Ru Ewoma jẹ Ghale kẹ Amọfa
1 Dọkas ọ vọ avọ “iruo iwoma iruo gbe ọghọ-ohrọ.” (Iruẹru 9:36, 39) Uruemu ọghọ-oruo riẹ u si rie kẹle ahwo nọ a riẹ riẹ, je si ei kẹle Jihova Ọghẹnẹ. Ahwo Hibru 13:16 o ta nọ: “Wha se oware uwoma gbe ọghoruo ba ha, keme iwẹgọ itieye na e rẹ were Ọghẹnẹ gaga.” Kọ ẹvẹ ma sai ro ru ewoma jẹ ghale kẹ amọfa nẹnẹ?
2 Edhere jọ nọ ma sai ro ru ewoma kẹ amọfa họ ẹkwoma “eyero” mai nọ ma re ro fiobọhọ kẹ ae. (Itẹ 3:9) Unevaze nọ ma bi ru kẹ iruo akpọ-soso na u ru rie lọhọ nọ a be rọ bọ Egwa Uvie, Egwa Okokohọ, gbe iwou ogha evaọ akpọ na soso. Ọghoruo mai ọ lẹliẹ ima-ahwo buobu wo erere no ithubro Ọghẹnẹ gbe omakugbe ọbọga abọ-ẹzi ze no.
3 Sasa Amọfa Oma: Nọ okpẹtu ọ tẹ roma via, Isẹri Jihova e ruẹrẹ oma kpahe re a “ru iruo ezi” kẹ ibe enọ e rọwo gbe ahwo nọ a rrọ ukoko na ha. (Gal. 6:10) Okenọ ẹjini ekẹmika jọ ọ sa eva France, ọzae gbe aye uwou-orọo jọ nọ e jẹ rria kẹle oria ẹjini na a ta nọ: “Inievo Ileleikristi mai a dhogbo ze vẹrẹ vẹrẹ ti fiobọhọ kẹ omai ru ofẹ mai gbe orọ amọfa fo evaọ uwou na. U gbe ahwo okegbe mai unu gaga nọ a ruẹ nnọ ahwo buobu a nyaze ti fiobọhọ.” Oniọvo-ọmọtẹ ọfa jọ o fibae nọ: “Ekpako ukoko na e dhẹze ti fiobọhọ k’omai. A nyaze te tuduhọ omai awọ. Evaọ uzẹme, onana họ oware nọ ma ginẹ gwọlọ vi obufihọ eware abọ-iwo.”
4 Dede nọ idhere buobu e riẹ nọ ma re ro ru ewoma kẹ erivẹ mai, edhere nọ ọ mai woma nọ ma re ro fiobọhọ kẹ ae họ eriariẹ eghaghae uzẹme na nọ ma rẹ ta kẹ ae, onọ o kẹre te “ẹruore uzuazọ ebẹdẹ bẹdẹ” nọ Jihova ọ ya eyaa riẹ na. (Tait. 1:1, 2) Ovuẹ Ebaibol na o rẹ wha omosasọ se enọ i bi weri fiki iyero akpọ na gbe oma sebaẹgba rai. (Mat. 5:4) Joma ru ewoma je fiobọhọ kẹ amọfa nọ ma te wo uvẹ nọ ma re ro ru ere.—Itẹ 3:27.