe imoni ra? O rẹ sae jọ nọ ẹkwoma emamọ uruemu Oleleikristi ra gbe elẹ ra fiki rai, ‘whọ rẹ sae ku ai rẹriẹ bru Jihova.’—1 Pita 3:1, 2.