Wha Hae Bọ Ohwohwo Ga
1 Pọl ukọ na ọ dao ẹgba riẹ kpobi rọ bọ ibe enọ a gbẹ rrọ orọwọ na ga. (Iruẹru 14:19-22) Epọvo na re, o rẹ k’omai uye nọ inievo mai a tẹ rẹriẹ ovao dhe ẹbẹbẹ, yọ ma gwọlọ fiobọhọ kẹ ae. Ebaibol na i dhesẹ inọ, mai kpobi ma re dhesẹ isiuru kpahe amọfa, orọnikọ ekpako ukoko ọvo i re ru onana ha. (Rom 15:1, 2) Roro kpahe idhere ivẹ jọ nọ ma sai ro fi ohrẹ uyoyou nana họ iruo: “Whai ohwo ọ hẹ wha ohwo udu, ohwo ọ kpare ohwo.”—1 Tẹs. 5:11.
2 Muẹrohọ Ẹgwọlọ Amọfa: Ebaibol na e nẹ iyẹrẹ kpahe Dọkas inọ “iruo iwoma iruo gbe ọghọ-ohrọ e dariẹ oma fia.” (Iruẹru 9:36, 39) Dọkas o muẹrohọ ahwo nọ a gwọlọ obufihọ, jẹ dao ẹgba riẹ kpobi ro fiobọhọ kẹ ae. Oriruo nọ o fihọ k’omai o woma kẹhẹ! O sae jọ nọ whọ riẹ kpahe oniọvo ọkpako jọ nọ o gwọlọ nọ a fiobọhọ wọ kpohọ ewuhrẹ. Hayo ọkobaro jọ nọ o wo ohwo ọvo nọ o re lele iei kpohọ usiuwoma evaọ uvo ẹdẹjọ ẹkpoka na ha. Dai rri oghẹrẹ nọ o rẹ jọ uduotahawọ kẹ ohwo otiọye na te nọ who te vuhu ẹgwọlọ riẹ mu jẹ kẹe obufihọ nọ ọ gwọlọ!
3 Ẹmeọta-Kugbe Abọ-Ẹzi: Ma rẹ sae rọ ẹme mai bọ amọfa ga. (Ẹf. 4:29) Ọkpako ukoko jọ nọ o wo otoriẹ ziezi ọ ta nọ: “Otẹrọnọ whọ gwọlọ jọ ọbọga kẹ amọfa, t’ẹme kpahe eware abọ-ẹzi. Re who muọ ẹmeọta ọbọga họ, whọ sae rọ onọ olọlọhọ muhọ wọhọ, ‘Ẹvẹ whọ rọ riẹ uzẹme na?’ ” Dhesẹ uvi isiuru kpahe izoge nọ e rrọ ukoko na. Dhesẹ ọdawẹ kẹ enọ udu u whrehe no gbe enọ e rẹ dhomovuọ. (Itẹ 12:25) Whọ kuvẹ hẹ re eme erozaha akpọ na i mi owhẹ uvẹ nọ who re ro lele ibe Ileleikristi tẹme kpahe eware abọ-ẹzi.—Rom 1:11, 12.
4 Kọ eme whọ rẹ sae ta rọ bọ amọfa ga? Kọ whọ jọ evaọ isase gbe ewuhrẹ Ebaibol omobọ ra ruẹ ehri-uzi jọ nọ o lẹliẹ ovuhumuo ra kẹ Jihova diwi viere kẹle na? Kọ ẹme jọ nọ who yo evaọ ovuẹ ogbotu hayo eva Ewuhrẹ Uwou-Eroro na o tuduhọ owhẹ awọ? Kọ oriruo ọbọga ẹrọwọ jọ nọ who yo hayo se kpahe u duobọ te owhẹ udu? Otẹrọnọ whọ yọrọ eme abọ-ẹzi eghaghae itieye fihọ udu ra, who ti wo eme uduotahawọ jọ nọ whọ rẹ ta kugbe amọfa ẹsikpobi.—Itẹ 2:1; Luk 6:45.
5 Ẹkwoma obufihọ nọ u fo nọ ma rẹ kẹ gbe ẹmeunu mai nọ ma re ro ruiruo avọ areghẹ, joma gbẹ hae bọ ohwohwo ga.—Itẹ 12:18.