Thihakọ Evaọ Usiuwoma Ota
1 Oke obẹbẹ ma rrọ na. Ohọre omoma, emo uyẹ, okpẹtu nọ ohwo ọ robọ so ho, gbe eware ozighi efa e vọ oria kpobi. Ahwo akpọ a gwọlọ emamọ usi enẹna vi epaọ anwẹdẹ. Rekọ, ababọ osegboja kpahe eware abọ-ẹzi o bi vihọ. Evaọ eria jọ, o rẹ sae jọ bẹbẹ re a di ahwo họ uwou, jẹ tubẹ mae bẹ dede re a ruẹ ahwo nọ a rẹ kezọ kẹ omai hayo nọ e gwọlọ wuhrẹ Ebaibol na. O make rrọ ere na, o roja re ma thihakọ evaọ ewhowho emamọ usi Uvie Ọghẹnẹ nọ a ro mu no na.—Mat. 24:14.
2 Uyoyou kẹ Ahwo: Usiuwoma ota mai u dhesẹ uyoyou nọ Jihova o wo kẹ ahwo. “Ọ guọlọ nọ ohwo ọvo o whu hu, rekọ ahwo kpobi a zite ekurẹriẹ.” (2 Pita 3:9; Izik. 33:11) Fikiere, ọ kẹ ujaje, wọhọ epanọ Jesu ọ ta, inọ ‘usiuwoma na a rẹ te kake vuẹ erẹwho kpobi tao.’ (Mak 13:10) Ọghẹnẹ ọ be tuduhọ ahwo awọ re a kurẹriẹ bru ei ze, re a sae zọ vrẹ ẹdhoguo nọ o bi ti te akpọ Setan na. (Joẹl 2:28, 29, 32; Zef. 2:2, 3) Kọ eva e gbẹ be were omai inọ Jihova ọ komai uvẹ yena?—1 Tim. 1:12, 13.
3 Iyẹrẹ iruo akpọ-soso mai i dhesẹ nnọ eva etoke ukpe-iruo 2004 na, a tẹ ghale ebe-iwuhrẹ Ebaibol nọ a ru fihọ kamara kamara, i bu te 6,085,387, yọ ahwo ọkpokpọ nọ a họ-ame koka koka a bu te oware wọhọ 5,000! Fikinọ Jihova ọ ghale omodawọ nọ iwhowho-uvie a be rọ daoma ta usiuwoma kẹ ahwo kpobi evaọ ẹkwotọ nọ a ghale kẹ ae, oye a sai ro duku ahwo ọkpokpọ nana jọ nọ e roma mudhe na. Onana o wha oghọghọ ulogbo ziọ ukoko na no, yọ ẹvẹ o rrọ uvẹ-ọghọ te re a jọ ibe oruiruo kugbe Ọghẹnẹ evaọ iruo esiwo nana!—1 Kọr. 3:5, 6, 9.
4 Ejiri Odẹ Ọghẹnẹ: Ma re thihakọ evaọ usiuwoma ota re ma ruẹsi jiri Jihova evaọ ẹgbede, je ru odẹ riẹ fo evaọ iraro ahwo-akpọ. (Hib. 13:15) Setan ọ “viẹ akpọ kpobi họ” no re a rọwo nọ Ọghẹnẹ o wo ogaga ha nọ o re ro ku ebẹbẹ ahwo-akpọ họ, inọ ọ be daezọ uye-oruẹ ahwo-akpọ họ, hayo inọ Ọghẹnẹ ọ rrọ uzuazọ họ. (Evia. 12:9) Ẹkwoma usiuwoma ota mai, ma bi se isẹri kpahe Ọsẹ ologbo obọ odhiwu mai. Joma ruabọhọ odẹ riẹ nọ ma re jiri—enẹna gbe bẹdẹ bẹdẹ.—Ol. 145:1, 2.